Tsëllaraq yurikushqa llullu wamrapaqqa, tsë hörachö mamänin imata ruranqanmi alläpa precisan. Porqui tsë hörachö mamänin wamranta kuyanqanta rikätsiptinmi, tsë wamraqa alli y sänu winanqa. *

¿Imataq mamakunata yanapan tsëllaraq yurishqa wamrankunata kuyaparnin shumaq cuidayänampaq? Juk revistachömi Jeannette Crenshaw jutiyoq profesöra nirqan, juk warmipa wamran yurikaptin oxitocina hormöna pëchö miranqanta y rikaptin, shullpapaptin y chichiptin kuyanqanta rikätsinampaq tsë yanapanqanta. Jina tsë hörallachöshi, mamampa cuerpunchöqa juk mas hormöna formakan, tsëshi “yanapan wamranta kuyanampaq” y mas juntu kayänampaq. ¿Imanirtaq tsëqa alläpa precisan?

¿Imanirtaq juk mama wamranwan kuyanakuyanqanta rikätsinakuyan? Porqui Kamakoqnintsik Jehovämi tsënö sentimientuyoqta kamashqa. * Rey Davidmi yurikunqampita y mamampa cuidädunchö següru sientikunqampita Diosta agradecikurqan. Tsëmi Jehoväta kënö mañakurqan: “Mamänïpa pachanchö kanqäpita patsëmi Diosnï karqunki” (Salmus 22:9, 10).

KËMAN PENSARI: Juk mama wamranta shumaq atiendinampaq y cuidanampaq sentimientuyoqta Diosnintsik kamanqanmi rikätsimantsik, Pëqa cada ünupaq yarpachakunqanta (Hëchus 17:29).

Jesusqa Kamakoqnintsikta alleq reqirmi kënö nirqan: “¿Manaku ishkë pichïsankataraq juk mana alläpa väleq qellëllapaq rantikuyan? Tsënö kaptimpis, Teytëkikuna mana musyëkaptinqa manam ni jukllëllapis patsaman ishkirintsu. Peru qamkunapanäqa hasta peqëkikunachö aqtsëkikunapis llapanmi yupashqa këkan. Tsënö këkaptinqa, ama mantsakuyëtsu, porqui qamkunaqa mëtsika pichïsankakunapitapis masmi väliyanki” (Mateu 10:29-31).

Wallkaqllam pishqukuna imanö kayanqantaqa shumaq rikapäyan y wanurir patsaman ishkeqkunatanäqa manam cäsupäyantsu. Peru ciëluchö këkaq Teytantsikqa cada ünutam rikëkan. Tsëtsika pishqukuna këkarpis, Diosnintsikpaqqa noqantsikmi mas väleq kantsik. Tsëmi Pëqa rikëkäshunki y qampaqmi alläpa yarpachakun.

 Bibliam kënö nimantsik:

• “Jehoväpa nawinkunaqa entëru patsapam rikarëkan pëllata llapan shonqunkunawan kuyaqkunata kallpanwan yanapanampaq” (2 CRÖNICAS 16:9).

• “Jehoväpa nawinkunaqa alli ruraqkunatam rikarëkan, y rinrinkunanam pëkuna mañakuyanqanta wiyarëkan” (SALMUS 34:15).

• “Rasumpa kuyakoq kanqëkipitam alläpa kushishqa kashaq, llakikïnïtam rikarqunki y musyarqunkim imanir almä llakishqa këkanqantapis” (SALMUS 31:7).

¿Yanapamantsikku noqantsikpaq Diosnintsik yarpachakunqanta y shumaq cuidamanqantsikta musyanqantsik? Awmi. Inglatërrapita Hannahm, * kënö cuentakun:

“Jehovä mana kuyamanqanta y markäkïnï pishiptin mañakunqäta mana contestamanqantam pensarqä. Imapaqpis mana väliptï castiguëkämanqanta y mana cäsumanqantam pensarqä. ‘Qonqëkamashqachi’ nirqämi”.

Peru kananqa, Jehovä alläpa kuyanqanta y pëpaq alläpa yarpachakunqantam Hannahqa cuentata qokushqa. ¿Imataq yanaparqan cuentata qokunampaq? Kënö nirmi cuentakun: “Manam rastsu cuentata qokurirqä. Pasaq watakunallachöraqmi Jesus wanunqampita Bibliawan yachatsikayämurqan, tsëta wiyanqämi shonqüyaq chärirqan y Jehovä kuyamanqantam cuentata qokurqä. Y mañakunqäta Dios contestamunqanta rikarmi, alläpa kuyamanqanta cuentata qokur waqaq kä. Y Bibliapita yachakunqä y cristiänukunapa reunionninkunaman ëwanqämi yanapamashqa Jehovä Diosta mas reqinäpaq y noqapaq yarpachakunqanta cuentata qokunäpaq. Kananqa cuentatam qokurqö, Jehoväqa kuyamantsikmi, yanapamantsikmi y cuidamënintsiktam munan”.

¡Imanö shumaqmi tsëta musyëqa! Peru ¿Diosnintsikqa mana kaqpaqku churan imanö sientikunqantsikta? Y ¿entiendimantsiktsuraq? Qateqnin yachatsikïchömi tsëpaq parlanqa.