Hosea 8:1-14

  • Nogud samting wea kamaot from wei for worshipim idol (1-14)

    • Plantim wind, harvestim cyclone (7)

    • Israel no tingim Man wea Wakem hem (14)

8  “Putim horn lo mouth blo iu!+ Enemy kam olsem eagle againstim pipol* blo Jehovah,+Bikos olketa no keepim covenant blo mi+ and brekem law blo mi.+  2  Olketa krae kam olsem lo mi, ‘God blo mifala, mifala olketa Israelite, savve lo iu!’+  3  Israel hem rejectim gud samting.+ Letem wanfala enemy winim hem.  4  Olketa appointim olketa king, bat datwan nating followim will blo mi. Olketa appointim olketa leader,* bat mi nating appruvim datwan. Olketa iusim silver and gold blo olketa for wakem olketa idol,+And diswan mekem olketa for distroe.+  5  Mi rejectim statue blo young buluka wea iu worshipim, O Samaria.+ Mi barava kros lo iu, Samaria.+ Wat taem nao bae iu kamap klin moa?  6  Bikos statue hia hem from Israel. Man wea garem skill nao mekem, and hem no tru God. Statue blo young buluka blo Samaria bae olketa pisisim.  7  Bikos wind nao olketa gohed plantim,And olketa bae harvestim cyclone.+ No eni stalk bae garem grain wea redi.+ Eniting wea grow bae olketa no savve harvestim. Sapos eni wheat garem grain, olketa foreigner* bae swallom.+  8  Enemy bae swallom Israel.+ Distaem bae olketa stap midolwan olketa nation,+Olketa bae olsem bowl wea no eniwan laekem.  9  Bikos olketa go ap lo Assyria,+ olsem wanfala wild donkey* wea go seleva. Ephraim haerem olketa prostitute for durong witim olketa.+ 10  Nomata olketa haerem olketa prostitute hia from olketa nation,Mi bae hipimap olketa lo wanfala ples. Olketa bae start for safa+ bikos lo hevi wea king and olketa leader bae putim lo olketa. 11  From Ephraim mekem staka altar, hem sin.+ Olketa altar hia mekem hem for sin.+ 12  Mi raetem staka law* for hem,Bat olketa nating tinghae lo datwan.+ 13  Olketa offerim olketa sakrifaes olsem present for mi, and olketa kaikaim meat blo olketa,Bat Jehovah nating hapi lo olketa.+ Distaem hem bae rememberim rong blo olketa and panisim olketa for olketa sin wea olketa duim.+ Olketa go bak* lo Egypt.+ 14  Israel no tingim nao Man wea Wakem hem+ and hem buildim olketa temple,+And Judah wakem staka taon wea strongfala wall stap raonem.+ Bat mi bae sendem fire lo olketa taon blo hem,And fire hia bae bonem olketa taoa blo each wan.”+

Olketa footnote

^ Lit., “haos.”
^ Or, “prince.”
^ Or, “stranger.”
^ Or, “zebra.”
^ Or, “instruction.”
^ Or maet, “Olketa bae go bak.”

Copyrights for disfala pablikeson