De Väastaunt von Jehova siene Zeijen haft Frieheit jejäft, daut daut Betel von Meddel-Amerika, waut dicht bie Mexiko-Staut es, nu no eene aundre Städ trakjen saul. Fief Breeda worden en een Kommitee aunjestalt un dee woaren sikj om dit Buwoakj kjemren. Nu sieekjen dee no eene paussende Städ, wua see kjennen dit niee Betel buen.

Vonne 1974 aun haben se aul mieremol de Jebieda von dit Betel jrata jemoakt un dee oppjefrescht. Aune 2011 wort daut Betel von Meddel-Amerika aunjestalt fa daut Prädichtwoakj äwa Belize, Costa Rica, El Salvador, Guatemala, Honduras, Nicaragua un Panama. a Om fa aules to sorjen, waut an fält en dit Betel wua dee nu sent, wudden dee motten wada välet oppfreschen un uk daut jrata moaken. Doawäajen worden dee sikj eenich, opp eene bätre Städ een nieet Betel to buen. Dan woaren see bäta kjennen daut Prädichtwoakj unjastetten un uk mea Rum han fa de Betelfamielje, waut emma jrata woat.

De Jebieda von daut niee Betel woaren nich aule opp een mol jebut. Daut ieeschte woaren dee een Biet Launt kjeepen un doa Jebieda buen fa 300 Beteliten, waut doa wonen un schaufen kjennen. Lota woaren dee noch de aundre Jebieda buen toom schaufen un wonen fa de äwaje Betelfamielje.

Brooda Joseph Yi es eena von daut Kommitee fa dit Buwoakj. Hee sajcht: “Nu jroz doo wie met daut Betelkommitee von Meddel-Amerika toop schaufen toom seenen, woone Prowins en Mexiko daut baste es fa dit niee Betel. Wie woaren uk doano seenen, en woone Jäajent de Rejierungsbeaumte daut wellich loten, daut wie doa een nieet Betel buen. Wie sent aul nieschierich doatoo, woo Jehova ons woat met dit Buwoakj halpen.”

Wie freien ons aul sea fa dit niee Buwoakj un wie bäden doafäa, daut Jehova daut säajnen woat (Spricha 16:3).