¿Mahk na i kʼoʼnik ruum tumiin?

REʼ INKIQʼOR I KʼACHAREEL

. Kʼih i kʼachareel inkikapaaj chi reʼ taqeh kʼoʼnik wilih maʼ ajwach ta ne irubʼan tiʼ reh, wilaʼ inkʼamarik naah i rukʼuhbʼaal i tinamit. Reʼ taqeh tumiin inmolarik wach chupaam taqeh lotería reʼ irukorsaj wach i taqʼaneel reh i tinamit iruyeew reh toʼbʼal keh taqeh kʼachareel.

REʼ IRUQʼOR I SANTO LAJ HUUJ

. Reʼ Santo Laj Huuj maʼ inqʼorik ta chi riij taqeh i k’onik ruum tumiin. Xa reʼ laʼ iruyeew qanaʼojbʼal reh qatobʼjiik reh rureqariik chi riij nikʼwach irilow i Dios.

Reʼ i ruwiiʼ i kʼoʼnik wilih, reʼ risjiik rutumiin i xa ajwach, eh reʼreʼ maʼ irukʼam ta riibʼ ruukʼ taqeh qʼorik xuqʼor i Jesús noq xuqʼor: «Chakoj taq rehtaal eh chako’leej taq awiib’ reh chu’nchel i ootwanik» (Lucas 12:15, RLLH). Reʼ i rukorkilaal, reʼ chi reʼ taqeh kʼachareel kikʼoʼnik ruum chi inkikʼax wach i tumiin. Atoobʼ ta xa maʼ kʼih ta woʼ taqeh i ne inkibʼan ganar, reʼ inehchanik reh i kʼoʼnik xti kʼih woʼ chik tzʼaaq taqeh i regalo irubʼehsaj. Reʼ i rukʼaxariik wach i bʼehomal irubʼan chi reʼ taqeh kʼachareel ne inkikoj i rukʼihaal i kitumiin chupaam taqeh paat reh kʼoʼnik. Reʼ kʼoʼnik irubʼan chi ne inajwanjik i tumiin chi maʼ kʼaxik ta rureqariik eh maʼ reʼ ta chik kitobʼjiik taqeh kʼachareel chi maʼ ne inkikʼax wach i bʼehomal irubʼan.

Reʼ kʼoʼnik irukʼam cho xa rukʼaxariik qiibʼ, ruum chi reʼ tumiin inqabʼan ganar kitumiin taqeh xkiqʼeʼb i kʼoʼnik. Xa reʼ laʼ reʼ Santo Laj Huuj iruqʼor qeh: «Maʼ asikʼ taq xa reʼ i holohik taq chaweh, chasikʼ laʼ taq i holohik chi keh i tokoom» (1 Corintios 10:24, TNM). Jenaj reh i lajeebʼ chi kʼuhbʼaal xuyeew i Dios reh i Moisés jeʼ wilih iruqʼor: «Maʼ jinoʼq i chibʼih reh taq aawas achaaqʼ naa taq akʼaxam wach» (Éxodo 20:17). Noq jenoʼ ajkʼoʼneel iraaj rubʼanam ganar, kʼahchiʼ ruyʼeem chi reʼ rukʼihaal ne inkiqʼebʼ i kitumiin reh chi ne irehchaaj.

Reʼ Santo Laj Huuj iruqʼor wo’ qeh chi maʼ inqil i suerte chi jeʼ rukabʼ jenaj uxlab’al ne iruyeew qabʼehomal. Pan najtir Israel wilik naq taqeh juʼjun maʼxta naq kikojbʼal chi riij i Dios eh xkitoqʼaaʼ kiloqʼem wach i «Dios reh i suerte» (TNM). ¿Nikʼwach xrilow i Dios xkibʼan? Reʼ reh xuqʼor: «Reʼ laʼ chik taq i xa aʼn i maʼ inwaaj ta wach i hin, reʼ taq chik xasikʼ inyojwik nukʼux i hin» (Isaías 65:11, 12).

Korik, chi chupaam i juʼjun taqeh tinamit, kʼisiin reh i tumiin inmolarik pan taqeh kʼoʼnik, re’ yeʼooj qʼabʼ ruum taqeh taqʼaneel inkiyeew reh kitobʼjik taqeh kʼachareel. Jeʼ rukabʼ toobʼinik reh tijinik eh toobʼinik reh kʼay. Xa nikʼ paʼ wach inkojarik i tumiin reʼreʼ, maʼ injaljik ta ahaʼ inchalik. Inchalik ruukʼ taqeh kʼoʼnik irukʼam cho rukʼaxariik wach i bʼehomal, i kʼaxaj iibʼ chi qutkeel eh i rusikʼariik tumiin chi maʼ kʼaxik ta.

«Maʼ jinoʼq i chibʼih reh taq aawas achaaqʼ naa taq akʼaxam wach» (Éxodo 20:17).

¿Nikʼwach rujotʼariik taqeh kʼachareel irubʼan i kʼoʼnik ruum tumiin?

REʼ IRUQʼOR I SANTO LAJ HUUJ

. Reʼ Santo Laj Huuj iruqʼor chi «awach taqe inkaaj bʼehomrik maʼ nkikuy taj i pajarik, inkiqʼebʼ kiibʼ ruum rukʼaxariik wach iraaj maʼ raaj bʼanarik, reʼ injotʼwik keh i tinamit. Eh reʼ woʼ reʼ inkʼamwik keh pa runimaal tojbʼal mahk» (1 Timoteo 6:9). Reʼ rukʼaxariik wach i tumiin, reʼreʼ i raaʼ i kʼoʼnik ruum tumiin. Reʼreʼ xti ajʼjotʼool eh ruum aj reʼ i ruqʼorbʼal i Dios irukoj chupaam taqeh i maʼ na ta qabʼanam (Efesios 5:3).

Ruum chi reʼ taqeh kʼoʼnik wilih irub’ehsaj i bʼanaj ganar tumiin chi maʼ kʼaxik ta, irubʼan chi ne inkʼaxarik wach i tumiin. Reʼ Santo Laj Huuj iruqʼor chi reʼ kʼaxooj reʼreʼ «raaʼ riʼsil chuʼnchel i yiibʼ wach naʼojbʼal». Reʼ rajwanjik chi kʼih atumiin iruchop naah i rukʼachariik jenoʼ. Ne irubʼan chi ne inqajik chi kapebʼinik eh ne irujotʼ i rukojbʼaal chi riij i Dios. Reʼ Santo Laj Huuj iruqʼor chi ajwach kiqʼehbʼik chupaam i rukʼaxariik wach i tumiin inchalik maʼ kʼisa tiʼ kʼaxik chi kinaah (1 Timoteo 6:10).

Reʼ rukʼaxariik wach i tumiin irubʼan chi maʼ suq ta chik kikʼux i kʼachareel ruuk’ i kitumiin. Reʼ Eclesiastés 5:10 iruqʼor: «Awach i ruyeew i rukʼux chinaah i tumiin ko ruman iraaj. Awach i ruyeew rukʼux chinaah i bʼehomal maʼ manlojik ta reh nikʼ nimaal i chibʼih reh wilik. Eh reʼ taqe i reʼ xamaʼ xta rukʼam chaloq».

Millón chi kʼachareel, reʼ xponik chi kiwach i kʼoʼnik ruum tumiin xiqʼehbʼik chupaam. Xa ar Estados Unidos chi millón taqeh kʼachareel xiqʼehbʼik pan kʼoʼnik ruum tumiin.

Reʼ Proverbios 20:21 irukʼuhtaaj qeh chi reʼ taqeh kʼachareel inkikʼax wach i tumiin, mareh ne kiponik chi bʼehoom taqeh, xa reʼ laʼ maʼ na ta kikuxesjik ruum i Dios. Eh ajwach irukʼax wach i kʼoʼnik ruum tumiin mareh ne irumin riibʼ pan kʼaas, oon ne irujotʼ riibʼ, ne iruqʼebʼ taqeh ramigo, i rukamaj eh jeʼ woʼ i rufamilia. Rukʼamariik naah taqeh naʼojbʼal iruyeew qeh i Santo Laj Huuj ne qojrukʼax chuwach taqeh kʼaxkilal irukʼam cho i kʼoʼnik ruum tumiin.

«Awach taqe inkaaj bʼehomrik maʼ nkikuy taj i pajarik, inkiqʼebʼ kiibʼ ruum rukʼaxariik wach iraaj maʼ raaj bʼanarik, reʼ injotʼwik keh i tinamit. Eh reʼ woʼ reʼ inkʼamwik keh pa runimaal tojbʼal mahk» (1 Timoteo 6:⁠9).