No longtaem afta gavman appruvim Ramapo construction project lo November 2024, bigfala waka for redyim construction site hem start. Disfala waka bae hem tekem samting olsem 18 months.

Kasem distaem, olketa wakaman digimaot finis 133,800 cubic meters (175,000 cu yd) blo olketa rock and nara samting, wea semsem olsem klosap 54 Olympic-size swimming pool. Olketa rock hia wea olketa digimaot bae olketa iusim for levelem olketa nara part lo construction site. And tu, big waka hem gohed for installim underground electrical, plumbing, and olketa nara utility lo construction site.

Staka brata and sista wea garem construction experience mekem olketa seleva available for help witim disfala project. Tufala lo olketa hia hem Tracy and Victoria Pannell, wanfala marit couple from Oklahoma, U.S.A. Tracy waka lo excavation lo Ramapo. Victoria kasem training for draevem olketa big dump trak. Victoria sei: “Mi no tingim enitaem dat bae mi savve draevem wanfala big trak olsem. For mi, diswan hem nara pruv wea showim Jehovah savve accomplishim olketa nambawan samting if iumi garem willing spirit and depend lo hem for help.”

Nara couple hem, Carl and Zaid Knight, tufala spendem staka years for help witim construction blo branch facility lo Britain. Carl help for redyim property for construction project, and Zaid draevem bulldozer and olketa nara hevi equipment. Olketa barava enjoyim wei for waka witim staka young brata and sista wea mekem olketa seleva available for help witim datfala project. Zaid koment olsem abaotem parents blo olketa young wan hia: “No eni hapi hem olsem hapi olketa kasem taem olketa followim example blo Hannah wea sei, ‘Mi givim pikinini blo mi for Jehovah.’” (1 Samuel 1:28) Moa than 150 brata and sista wea age blo olketa between 18 and 25 olketa currently sapotim construction lo Ramapo.

Taem disfala waka hem progress kwiktaem tumas, iumi prea for Jehovah gohed blessim evriwan wea mekem olketa seleva available for help lo disfala exciting project.—Psalm 110:3.