Ri urox carta xutzʼibʼaj ri Juan 1:1-14

  • Ri xubʼan ri Juan che umajixik ri u carta y ri u oración xubʼano (1-4)

  • Ri qachalal utz kechʼaw chrij ri Gayo (5-8)

  • Ri Diótrefes nim kubʼan che ribʼ (9, 10)

  • Juntir utz kechʼaw chrij ri Demetrio (11, 12)

  • Ri Juan kraj kbʼe che uchʼabʼexik ri Gayo y kutaq bʼi saludos (13, 14)

1  In waʼ ri tataʼ, kintzʼibʼaj bʼi wajun carta che ri Gayo ri sibʼalaj kwaj, y loqʼ chkiwach ri qachalal. 2  Loqʼalaj wamigo, kinbʼan orar pawiʼ rech kariq utzilal pa ri akʼaslemal y rech utz awach je jas ri abʼanom chanim y chachajij awibʼ. 3  Sibʼalaj xinkikotik are chiʼ xeʼul* jujun qachalal wukʼ y xkibʼij chwe che ayaʼom ta kan ubʼanik pa ri akʼaslemal ri qastzij ri xawetaʼmaj chrij ri Dios. 4  Sibʼalaj kinkikotik* are chiʼ kinto che ri e walkʼwal amaqʼel kinimam ri qastzij chrij ri Dios. 5  Loqʼalaj wamigo wetaʼm che ri at sibʼalaj tajin kakoj achuqʼabʼ che kitoʼik ri qachalal, paneʼ awetaʼm ta kiwach. 6  Ri e qachalal riʼ, sibʼalaj utz kechʼaw chawij chkiwach ri congregación, kkibʼij che sibʼalaj katloqʼoqʼenik. Rumal laʼ kintaʼ jun toqʼobʼ* chawe, chayaʼ ri rajawaxik chke rech kʼo juntir ri kajwataj chke pa ri ki viaje. Rumal che are waʼ ri kraj ri Dios kabʼano. 7  Ri e areʼ e elenaq bʼi che utzijoxik ri ubʼiʼ ri Dios, y kʼo ta kkitaʼ chke ri winaq ri kekojon ta chrij ri Cristo. 8  Rumal laʼ ri oj rajawaxik utz kqabʼan che kikʼulaxik ri qachalal riʼ, kqaya ronojel ri kajwataj chke, jeriʼ tajin kojtobʼanik rech ktzijox más ri qastzij chrij ri Dios. 9  Xintzʼibʼaj bʼi jun carta che ri congregación, pero ri Diótrefes nim ta kril ri kqabʼij, rumal che ri areʼ nim kubʼan che ribʼ. 10  Rumal laʼ we kinbʼe chilaʼ kinbʼij na ubʼeʼal ronojel ri tajin kubʼano, ri areʼ tajin kumol tzij chqij y itzel kchʼaw chqij. Y xaq xiw ta laʼ kubʼano, xaneʼ xuqujeʼ keʼukʼulaj ta ri qachalal y utz ta keril ri kekʼulan ri e qachalal rumal laʼ kraj keresaj bʼi pa ri congregación. 11  Loqʼalaj wamigo, kabʼan ta awe at ri itzelal xaneʼ are chabʼanaʼ ri utzilal. Rumal che ri winaq ri kubʼan ri utz tajin kresaj uwach ri Dios. Y ri winaq ri kubʼan ri utz taj xa retaʼm ta uwach ri Dios. 12  Juntir ri qachalal utz kechʼaw chrij ri Demetrio y ri areʼ qas ukʼutum che kubʼan pa ri ukʼaslemal ri qastzij ri xretaʼmaj chrij ri Dios. Xuqujeʼ ri oj qas qilom che ri areʼ are jun utzalaj achi, y ri at awetaʼm che qastzij ri tajin kqabʼij. 13  Kʼo kʼi na kwaj kinbʼij chawe, pero kwaj taj che xa chuwach jun wuj kintzʼibʼaj wi bʼik. 14  Xaneʼ kwaj kinwilaʼ awach y kintzijon awukʼ. Chachajij bʼaʼ awibʼ.* Ri e qamigos kkitaq bʼi a saludo. Y chayaʼ ri nu saludo chke ri qamigos chkijujunal.

Notas

^ Pa nikʼaj chi lugar jewaʼ kbʼix che: «xeʼeqaj».
^ O weneʼ «Sibʼalaj kinmaltyoxinik».
^ Pa nikʼaj chi lugar jewaʼ kbʼix che: «jun nimalaj utzil».
^ Pa ri idioma griego, «Chkʼol bʼaʼ jamaril awukʼ».

Copyrights for this publication