Pedani iei kahnimw ehu me dohki sang Serusalem mwail riau. (Sohn 11:18) Mwekid kansensuwed ehu wiawi wasao wihk kei mwohn Sises ketin pwoula. Emen kompoakepahn Sises ko, Lasarus, soumwahuda oh mehla ni arail sohte kasik.

Ni Sises eh mwahngihada rohng wet, e ketin mahsanihong sapwellime tohnpadahk ko me Lasarus wie memeir oh e kupwurki ketila pwehn pangenda. (Sohn 11:11) Ahpw tohnpadahk ko sohte wehwehki dahme e mahsanih, eri Sises ketin mahsanihong irail ni sansal: “Lasarus melahr.”​—Sohn 11:14.

Rahn pahieu mwurin arail sarepedi Lasarus, Sises ketin lella Pedani oh song kansenamwahwih Marda, rien Lasarus liho. Marda patohwanohng Sises: “Ma komw ketikette met, riei ohlo sohte pahn mehla.” (Sohn 11:17, 21) Sises mahsanih: “Ngehi me mour sapahl oh Sounkomour. Mehmen me pwoson ie, mehnda ma e pahn mehla, ahpw e pahn mour.”​—Sohn 11:25.

Pwehn kasalehda me mahsen pwukat uhdahn mehlel, Sises eri ketila ni sousowo oh kapitie laudida mahsanih: “Lasarus, pedoido!” (Sohn 11:43) Ohl me melahro ahpw pedoido oh koaros me kilang dahme wiawi uhdahn pwuriamweikihla.

Mwohn met, Sises ketin kaiasada aramas mehla riemen. Ni ehu ahnsou ko, e ketin kaiasada kisin serepein men, nein Sairus. Mwohnte e ketin kaiasada serepeino, e pil mahsanih me serepeino wie memeir.​—Luk 8:52.

Ni mehla en Lasarus oh nein Sairus serepeino, tehk me Sises ketin kapahrekihong mehla meir. Met konehng. Dahme kahrehda? Ni emen eh memeir, e sohla kin kehn wasa. Met pahrekiong emen eh kommoal sang medek oh lokolok. (Eklesiasdes 9:5; menlau kilang koakon  “Mehla Rasehng Meir Kelik.”) Sapwellimen Sises tohnpadahk ko mahso wehwehki mwahu ia uhdahn irair en me melahr kan. Ehu dikseneri koasoia: “Ong sapwellimen Sises tohnpadahk ko mehla rasehng emen eh meirla, oh sousou iei wasahn  kommoal . . . ong irail me mehla ni pwoson.” *—Encyclopedia of Religion and Ethics.

E kin kamweitkitailla ni atail ese me me melahr kan wie memeir nan sousou oh sohte wie lokolok. Eri, ni atail ese dahme kin wiawi ahnsou me emen mehla, kitail sohte anahne masak.

Kitail kin perenki meir mwahu ni pwong kan, ahpw kitail sohte men meir kohkohlahte. Koapworopwor dahieu kitail ahneki me me melahr akan me memeir nan sousou pahn pwurehng mourda, duwehte me wiawihong Lasarus oh nein Sairus serepeino?

Sohp idek peidek ehu ni eh pehm me e pahn kereniong mehla. “Ma aramas emen pahn mehla, e kak pwurehng mourda?”​—Sohp 14:14.

Sohp sapengala eh peideko ni eh patohwanohng Koht Wasa Lapalahpie: “Komw pahn ketin malipe ie, I ahpw pahn patohwan sapeng, komw ahpw pahn kupwurperenkiniehda, wiepen nin limomwiet.” (Sohp 14:15) Sohp uhdahn kamehlele me Siohwa uhdahn kupwurki rahno me E pahn ketin kaiasada Sapwellime ladu lelepek kan. Ia duwe, Sohp kasikasik mehkot me sohte kak wiawi? Uhdahn soh!

Sises eh ketin kaiasada me melahr kan kin kadehdehda mwahu me Koht ketikihong ih manaman pohn me melahr kan. Ni mehlel, Paipel mahsanih me Sises sapwellimaniki “manaman ong mehla.” (Kaudiahl 1:18) Eri, duwehte Sises eh sapwellimaniki manaman en ketin kaiasada Lasarus, e sapwellimaniki manaman en ketin kaiasada aramas akan ni ahnsou kohkohdo.

Paipel kin pwurepwurehng mahsanih duwen inou en kaiasada. Tohnleng men kamehlelehiong soukohp Daniel: “Ke pahn mehla, ahpw ke pahn pwurehng iasada pwe ke en ale ketingpomw ni imwilahn ahnsowo.” (Daniel 12:13) Sises mahsanihong mehn Sadusi kan, kaunen mehn Suhs kan me sohte kamehlele duwen inou en kaiasada: “Kumwail inenen sapwung, kisehn amwail sohte wehwehki Pwuhk Sarawi oh manaman en Koht!” (Madiu 22:23, 29) Wahnpoaron Pohl koasoia: “I koapworopworki Koht, . . . me e pahn mie kaiasada ong me pwung kan oh me sapwung kan.”​—Wiewia 24:15.

Iahd me kaiasadahn me pwung kan oh me sapwung kan pahn wiawi? Tohnlengo padahkihong Daniel me e pahn pwurehng iasada “ni imwilahn ahnsowo.” Marda pil kamehlele me rie ohlo, Lasarus, pahn “pwurehng mourda ni rahnen neko.”​—Sohn 11:24.

Paipel kadokepene lepin mahsen pwukat “rahnen neko” ong kaundahn Wehin Krais. Pohl ntingihedi: “Pwe Krais pahn ketin kakaun, Koht lao pahn ketin kalowehdi sapwellime imwintihti kan oh ketikihdiong pahn aluweluwe kan. Oh imwintihti me pahn lohdi keieu mwuhr, iei mehla.” (1 Korint 15:25, 26) Met wia kahrepe mwahu ehu kitail en kapakapki me Wehin Koht en pweida oh kupwure en wiawi sampah. *

Nin duwen me Sohp ese, kupwuren Koht iei en ketin kaiasada me melahr kan. Ni ahnsou me rahno pahn leledo, mehla uhdahn pahn lohdi. Oh sohte emen pahn pwurehng mengimengloalki, ‘Mehla iei kaimwisekpen mehkoaros?’