Patmus nishqan islachö prësu këkaptinmi, Juanta Jesus 16 visionkunata rikätsirqan. Tsë visionkunachömi rikarqan jutinta Jehovä imanö respetatsinqanta, Gobiernun imanö qallanqanta y patsachö y ciëluchö munënin imanö rurakanqanta.

Juk visionchömi rikarqan chipapäkïkaq gobernar täkunanchö Jehovä tëkaqta. Y räyukunanö tsëchö atsikyaqta y sinchipa pashtaqtam rikarqan. Y tsë gobernar täkunapa jiruroqninchömi yulaq röpashqa y örupita corönarishqa 24 gobernaqkuna këkäyarqan. Pëkunam Jehoväpa puntanman kukïkurnin Jehoväta adorayarqan. Juk visionchönam tukïläya nacionkunapita, markakunapita y idiömakunapita Jehoväta adoraq mëtsika nunakunata rikarqan. Pëkunapaqa Achkas cuenta Jesusmi mitseqninkuna, y kawatsikoq yakumanmi pëkunata pushan. Y Juk visionchönam, 24 gobernaqkunawan Jesus gobernar qallaqta rikarqan. Y juk mas visionchönam mantsanëpaq culebra cuenta Satanaswan y supëninkunawan Jesus pelyëkaqta y llapankunata ciëlupita patsaman jitarkoqta rikarqan.

 Tsëpitanam Juanqa rikarqan Achkaswan 144.000 nunakuna Sion jirkachö këkäyaqta. Jina juk angeltam rikarqan, “Diosta respetayë y precisaqpaq churayë” nirnin entëru patsapa volëkaqta.

Juk visionchönam Armagedon guërrata rikärirqan. Tsë guërrachömi Satanaspa munëninta ruraq nunakunata Jesuswan tröpankuna venciyarqan. Y ultimu kaq visionchönam, ciëluchö y patsachö llapan shumaq këkaqta, y llapankuna juntu y yamë këkäyaqta rikarqan. Jina rikarqanmi Satanasta y pëpa munëninta ruraqkunata Jesus ushakätseqta. Ciëluchöpis y patsachöpis llapankunam Jehoväpa jutinta alläpa respetayarqan y Jehovällatana adorayarqan.