Wan eena sikj en schwoare Tieden too väl Sorjen moakt, kaun eena siene Jesuntheit schoden un eenem kaun daut aune Narfen gonen. Daut kaun mau rajcht jratre Trubbels veuasoaken aus dee, wua eena sikj äwa sorcht.

•  Sikj weinja met schlajchte Norechten aufjäwen. Ons fälen nich aule Eenselheiten to weeten, wan doa waut schlemmet passieet. Wan eena sikj too väl met schlajchte Norechten aufjeft, dan kaun eena bloos noch mea Angst kjrieen un nich han noch häa weeten.

   De Schreft sajcht: “Eenen bedrekjten vedrieejen de Knoakes [ooda dee velist de Krauft]” (Spricha 17:22, PB).

   John sajcht: “Eena kaun sikj daut leicht aunwanen, emma em Internet to kjikjen, waut et fa Nies un schlemmet jeft, oba daut es nich eene goode Aunjewanheit. Ekj moak mie weinja Sorjen, wan ekj mie nich soo väl met de Norechten aufjäw.”

   Äwalaj mol: Woo foaken fält daut werkjlich, de nieste Norechten to weeten?

•  Plon, waut du jieda Dach doonen west. Wan du dienen Dach plonst, waut du doonen west un wanea, dan woat die daut halpen, daut du die goot feelst un du woascht nich soo beduat sennen. Doawäajen proow daut, waut du deist, emma to deeselwje Tiet to doonen, soo aus oppstonen, äten, schlopen gonen ooda sestwaut.

   De Schreft sajcht: “Väasechtich plonen, brinjt eenem Vedeenst” (Spricha 21:5, PB).

   Joseph sajcht: “Aus daut met de COVID-19-Krankheit aunfunk, plond ekj nuscht mea en mien Läwen un ekj haud väl to väl Tietvedrief. Ekj wull miene Tiet oba bäta utnutzen, un doawäajen plon ekj daut jieda Dach, waut ekj doonen mott.”

   Äwalaj mol: Plonst du diene Tiet soo, daut du aum Enj vom Dach schaftich best, waut du jedonen hast?

•  Kjikj no daut goode. Wan du bloos doaräwa nodenkjst, waut du wurscht haben kunt bäta doonen ooda waut fa schlemmet doa aules passieren kunn, dan woascht du die bloos noch mea Sorjen moaken un Angst haben. Denkj leewa äwa twee ooda dree Sachen no, wuafäa du kaust dankboa sennen.

   De Schreft sajcht: “Siet dankboa” (Kolossa 3:15, PB).

   Lisa sajcht: “De Bibel to läsen, halpt mie, nich aun daut schlajchte to denkjen, oba aun daut goode. Daut hieet sikj veleicht gaunz eefach, oba daut halpt!”

   Äwalaj mol: Denkjst du jeweenlich emma äwa daut schlajchte en dien Läwen no un vejatst von daut goode?

•  Denkj aun aundre. Wan du die eentwajch Sorjen moakst, dan west du veleicht leewa auleen sennen. Oba enne Städ daut, denkj doaräwa no, woo du aundre halpen kaust.

   De Schreft sajcht: “Jie sellen nich bloos no daut kjikjen, waut junt selfst intressieet, oba uk no daut, waut dän näakjsten intressieet” (Filippa 2:4, PB).

   Maria sajcht: “Wan ekj waut fa aundre doo, dan sie ekj schaftich. Dee feelen sikj goot doaräwa, wan ekj waut fa dee doo un ekj moak mie weinja Sorjen. Ekj hab dan uk goanich mea Tiet, mie Sorjen to moaken.”

   Äwalaj mol: Von deejanje, waut du kjanst, es doa wäa, wäm besondre Help fält? Woo wurscht du dänjanjen halpen kjennen?

•  Acht opp diene Jesuntheit. Doo ekserseisen, jenuach vereiwen un jesunt äten. Wan eena no siene Jesuntheit oppaust, kaun eenem daut halpen, eene bätre Enstalunk to haben un sikj nich soo Sorjen to moaken.

   De Schreft sajcht: “De kjarpaliche Eewunk halpt” (1. Timotäus 4:8, PB).

   Catherine sajcht: “Ekj un mien Sän kjennen buten nich soo väl doonen, aus wie wudden wellen, un doawäajen hab wie ons daut aunjewant, bennen Ekserseis to doonen. Doaderch sent wie schaftja un daut halpt ons, leeftolja un jeduldja unjarenaunda to sennen.”

   Äwalaj mol: Wurscht du sellen jesunda äten un mea ekserseisen, daut du die bäta feelst?

 Dis Rot haft aul väl Menschen jeholpen, sikj weinja Sorjen to moaken. Un waut haft dee noch jeholpen? Äwa de Vespräakjungen von de Schreft to lieren, waut sikj secha erfellen woaren. See doatoo dän Artikjel: “Waut woat Gott sien Kjennichrikj volbrinjen?”