1, 2. ¿Imanirtaq Jesusqa alläpa yarpachakïkunapa pasarqan?

WANUTSIYÄNAMPAQ junaqmi, Jesusqa alläpa yarpachakïkunapa pasëkarqan. Porqui chikeqninkuna alläpa sufritsir ichikllachöna wanutsiyänampaq kaqtam musyarqan. Peru masqa yarpachakurqan, teytampa voluntäninta cumplinampaq kaqmanmi. Y musyarqanmi wanunqanyaq tsarakurninqa, Diospa jutin respetashqa kanampaq kaqta. Jinamampis nunakunatam alläpa kuyaq y musyaqmi tsarakunqampita llapan nunakuna mana wanushpa kawakïta puëdiyänampaq kaqta.

² Tsë yarpachakïkunapa pasëkarnimpis Jesusqa tranquïlullam këkarqan. Apostolninkunatam kënö nishqa karqan: “Yamë kënïtam qamkunata qoyaq” (Juan 14:27). Jesusqa ‘Diospa yamë kënintam’ katsirqan. Tsë ninanqa, Dioswan alli amïgu kanqantsikpita yamë y tranquïlu sientikïmi. Tsënömi Jesusqa shonqunchö y pensëninchö yamë y tranquïlu sientikurqan (Filip. 4:6, 7).

3. ¿Imapitataq kë yachatsikïchö yachakushun?

³ Manam mëqantsikpis Jesus pasanqampaqa pasashuntsu. Peru Diospa sirweqninkunaqa llapantsikmi problëmakunapa pasashun (Mat. 16:24, 25; Juan 15:20). Itsa tsërëkur höraqa Jesusnö imëka yarpachakïyoq kashun. ¿Imatataq rurashun tranquïlu y yamë kënintsikta yarpachakïkuna mana ushakätsinampaq? Rikärishun kë patsachö këkar Jesus ima kima rurëkunata ruranqanta y noqantsikpis problëmakunapa pasar tsënölla ruranantsikpaq kaqta.

4. 1 Tesalonicensis 5:17 textu ninqannö, ¿ima cäsukunataq rikätsikuna Diosman Jesus atska kuti mañakunqanta? Willakaramï.

⁴ (Leyi 1 Tesalonicensis 5:17). Wanutsiyänampaq ichikllana pishikaptinmi Jesusqa atska kuti Jehoväman mañakurqan. Wanunqanta Yarpäyänampaq reunionta apostolninkunawan patsätsinqanchömi tantata manaraq pasarnin y vïnuta manaraq pasarnin mañakurqan (1 Cor. 11:23-25). Jinamampis, Pascua fiesta reunionta usharirninmi juk läduta ëwakuyänampaq mañakurqan (Juan 17:1-26). Jina Olïvus jirkaman chärirnimpis atska kutim mañakurqan (Mat. 26:36-39, 42, 44). Y manaraq wanurnimpis kënömi mañakurqan: “Teytallä, makikichömi kawatsikoq kallpäta jaqirï” (Lüc. 23:46). Rikanqantsiknöpis, Jesusqa alläpa sufrimientukunapa pasanqan hörakunachömi Jehoväta cuentaman churarqan.

5. ¿Imanirtaq Jesuspa apostolninkunaqa pruëbakunapa pasar alleq tsarakuyarqantsu?

⁵ Teytanman mana jaqipa mañakunqanmi Jesustaqa yanaparqan alleq tsarakunampaq. Peru apostolninkunaqa manam pënötsu mañakuyarqan, tsëmi Jesusta wanutsiyänampaq tsariyanqan paqasqa tsarakuyarqantsu (Mat. 26:40, 41, 43, 45, 56). Noqantsikpis Diosman seguïdu mañakurninqa, pruëbakunapa pasarnimpis alleqmi tsarakushun. Y mañakurninqa, ¿imakunatataq mañakushwan? Rikärishun.

6. ¿Imanirtaq Diosman confiakïta wanantsik?

⁶ Por ejemplu mañakurninqa, mas markäkoq o yärakïyoq kanapaqmi Jehoväta mañakunantsik (Lüc. 17:5; Juan 14:1). Porqui ichik tiempullachönam Satanasqa pruëbaman churamäshun (Lüc. 22:31). Peru Jehoväman  confiakunqantsikmi ima problëmakunapa pasarnimpis alli tsarakunapaq y tranquïlu sientikunapaq yanapamäshun. Porqui musyantsikmi problëmakunapa pasanqantsik höra Jehovä yanapamänapaq kaqman (1 Pëd. 5:6, 7).

7. Robert jutiyoq wawqipita, ¿imatataq yachakuntsik?

⁷ Jehoväman mañakunqantsikmi, problëmakunapa pasarpis tranquïlu sientikunapaq yanapamantsik. 80 watayoq Robert jutiyoq anciänuta ima pasanqanta rikärishun. Pëmi kënö nin: “Filipensis 4:6, 7 textu ninqanmi, imëka problëmakunachö alli tsarakunäpaq yanapamashqa. Por ejemplu höraqa qellënïpis pishirqanmi, y anciänu këtapis juk tiempupam dejarirqa”. Jina kënöpis ninmi: “Imapaqpis yarpachakunqä höram Diosman mañakü. Tsënö mas seguïdu mañakunqämi mas tranquïlu sientikunäpaq yanapaman”.

8. Juan 8:29 textu ninqannöpis, ¿imanirtaq Jesusqa tranquïlu y yamë sientikurqan?

⁸ (Leyi Juan 8:29). Jina chikeqninkuna mana allipa tratayaptimpis Jesusqa tranquïlum sientikurqan. Porqui tsëta rurarnin Teytanta kushitsinqantam musyarqan. Jina mas difïcil pruëbakunapa pasarnimpis, Jesusqa wiyakoqmi karqan. Y Jehoväta kuyarmi pëta sirwirnin ocupädu karqan. Kë Patsaman manaraq shamurninmi “obra ruraq maestrunö” Diosta yanaparqan (Prov. 8:30). Y kë Patsachö këkarnam gänas gänaslla teytampita rasumpa kaqta yachatsikurqan (Mat. 6:9; Juan 5:17). Tsëta rurarninmi Jesusqa alläpa kushishqa sientikurqan (Juan 4:34-36).

9. Diospita yachatsikur ocupädu kanqantsikqa, ¿imanötaq tranquïlu y yamë kanapaq yanapamantsik?

 ⁹ Jehoväta cäsukurnin y pëpa kaqchö ocupädu karninmi Jesus ruranqantaqa qatintsik (1 Cor. 15:58) Diospa kaqchö ocupädu këkaq cristiänuqa, problëmakunapa pasëkarnimpis manam alläpaqa yarpachakuntsu (Hëch. 18:5). Porqui Diospita yachatsinqantsik nunakunaqa noqantsikpitapis mas problëmayoqmi kayan. Peru Jehoväta reqirnin y pë ninqankunata cäsukurninmi vïdankunachö cambiukunata rurayashqa, tsëmi kananqa mas kushishqa kayan. Noqantsiktapis Jehovä yanapamänapaq kaqmanmi confiakuntsik. Tsënö confiakunqantsikqa tranquïlu y yamë kanapaqmi yanapamantsik. Juk panim unëpitana depresion qeshyawan sufrirnin imapaqpis mana välinqanta sientikun. Pëmi kënö nin: “Diospita yachatsikur ocupäda kanqämi alläpa mana yarpachakunäpaq y mas tranquïlu kanäpaq yanapaman. Jina tsëta ruranqämi Jehoväwan mas amïgu kanäpaq yanapamashqa”.

10. ¿Imatataq yachakuntsik Brenda jutiyoq panintsik willakunqampita?

¹⁰ Jina Brenda jutiyoq panita ima pasanqanta rikärishun. Pëqa warmi wamranwanmi esclerosis multiple nishqan qeshyawan qeshyayan. Tsëmi panintsik Brendaqa sïlla de ruëdallachö purin y kallpampis manam alläpa kantsu. Tsënö kaptimpis puëdinqan hörakunam wayin wayin yachatsikoq yarqun, peru masqa cartallapam yachatsikun. Kënömi willakun: “Kë tiempuchö mana kachakänäpaq kaqta entiendinqämi Diospita yachatsikurnin mas ocupäda kanäpaq yanapaman. Jina yanapamanmi Diosta reqiyänampaq nunakunata yanapar sïguinäpaq, y problëmäkunaman mana yarparänäpaq. Y shamoq tiempuchö manana qeshyanäpaq kaqmanmi mas confiakü”.

11-13. (1) ¿Imanötaq Jesuspa apostolninkuna y juk qateqninkunaqa alli amïgu kayanqanta rikätsikuyarqan? (2) ¿Imanötaq Jesusta amïgunkuna yanapayarqan?

¹¹ Jesusqa yachatsikur qallanqampita patsëmi imëka problëmakunapa pasarqan. Peru apostolninkunaqa Proverbius 18:24 textu ninqannömi, juk wawqipitapis mas yachanëpaq amïgukuna kayarqan, tsëmi Jesusqa alläpa valorarqan. Porqui manam mëqan wawqinkunapis pëmanqa creiyarqantsu (Juan 7:3-5). Jinamampis juiciunta oqrashqa kanqantam familiankuna niyarqan (Mar. 3:21). Peru apostolninkunaqa jukläyam kayarqan. Tsëmi wanutsiyänampaq tsariyanqan paqas, apostolninkunapaq kënö nirqan: “Qamkunam imëka pasanqäkunachö noqawan imëpis kayarqunki” (Lüc. 22:28).

¹² Tsënö kaptimpis Jesustaqa discïpulunkuna höraqa llakitsiyarqanmi, peru pëqa manam pantayanqankunamantsu yarparäkurqan, sinöqa pëman confiakuyanqanmanmi masqa yarpararqan (Mat. 26:40; Mar. 10:13, 14; Juan 6:66-69). Tsëmi wanutsiyänampaq tsariyanqan paqas qateqninkunata kënö nirqan: “Qamkunataqa amïgükuna nirmi qayayarqoq, porqui Teytäpita llapan wiyanqätam qamkunataqa musyatsiyarqoq” (Juan 15:15). Awmi, amïgunkunaqa alläpam Jesusta animayarqan y Diospita yachatsikunqanchö yanapayanqampitapis alläpa kushikurqan (Lüc. 10:17, 21).

¹³ Jesuspa amïgunkunaqa manam apostolninkunallatsu kayarqan, sinöqa juk amïgunkunapis karqanmi y pëkunaqa Diospita yachatsikunqanchö y juknöpapis yanapayarqanmi. Por ejemplu wakinkunaqa wayinkunachömi chaskiyarqan y mikïnin qarayarqan (Lüc. 10:38-42; Juan 12:1, 2). Y wakinqa kayäpunqankunawan atiendiyänampaqmi pëwan  viajayarqan (Lüc. 8:3). ¿Imanirtaq Jesusqa tsënö alli amïgukunayoq karqan? Porqui pëpis pëkunatam yanaparqan, yachanëpaq y alli amïgum karqan. Manam rurëta mana puëdiyanqankunataqa exigirqantsu. Jina jutsasapa kayaptimpis Jesusqa yanapayanqampitam alläpa agradecikoq. Awmi, amïgunkunaqa yamë y tranquïlu sientikunampaqmi yanapayarqan.

14, 15. (1) Alli amïguyoq kanapaqqa, ¿imatataq ruranantsik? (2) ¿Imanötaq alli amïgukunaqa yanapamantsik?

¹⁴ Alli amïguntsikkunaqa Jehoväta mana jaqipa sirwinapaqmi yanapamäshun. Alli amïguyoq kanapaqqa noqantsikpis alli amïgum kanantsik (Mat. 7:12). Jina wakinkunata yanapanapaq y masqa faltapakoqkunata yanapanapaqmi Bibliachöqa nimantsik (Efes. 4:28). Congregacionchö pillapis yanapanantsikta wanëkanqanman pensarishun. Itsa wakin wawqintsikkuna y panintsikkunaqa wayinkunapita yarqïta puëdiyantsu. ¿Manatsuraq pëkunapaq rantipakoq ëwarnin yanaparishwan? ¿O manatsuraq faltapakïkaq familiata vïviriswan yanaparishwan? Internetchö jw.org^® päginantsikta o JW Library^® aplicacionta utilicëta yacharninqa, congregacionchö wawqintsikkunata y panintsikkunata yanaparishun tsëchö yarqamoq yachatsikïkunata pëkunapis provechayänampaq. Tsënö wakinkunata yanaparninqa mas kushishqam sientikushun (Hëch. 20:35).

¹⁵ Jinamampis problëmakunapa pasanqantsik hörakunam amïguntsikkunaqa alläpa yanapamäshun. Tsënöllam Jobtapis amïgun Elihü yanaparqan, por ejemplu problëmankunapita  willaptinmi shumaq wiyarqan. Noqantsiktapis tsënöllam amïguntsikkunaqa, yarpachakïnintsikkunapita willashqaqa pacienciawan wiyamäshun (Job 32:4). Peru manam shuyaränantsiktsu imata ruranantsikpaq amïguntsikkuna decidiyänanta, sinöqa Bibliawan consejamanqantsikta chaskikurninmi alli pensëkur imatapis decidinantsik (Prov. 15:22). Y imëllapis pishipakurninqa rey Davidnömi kanantsik. Pëqa humildim karqan y amïgunkuna yanapayanqantam chaskikurqan (2 Sam. 17:27-29). Tsënö alli amïgukunaqa Jehoväpa qarëninmi kayan (Sant. 1:17).

16. Filipensis 4:6, 7 textu ninqannö, ¿imarëkurllataq yamë y tranquïlu këta puëdishun? Willakaramï.

¹⁶ (Leyi Filipensis 4:6, 7). ¿Imanirtaq Jehoväqa nimantsik Jesusrëkurlla yamë y tranquïlu këta qomanqantsikta? Porqui pensënintsikchö y shonquntsikchö yamë y tranquïlu sientikunapaqqa, Jehovä änikunqankunata Jesus cumplinampaq kaqmanmi confiakunantsik y alleq entiendinantsik. Por ejemplu Jesus wanunqanrëkur jutsantsikpita Dios perdonamanqantsikta musyanqantsikmi alläpa shoqamantsik (1 Juan 2:12). Jinamampis Diospa Gobiernunchö mandakoq karninmi, Satanasta y mana alli nunakunata chipyëpa ushakätsinqa. Tsëtam alläpa shuyarëkantsik (Is. 65:17; 1 Juan 3:8; Rev. 21:3, 4). Jina kë ushanan junaqkunachö Diospita yachatsikur sïguinapaqqa, Jesus yanapëkämanqantsikta musyanqantsikmi valorta qomantsik (Mat. 28:19, 20). Awmi, Jesus shoqamanqantsikmi valorta qomanqantsik y Satanasta y mana alli nunakunata ushakätsinanta shuyaranqantsikmi yamë y tranquïlu sientikunapaq yanapamantsik.

17. (1) ¿Imakunataq yanapamäshun yamë y tranquïlu sientikunapaq? (2) Juan 16:33 textu ninqannö, ¿imatataq lograshun?

¹⁷ Yachakunqantsiknöpis problëmakunapa pasanqantsik hörakuna yamë y tranquïlu këta tarinapaqqa, Jesus këkunata ruranqantam ruranantsik: 1) mana jaqipam Jehoväman mañakunantsik, 2) imëka problëmakunapa pasëkarnimpis Jehovä nimanqantsikta cäsukushun y gänas gänaslla yachatsikushun y 3) amïguntsikkuna yanapamänata permitishun. Tsëkunata ruranqantsikmi Diospa yamë kënin, tranquïlu y yamë sientikunapaq yanapamäshun. Jinamampis Jesusnömi imëka pruëbakunapa pasarnimpis alleq tsarakushun (leyi Juan 16:33).