Kaitarala Omw Anahn en Karanih Koht
Ewen Kahk Kelimahu
Kaitarala Omw Anahn en Karanih Koht
DAHME PAIPEL PADAHNGKI? “Kumwail keido mpen Koht, oh e pahn ketin keiong mpamwail.”—Seims 4:8.
IA KAHPWAL EN? Mie pelien lamalam tohtohie me kin padahngki soangsoangen padahk kan me sohte kin dokpene pwehn kaitarala omw anahn en esehla Koht. Ia duwen omw kak ese mehnia me padahngki padahk mehlel me kin uhdahn kaperenda Koht? Ekei sounnting ndand kan kin nda me kamehlele Koht oh poadidiong ih sohte pwung oh e pil keper. Ehu makasihn kasalehda madamadau en emen ohl wadawad me sohte kin kamehlele Koht, e koasoia: “Padahk en Kristian wet, me dene mie mehkot me laudsang pelien sains oh atail loalokong . . . kin kamwamwahlihala mour me kitail ahneki oh kahrehiong kitail en kin men wia tiahk lemei kan.”—Maclean’s.
DAHME KE KAK WIA? Kasawih mehn kadehde me Koht ieias. (Rom 1:20; Ipru 3:4) Ke dehr mweidohng emen en kauhdi omw raparapahki pasapeng kan ong peidek kesempwal kan me duwehte mepwukat: Dahme kahrehda kitail miehki? Mie mour mwurin mehla? Dahme kahrehda lokolok inenen laud? Dahme Koht kupwurki ien wia? En diar pasapeng pwung ong peidek pwukat uhdahn kesempwal pwe ken kak nsenamwahu kohkohlahte.
Ahpw, ke dehr kin mwadangete kamehlele soahng koaros me meteikan kin ndaiong uhk. Mahsen en Koht kangoange kitail en doadoahngki atail koahiek en madamadau pwehn kadehde ong pein kitail dahme Koht kin kupwurki. (Rom 12:1, 2; Ipru 5:14) Ke pahn paiekihda omw nannanti. Ma ke kin wiahda ahnsou ong onop Paipel oh kapwaiada kaweid kan, ke pahn pere iuk sang kahpwal kan, katikala omw pwunod oh kalaudehla omw mour nsenamwahu. Ke kak likih inou wet. Aramas tohto sang soangsoangen mour kin paiekihda arail sukuhlki padahk mehlel duwen Koht oh kupwure kan.
Omw poadidiong Koht pahn laudla ni omw kin paiekihda omw doadoahngki kaweid erpit kan sang Paipel. Ke sou ale luhk en onop Paipel rehn Sounkadehdehn Siohwa kan? Ma ke wia met, ke pahn diar me ke pahn pwungki dahme wahnpoaron Pohl ntingihedi: “Met iei pai kowahlap ieu, en poadidiong Koht oh kin itarki.”—1 Timoty 6:6, NW.
[Kilel nan pali 8]
Kadehde ong pein kowe dahme pwung rehn Koht