Lo November 21, 2025, Ramapo project hem kasem wanfala exciting milestone taem olketa wea waka lo there start for pourim faondeson blo residence parking garage. Hem nao firstfala permanent building wea olketa bae buildim on site.

Disfala 8,883-square-meter (95,616-sq-ft) garage olketa designim for 367 vehicle savve park insaed. Taem diswan complete, bae olketa iusim firstaem for olketa construction office, bigfala dining rum, and storage for olketa building material during lo taem wea project gohed. Brata Benjamin Clanton, wea hem overseer blo on-site concrete batch plant, sei olsem abaotem diswan: “Taem mifala lukim first 18-fala batch blo concrete wea olketa pourim, datwan mekem mifala hapi tumas. Hem amazing for lukim hao Jehovah gaedem and directim disfala waka. Taem mi lukim disfala waka hem progress, datwan hem barava strongim confidence blo mi lo Jehovah.”

Then, lo December 18, 2025, waka hem start tu lo faondeson blo first tenfala residence building. Taem first sixfala lo olketa building hia complete, bae samting olsem nara 850 volunteer savve stay insaed lo taem wea project hia gohed.

Samting olsem thrifala week bihaen, lo January 12, 2026, olketa brata and sista blo iumi hapi for hipap tugeta for first famili Wastaoa Study wea olketa holem lo Ramapo construction site. Klosap 300 nao attendim spiritual program hia in person lo on-site temporary dining rum, and staka narawan lisin lo program via videoconference. Wanfala sista wea nem blo hem Miriam, wea waka on site, hem sei: “Hem bigfala privilege for stap lo there for first Wastaoa Study lo Ramapo. Bihaen mi feel moa klos lo olketa brata and sista wea mi waka witim. Mi savve lo olketa brata and sista hia dat olketa savve waka hard, bat distaem mi savve herem koment blo olketa wea showim faith blo olketa lo God. Datwan mekem mi hapi fogud!”

Taem construction lo Ramapo site hem gohed, iumi confident dat Jehovah bae continue for blessim and directim evriwan wea barava waka hard ‘lo haos blo Jehovah.’—1 Chronicles 28:20.