Wawqi Winston, ¿imanötaq Diosnintsikpita yachakur qallarqëki?

Australia nacionpa Queensland markachömi winarqä y familiäkunaqa manam religiösutsu kayarqan. Chakrachö kawarninmi mana reqinqä nunakunawan höra höralla tinkuyaq kayä. 12 watayoq kanqäpitam, Diosnintsikpita yachakïta munarqä, tsëmi yanapëkamänampaq Diosnintsikman mañakurqä. Y tiempuwannam Adelaida markata trabajaq ëwakurqä, y 21 watayoq këkarmi vacacionchö këkarnin Sydney markachö Pamëlata reqirirqä. Pamëlaqa, israelismu britänicu nishqan juk grüpu religionpaqmi parlapämarqan. Tsë religiösukunaqa pensayaq britänicu nunakunaqa israelïtakunapita oqrakashqa kastakuna kayanqanta, unë Israelpa norti läduchö 10 kastakuna kayanqanta y Jesus shamunampaq 800 watakuna pishikaptin esclävupaq apakushqa kayanqantam. Adelaida markaman kutirirqa tsë asuntupaqmi juk trabajaq mayïta parlaparqä, pëqa Jehoväpa testïgukunawanmi Bibliata estudiar qallashqa kanaq. Y tsënö parlakuyanqächömi, Testïgukunapa creenciankunapita parlar qallëkuyarqä, y tsë höram cuentata qokurirqä wamra këkar mañakunqäta Diosnintsik wiyamashqa kanqanta. Kamakoq Diosnintsikpita y Gobiernumpitam yachakïkänaq kä. ¡Y cuentatam qokurirqä “alläpa chaniyoq perlasta” taririshqa kanqäta! (Mat. 13:45, 46).

Pani Pamëla, ¿qampis shipashllaraq këkarmi tsë perlasta ashirqëki aw? Willarayämë imanö tarinqëkita.

Nueva Gales del Surpa Coffs Harbour markanchömi kawarqä, y familiäkunaqa religiösum kayarqan. Teytäkuna y awilukunaqa israelismu britänicu nishqan grüpu religionpitam kayarqan. Menor kaq turïta, mayor kaq nanäta, atskaq prïmükunata y noqatam yachatsiyämarqan britänicu kastakunallata  Dios kuyanqanta. Peru tsënö kaptimpis noqaqa manam convencïdutsu karqä, ni Dios kuyamanqantapis manam segürutsu karqä. 14 watayoq këkarninmi anglicänu, bautista y adventista del septimu dia nishqan iglesiakunaman ëwarqä. Peru manam mëqampis Dios pï kanqantaqa yachatsiyämarqantsu.

Tiempuwannam Sydney markata familiäwan ëwakuyarqä, y Winston willakunqannöpis tsëchömi pëta reqirirqä, y religion asuntupaqmi parlayarqä. Tsënöpam Testïgukunawan Bibliapita yachakur qallëkurqan. Tsëpitaqa apatsimunqan cartamanqa mëtsika textukunatam churamoq. Tsëta churamuptinqa qallananllachöqa alläpam yarpachakurqä y hasta piñakurqämi. Peru ichikpa ichikpam cuentata qokurirqä rasumpa kaqllata nikämanqanta.

Y 1962 watachönam 18 watayoq këkarnin Adelaida markata ëwakurqa Winstonwan maslla tinkuyänäpaq. Y pëqa Thomas Slomanta y warmin Janïcetam nishqa kanaq pëkunapa wayinchö quedakunäpaq. Pëkunaqa Papüa Nueva Guinëachömi misionërunö yanapakushqa kayänaq. Y alläpam kuyayämarqan. Bibliapitam yachakur qallëkurqä y cuentatam qokurirqä Diosnintsikpita rasumpa kaqta yachakïkanqäta. Thomaswan Janïcem Jehoväta kuyanäpaq yanapayämarqan. Y Winstonwan casakurirqa, Jehoväta sirwirmi casädu vïdäkunata alläpa shumaq qallayarqä. Tsënö kawakur qallayanqämi yanapayämashqa problëmapa pasarnimpis tariyanqä alläpa chaniyoq perlasta maslla valorayänäpaq.

Wawqi Winston, ¿imanötaq kayarqëki Jehoväta sirwir qallayanqëki watakuna?

Casakuriyanqäpita ichik tiempullatam, Jehoväqa ‘jatun punkuta kichapayämaq’ cuenta maslla sirwiyänäpaq yanapayämarqan (1 Cor. 16:9). Tsë punkuta rikätsiyämaq cuentam, wawqi Jackwan warmin Roslynqa animayämarqan precursor regular kayänäpaq, y pitsqa watapam alläpa shumaq yanapakuyarqä. Tsë witsanqa, wawqi Jackqa congregacionta watukaqmi karqan, tsëmi ichikllan congregacionnïkunata watukamurqan. Tsëpitanam 29 watayoq këkaptï, sur läduchö Pacïficu islakunachö congregacionkunata watukayänäpaq invitayämarqan. Tsë läduchö congregacionkunataqa Fiyi sucursalpitam atiendiyaq. Kiribati, Nauru, Niue, Samöa, Samöa Norteamericäna, Tokelau, Tonga, Tuvalu y Vanuätu islakunachö këkaq congregacionkunatam watukayarqä. Kananqa Australasia sucursalchömi wawqi Jackwan yanapakuyä.

Tsë watakunaqa, mas karu islakunachö täraq nunakunaqa manam Testïgukunaman confiakuyaqtsu, tsëmi imatapis alkäbulla kayänä karqan (Mat. 10:16). Congregacionkunachöqa wallkaqllam Testïgukuna kayaq, y höraqa manam wakinqa posadatsiyämëta puëdiyaqtsu. Tsëmi posadatsiyämänampaqqa höraqa mana Testïgu kaqkunata rogakuyaq kayä. Y allim kayaq y imëpis posadatsiyämaqmi.

Wawqi Winston, ¿qamtaqa traduccionchö trabajëmi gustashunki aw? ¿Imanöpataq gustashurqëki?

Tsë witsanqa Tonga nacionchö cristiänu mayintsikkunaqa, tongänu idiömachö juk ishkë tratädukunallata y follëtukunallatam katsiyaq. Y nunakunata Bibliapita yachatsiyänampaqqa La verdad que lleva a vida eterna nishqan librutam utilizäyaq y tsëqa ingles idiömallachömi karqan. Y juk kutim anciänukunapaq escuëla karqan, y tsëchömi inglesta yachaq kimaq anciänukuna tsë libruta tongänu idiömaman traduciyarqan. Y traduciyanqantanam warmï Pamëla mäquinawan escribirqan y tsëpitanam imprimiyämunampaq Estädus Unïdus sucursalman apatsiyarqan. Cäsi ishkë killallatam tongänu idiömachö tsë libruqa yarqaramurqan. Tsë libruqa alli traducishqa mana karpis, tongänu idiömata parlaq mëtsikaq nunakunatam yanaparqan Diospita rasumpa kaqta yachakuyänampaq. Manam noqa ni warmï Pamëlapis traductortsu kayä, peru tsë libru rurëchö yanapakuyanqämi alläpa gustarayämarqan.

Pani Pamëla, Australiapitaqa, ¿tsë islakunachö imakunataq jukläya karqan?

Alläpa jukläyam karqan, wakin sitiukunachöqa alläpam chuspikuna kaq, alläpam achachan, humedämi kaq, rätakunam kaq, tukï cläsi qeshyakunam kaq y höraqa mikïnïkunapis pisheqmi. Peru tsënö kaptimpis dia ushariptinqa, fale nishqan  wayïkunapita lamarta rikarmi kushishqa sientikuyaq kayä. Pampa killa kanqan hörakunanam, palmërakunata rikäyaq kayä y yaku rurinchö killatapis rikäyaq kayä. Tsë hörakunam Diosnintsik imanö kanqanman pensayaq kayä y mañakuyaq kayä. Tsëmi yanapayämaq alli kaqllamanna pensayänäpaq.

Wamrakunataqa alläpam kuyayaq kayä y alläpam asitsiyämaq. Juk gringu nunata rikëkurqa imanö kanqantam musyëta munayaq. Juk kutim Niue islaman chäriyaptï juk wamraqa nunäpa rikranta yatapar qallëkurqan y kënömi nirirqan: “Kë plumëkikunaqa alläpa shumaqmi”. Tsë wamraqa manam imëpis rikashqatsu kanaq rikrachö aqtsakuna kanqanta, tsëmi imanö nitapis mana puëdirnin plumëkikuna nirirqan.

Mëtsikaq nunakunam alläpa waktsa kayaq, y tsëta rikarqa alläpam llakipäyaq kayä. Shumaq sitiukuna kaptimpis, qeshyëkaq nunakunataqa manam postakunachö alli atiendiyantsu, y upuyänampaq limpiu yakupis alläpam pisheq. Tsënö kaptimpis cristiänu mayintsikkunaqa manam alläpaqa yarpachakuyaqtsu. Y familiankunawan juntu këkäyanqanta y Jehoväta adorayänampaq juk wayi kanqampitam masqa kushikuyaq. Tsënö kayanqanmi yanapayämarqan mas importanti kaqta mana qonqayänäpaq y kapayämanqankunallawan contentakuyänäpaq.

Pani Pamëla, qampaqqa manachi fäciltsu höraqa karqan cocinakunëkipaq y limpiu yakutapis ashinëkipaq, ¿imanötaq ruraq kanki?

Papänïtam alläpa agradecikü wamra kanqäpita yachatsimanqampita. Pëmi yachatsimarqan tullpachö cocinakïta y ichik kapayämanqanllata tinkutsita. Juk kutim Kiribati islata nunäwan ëwayarqä y tsëchömi päja tëchuyoq, bambü qerupita rurashqa ichikllan wayillachö quedakuyarqä. Y cocinakunäpaqqa patsatam uchkurirqä y cöcupa qaranwanmi cocinakurqä. Y yakumanqa juk pözumanmi ëwarqä, y tsëchöqa atska warmikunam yakuta jorqayänampaq fïlata rurëkäyänaq, tsëmi noqapis fïlaman churakärirqä. Yakuta jorqayänampaqqa juk läta balditam cäsi ishkë metrunö qerupa puntanman waskawan warkuyaq. Y turnunkuna chäriptinqa, imëka pescaqnömi, tsë lätata qeruwan jitarkuyaq y yakuman hundikarkuptinqa rasllam sutarkayämoq. Fäcilnöllam kaq, peru turnö chäramuptinqa manam jorqamïta puëdirqätsu, porqui manam läta jitëta yacharqätsu. Atska kutim jitarqä, peru lätaqa manam yakuman hundikarqantsu. Llapan warmikunam asipäyämarqan, peru asikur ushariyaptinmi juk warmiqa imanö jitëta yachatsimarqan. Tsë islachö nunakunaqa allim kayaq, y imëpis yanapayämaqmi.

¿Ishkëkitam gustariyäshurqëki tsë islakunachö yanapakïqa aw? Willarayämë, ¿imatataq masqa yarparäyanki?

Wawqi Winston: Wakin costumbrinkunata entiendiqa manam fäciltsu noqakunapaq karqan. Këllata willariyashqëki, cristiänu mayintsikkuna mikïta invitayämarqa kikinkunapaq mana quedatsikushpam llapanta qoykayämaq, tsëmi qallananchöqa llapanta mikukurkuyaq kayä. Porqui manam musyayarqätsu pëkunapaqpis katuyänä costumbri kanqanta, peru musyarirqa katuyaqnam kayä. Tsënö mana allita rurëkäyaptïpis cristiänu mayintsikkunaqa entiendiyämaqmi. Cada 6 killata congregacionninkunaman visitaq kutiyaptïqa, alläpam kushikuyaq. Porqui tsë witsankunaqa juk congregacionchö cristiänu mayintsikkunawan manam tinkuyaqllatsu, y noqakunallawanmi masqa tinkuyaq.

Jina congregacionkunata watukayanqäqa yanapakurqanmi Testïgukunata nunakuna maslla reqimänantsikpaq. Atskaq vecïnukunam pensayaq tsë markachö cristiänu mayintsikkunaqa religionninkunata kikinkunalla patsätsikushqa kayanqanta. Peru juk nacionpita nunakuna congregacionkunata watukayanqäta rikarninmi, Testïgukunaqa juk nacionkunachöpis kayanqanta entiendiyaq y alläpam espantakuyaq.

Pani Pamëla: Kiribati islachö juk takshalla congregacionchö pasakunqantam imëpis qonqätsu. Itinikai Matera jutiyoq turiqa anciänum karqan, y alli atiendishqa kayänäta munarmi pëqa imëkata ruraq. Juk kutim juk canastachö jukllëlla runtuta o ruruta apamunaq, y “këtam qamkunapaq apamurqö” nirmi qorayämarqan. Tsë witsanchö wallpapa runtuta mikurqa, rïcukunapa mikunanta  mikushqanömi sientikuyaq kayä. Tsë turi tsënö atiendiyämanqantaqa manam imëpis qonqätsu.

Pani Pamëla, ¿tsëpita tiempuwanqa qeshyaq këkarmi wamrëkita oqrarirqëki aw? ¿Imataq yanapashurqëki tsë llakikïta vencinëkipaq?

Sur lädu Pacïficu islakunachö këkarmi, 1973 watachö qeshyaq këkanqäta cuentata qokurirqä. Tsëmi Australiata kutikuyänäpaq decidiyarqä, peru chusku killallatam wamräta oqrarirqä. Winstonqa alläpam llakikurqan. Atska tiempupam noqapis llakirqä, tsëmi alläpa mana llakikunäpaq 2009 wata 15 de abril Atalaya revistachö “Preguntas de los lectores” nishqan yachatsikïraq masqa yanapamarqan. Tsëchömi kënö tapukurqan: “Si una criatura muere en el vientre materno, ¿volverá a la vida en la resurrección?”. Tsëpitanam nirqan tsë asuntutaqa Jehoväna rikänampaq kaqta, pëqa imëpis allita ruraq kanqanta, y kë munduchö llapan pasamanqantsikkunata y “Diablupa rurëninkunata chipyëpa ushakätsinampaq” Jesusta churashqa kanqanta (1 Juan 3:8). Y tsë yachatsikïmi yanapayämarqan Jehovä qomanqantsik “alläpa chaniyoq perlasta” maslla valorayänäpaq. Rasumpa kaqchöqa, Diospa Gobiernun mana kaptinqa manachi ni imatapis shuyarashwantsu.

Wamräkuna wanurinqampitaqa, yapëmi llapan tiempükunawan yanapakur qallëkuyarqä. Juk ishkë killakunapam Australia Betelchö yanapakuyarqä, y tsëpitanam congregacionkunata yapë watukayarqä. Nueva Gales del Surpa y Sydneypa markankunachö chusku watapa yanapakïkäyaptïnam, 1981 watachö Australia sucursalchö yanapakuyänäpaq invitayämarqan, tsë sucursaltaqa tsë tiempuchöqa tsënömi reqiyaq. Y tsëchömi kananyaq yanapakïkäyä.

Wawqi Winston, ¿sur lädu Pacïficu islakunachö pasayanqëkikuna yanapashunkiku Australasiachö sucursalta rikaqnö yanapakïkanqëkichö?

Awmi, alläpam yanapaman. Qallananchöqa Australiapitam Samöata y Samöa Norteamericänata atiendiyaq. Tsëpitanam Nueva Zelanda sucursalta Australia sucursaltawan juntariyarqan. Y kananqa Australasia sucursalpitanam Cook, Niue, Nueva Zelanda, Samöa, Samöa Norteamericäna, Timor Oriental, Tokelau y Tonga islakunata y Australiatapis atiendiyan. Tsë markakunamanqa sucursalpitanam representantinö atska kutipa visitakoq ëwarqö. Tsë islakunachö cristiänu mayintsikkunawan juntu sirwiyanqämi alläpa yanapaman, Betelpitana pëkunata yanapanäpaq.

Kë llapan pasayanqäpitaqa këllata niriyashqëki: manam mayor nunakunallatsu Diospita rasumpa kaqta yachakïtaqa munayan, sinöqa hasta jövinkunapis munayanmi. Tsëmi mëtsikaq jövinkuna familiankuna mana interesekäyaptimpis “alläpa chaniyoq perlasta” ashiyan (2 Rey. 5:2, 3; 2 Crön. 34:1-3). Y Jehoväqa rasumpam kuyamantsik, porqui llapan nunakuna, mayorkuna y jövinkunapis salvakuyänantam munan.

Pamëlawan Diosnintsikpita yachakur qallayanqäpitaqa 50 watapitapis masnam pasarishqa. Y tsë witsanqa manam pensayarqätsu tsë yachakuyanqäwan imanö yanapakuyänäpaq kaqta. Convencïdum këkäyä, Diosnintsikpa Gobiernumpita rasumpa kaqta musyëqa alläpa chaniyoq perlasnö kanqanta. Y tsëtaqa manam imanöpapis oqrëta munayätsu.