Ri carta rech Judas 1:1-25
1 In in Judas, rajchak ri Jesucristo y rachalal ri Santiago, tajin kintzʼibʼaj bʼi wariʼ chiwe, ri ix chaʼtal rumal ri Dios, ri Qatat. Rumal che kixuloqʼoqʼej y ix utasom apanoq rech kixkʼojiʼ rukʼ ri Jesucristo:
2 Are ta bʼaʼ ri Dios ktoqʼobʼisan más iwach, kyoʼw más jororibʼal chiwe y más ta bʼaʼ chixuloqʼoqʼej.
3 Loqʼalaj taq wachalal, xwaj xintzijon apan iwukʼ chrij ri qa salvación kuya ri Dios, pero xwilo che are rajawaxik kintaʼ apan jun toqʼobʼ* chiwe rech kikoj ichuqʼabʼ che uchajixik ri ikojonik chrij ri Dios, ri xyaʼ kan chke ri e chaʼtalik.
4 Kinbʼij wariʼ chiwe rumal che iwilom taj che e kʼo jujun achijabʼ e okinaq chixoʼl, ri xbʼix kan ojer pa ri utzij ri Dios che kqʼat na tzij pa kiwiʼ rumal ri kkibʼano. E achijabʼ ri nim ta kkil wi ri Dios, kkibʼan kʼixbʼalalaj taq jastaq* rumal che kkichomaj che kkuyutaj ri kimak rumal ri nimalaj rutzilal ri Dios. Y keniman ta che ri Qajaw Jesucristo ri xojloqʼowik.
5 Paneʼ ix qas iwetaʼm chik, kwaj kinnaʼtajisaj apan chiwe are chi’ ri Jehová* xresaj lo jun tinamit pa Egipto, y are chiʼ xqʼax ri tiempo xusachisaj kiwach ri xkikubʼsaj ta kikʼuʼx chrij.
6 Ri ángeles che xkibʼan ta chi ri kichak, xaneʼ xkiya kan ri kikʼolbʼal ri rajawaxik kekʼojiʼ wi. E uximom chi pa jun nimalaj qʼequmalil rech kqʼat tzij pa kiwiʼ rumal ri Dios.
7 Xuqujeʼ, Sodoma y Gomorra y ri nikʼaj chi tinamit ri e kʼo chkinaqaj, xkʼajisax kiwach rukʼ qʼaqʼ ri kchup ta wi, rumal che xkibʼan tzʼilalaj taq makaj* y ri itzel taq kirayinik ri yaʼtal ta ubʼanik. Ri xkikʼulmaj are jun ejemplo chqawach oj rech kqabʼan ta qe ri xkibʼano.
8 Paneʼ jeriʼ, ri achijabʼ riʼ ronojel tiempo xaq xiw kechoman chrij itzel taq jastaq. Tajin kkitzʼilobʼisaj ri ki cuerpo ri e areʼ y ri kech ri nikʼaj chik, nim ta kkil wi ri taqanik kʼo pa uqʼabʼ ri Dios y kʼax kechʼaw chkij ri nim keʼil wi rumal.
9 Tekʼuriʼ are taq ri Miguel ri arcángel xkiyaj kibʼ rukʼ ri Itzel* chrij ri u cuerpo ri Moisés. Ri Miguel xuqʼat ta tzij puwiʼ ri Itzel pa rech wi, xaneʼ xubʼij che: «Are ri Jehová chqʼatow tzij pawiʼ».
10 Ri achijabʼ riʼ kʼax kechʼaw chrij ronojel ri jastaq ri kkichʼobʼ taj. Y ri jubʼiqʼ ketaʼm kkichʼobʼ taj, e junam kukʼ chikop kechoman taj, xa más tajin kkibʼan kʼax che kibʼ.
11 Kʼax kech, rumal che kibʼanom ke ri xubʼan ri Caín, kkirayij pwaq junam rukʼ ri Balaam, keniman ta chke ri achijabʼ ri kʼo taqanik pa kiqʼabʼ, rumal laʼ ksachisax na kiwach junam rukʼ ri xbʼan che ri Coré.
12 Ri achijabʼ riʼ kewaʼ iwukʼ pa ri nimaʼq taq waʼim* kbʼanik, pero e junam kukʼ nimaʼq taq abʼaj ri e kʼo chuxeʼ ri jaʼ, ri keqʼalajin taj. E junam kukʼ ajyuqʼabʼ che kʼo ta kikʼixbʼal rumal che xaq xiw kechoman chbʼil kibʼ. E junam rukʼ sutzʼ ri kʼo ta jaʼ chupam ri kekʼam bʼi jewaʼ jeriʼ rumal ri kaqiqʼ. E junam rukʼ cheʼ ri kewachin ta pa ri ki tiempo, e kaminaq chik y e bʼoqom chik.
13 E junam rukʼ olas ri kekikʼaqaʼ kan tzʼil chuchiʼ ri mar rumal che kʼo ta kikʼixbʼal. E chʼumil kʼo ta kibʼe e yaʼom pa jun nimalaj qʼequmalil rumal ri Dios.
14 Ri Enoc, ri séptimo uqʼabʼ taq rachalaxik ri Adán, xuqujeʼ xchʼaw chkij ri achijabʼ riʼ are chiʼ xubʼij: «¡Chiwilampeʼ!* Ri Jehová petinaq kukʼ ri kʼiʼalaj* taq u ángeles.
15 Rech kuqʼata tzij pa kiwiʼ juntir y rech kukʼutu ri tzʼilalaj taq jastaq ri xkibʼan ri achijabʼ ri nim ta xkil wi, kubʼan na wariʼ chke rumal ri tzʼilalaj taq makaj xkibʼano y rumal che kʼax xechʼaw chrij».
16 Ri achijabʼ riʼ xaq kechʼachʼatik,* kekikot ta rukʼ ri kʼo kukʼ y xaq xiw kkibʼan ri kkaj. Kkibʼij tzij rech nim keʼilik y kkiya kiqʼij ri e nikʼaj chik xa rumal che kʼo kkaj chke.
17 Rumal laʼ, loqʼalaj taq wachalal, chnaʼtaj chiwe ri xkibʼij kan ri rapóstoles ri Qajaw Jesucristo.
18 Ri e areʼ amaqʼel xkibʼij: «Pa ri kʼisbʼal taq qʼij kekʼojiʼ na winaq ri xaq kkitzeʼj uwach ri utz, xaq xiw kkibʼan ri itzel taq kirayinik».
19 E are waʼ ri kkijach kiwach ri e kʼo pa ri congregación; e chikop taq achijabʼ che kʼo ta ri espíritu santo pa kiwiʼ.
20 Pero ri ix loqʼalaj taq wachalal chikubʼsaj más ikʼuʼx chrij ri Dios. Are chiʼ kibʼan orar chiyaʼ bʼe che ri espíritu santo kukʼam ibʼe,
21 rech ri Dios kuya ta kan iloqʼoqʼexik y kiweyeʼj che kutoqʼobʼisaj iwach ri Qajaw Jesucristo rech kiriq ri kʼaslemal kʼo ta ukʼisik.
22 Xuqujeʼ kiya ta kan kitoʼik ri ubʼanom kebʼ kikʼuʼx;
23 cheʼitoʼ rech ksachisax ta kiwach.* Mitanabʼaʼ utoqʼobʼisaxik kiwach ri e nikʼaj chik ri e makuninaq, pero chichajij iwibʼ ix are chiʼ keʼitoʼ. Itzel chiwilaʼ wi ri kimak.*
24 Ri Dios kixutoʼo rech kixqaj ta pa mak, ko kixtakʼiʼk, ix chʼajchʼoj y sibʼalaj kixkikot chuwach.
25 Xaq xiw ri areʼ qa Dios, ri xojubʼan salvar rumal ri Qajaw Jesucristo. Amaqʼel chyoq uqʼij ri qa Rey, ri kʼo u poder y ri kʼo taqanik pa uqʼabʼ: ojer, kamik y pa taq ri qʼij petinaq. Amén.
Notas
^ Pa nikʼaj chi lugar jewaʼ kbʼix che: «jun utzil».
^ Pa griego kbʼix asélgueia che. Chawilaʼ ri diccionario.
^ Chawilaʼ ri tema A5.
^ Chawilaʼ ri diccionario.
^ O «Diablo». Chawilaʼ ri diccionario.
^ O «waʼim re ukʼutik loqʼoqʼebʼal».
^ Chawilaʼ ri diccionario.
^ O «miles».
^ Pa nikʼaj chi lugar jewaʼ kbʼix che: «xaq kkichʼiq kibʼ», «xaq kkichʼer kibʼ».
^ Pa ri idioma griego, «cheʼiwesaj chuwach ri qʼaqʼ».
^ Pa ri idioma griego, «Itzel chiwilaʼ ri katzʼyaq ri kitzʼajom rumal ri kimak».
