“Nich lang trigj wudd wie ons daut schwoa haben kunt väastalen, wan wie ons jeisteljet Äten hauden sult ellektroonisch kjrieen.” Jeit die daut uk soo? Daut säd Geoffrey Jackson en eene Räd en dän 6. Berecht von dän Väastaunt – 2020. Hee säd uk noch: “Un nu oba denkj wie veleicht, woo wie wudden foadich woaren en de Tiet von dise Krankheit onen daut Jereetschoft, soo aus JW Library. Jehova haft ons aul joarenlank doafäa reedjemoakt, wan doa mol sull soowaut oppkomen aus dit.”

 Woo haft Jehova ons reedjemoakt? Waut wia doa met en, de JW Library-App to moaken? Waut es doa needich, dee em dreien to hoolen un bäta to moaken?

 En Mei 2013 fruach de Väastaunt eene Aufdeelunk von de Hauptoffiz, waut MEPS Programming heet, aus see kunnen eene App moaken, wua de derchjeseene Neue-Welt-Übersetzung bennen sennen kunn. Paul Willies, waut en MEPS Programming schauft, sajcht: “Wie hauden noch kjeenmol ea eene App jemoakt, waut eena sikj raufloden kunn. Wie stalden eene Grupp toop, waut doamet schaufen sullen. Un wie leeten eenje aundre Oabeiten toch un schauften met waut aundre Aufdeelungen toop, om dise App to moaken un daut, woo dee sull schaufen. Wie bäden foaken, un om fief Moonat kunn wie aul met Jehova siene Help dise App bie daut Joarestoopkomen rutjäwen!”

 Daut näakjste wull wie de App soo moaken, daut daut werkjlich eene Bibliotäkj wia met mea Bieekja opp mea Sproaken. En Jaunewoa 2015 wieren de mieeschte Bieekja opp Enjlisch opp dise App to haben, un bloos sas Moonat lota kunn eena dee uk opp miere hundat Sproaken raufloden.

 Onse Breeda haben de App opp veschiedne Wäaj bäta jemoakt. Doa sent nu uk de Videos bennen, un aul de Bieekja un Videos, waut wie fa de Toopkomes brucken, sent aula opp eene Städ. Un wan eena en de Bibel opp eenen Varsch noppdrekjt, kaun eena uk no de Bieekja gonen, waut bie de Help toom nosieekjen bennen sent.

 Opp 8 Millionen Fons ooda Tablets woat de JW Library jieda Dach jebrukt un opp äwa 15 Millionen jieda Moonat! Waut mott doa jedonen, daut dise App bie aul de Fons un Tablets fein schauft? Brooda Willies sajcht: “Soone App es newers foadich. Wie schaufen emma aun dee, om dee bäta to moaken, daut dee leichta to brucken jeit. Wäajen de Programs opp de Fons un Tablets emma oppjefrescht woaren, mott wie de App doano aunpaussen, soo daut dee fein schauft. Wiels opp de JW Library emma mea Bieekja un oppjeschnaktet noppkjemt, mott wie uk doano seenen, daut wie soone Komputa-Programs haben, waut doamet schaufen kjennen.” En de JW Library-App jeft daut nu opp aule Sproaken toop soo bie 200 000 Hefta un Bieekja un äwa 600 000 oppjeschnakte Sachen un Videos.

 Toom dise App em dreien hoolen bruck wie nich bloos Komputasch, oba uk eenje Programs, waut eena betolen mott. Fa een soon Program mott wie jieda Joa 1 500 stätsche Dola betolen. Un de Aufdeelunk MEPS Programming brukt jieda Joa ojjefäa 10 000 stätsche Dola, om veschiedne Sorten niee Fons, Tablets un Komputasch to kjeepen toom seenen, aus de App uk doa bowen jlei rant.

 Von dan, aus wie de JW Library haben, bruck wie lang nich soo väl Jelt toom Bieekja drekjen, binjen un utschekjen. See wie biejlikj mol daut Buakje Täglich in den Schriften forschen. Fa daut Joa 2013 deed wie meist 12 Millionen von dee Bieekjakjes drekjen. Oba fa daut Joa 2020 deed wie bloos noch soo rom 5 Millionen von dee drekjen, wan daut uk äwa de gaunze Welt soo bie 700 000 mea Vekjindja jeef. Waut haft sikj jeendat? Väl Breeda un Sestren läsen dän Varsch fa dän Dach nu en de JW Library-App. a

 De JW Library-App halpt de Menschen opp väl veschiedne Wäaj. Geneviève, waut en Kanada wont, sajcht, daut de App ar jeholpen haft, pinkjelja to studieren. See sajcht: “Ekj denkj nich, daut ekj jieda Zemorjes studieren wudd, wan ekj jiedatsmol sull een Stopsel Bieekja toopsaumlen. Oba nu met de App näm ekj eefach mien Tablet un doa es aules bennen. Daut ekj soo räajelmässich studia, haft mienen Gloowen jestoakjt un mie Jehova noda jebrocht.”

 De JW Library-App es ons en de Tiet von de COVID-19-Krankheit aul sea verem pauss jekomen. Charlyn von de Stäts sajcht: “Nu, wiels de COVID-19-Krankheit äwa de gaunze Welt es, hab ekj aul äwa een Joa kjeene niee Bieekja opp Papia jeseenen. Oba wäajen de JW Library-App hab ekj aules, waut mie halpt toom em jeisteljen stoakj bliewen. Ekj sie Jehova sea dankboa doafäa!”

 Väle jeit daut soo aus Faye, waut oppe Filippinen wont. See sajcht: “Dise sea feine App halpt mie, met Jehova Frind to bliewen. Daut ieeschte zemorjes läs ekj en dise App. Dee bruck ekj toom mie eenjet aunhorchen, wan ekj schauf. Ekj bruck dee toom mie fa de Toopkomes un fa mien Bibelstudium reedmoaken. Un wan ekj friee Tiet hab, dan kjikj ekj mie doa bennen de Videos aun. Ekj läs en de App uk de Artikjels ooda de Bibel, wan ekj wua luaren mott. Dee es mea wieet aus Golt.”

 De App es uk sea fein fa dän Deenst. Aus eene Sesta en Kamerun prädjen deed, wull see eenen Bibelvarsch brucken, waut eene aundre Sesta een poa Wäakj ea jebrukt haud. Oba see funk disen Varsch nich mea. See sajcht: “Toom Jlekj wist ekj noch eenen Sauz von dän Varsch. Ekj muak de App op, jinkj no de Bibel un schreef dän Sauz doa nenn toom sieekjen, un fuaz funk ekj dän Bibelvarsch. Doaderch daut ekj de App brukt, hab ekj aul een deel Varzhen kunt finjen, waut ekj eenjemol vejäten haud.”

 Dankscheen fa june friewelje Gowen, waut jie soo jejäft haben, aus daut opp donate.jw.org beschräwen woat. Doaderch wia daut mäajlich, daut wie de JW Library-App fa de Breeda oppe gaunze Welt moaken kunnen, dee bäta moaken un em dreien hoolen.

1. Oktooba 2013 – De App woat rutjejäft met de derchjeseene enjlische Neue-Welt-Übersetzung doa bennen

2. Jaunewoa 2015 – Doa komen noch aundre Bieekja opp Enjlisch nenn un lota noch opp hundade aundre Sproaken

3. Nowamba 2015 – Eena kaun sikj en de App waut tieekjnen

4. Mei 2016 – De Bieekja un Videos fa de Toopkomes sent aula opp eene Städ to finjen

5. Mei 2017 – Eena kaun sikj en de App waut oppschriewen

6. Dezamba 2017 – Eena kaun de enjlische Studienbibel enne App brucken

7. Moaz 2019 – Eena kaun doa Audios raufloden, Videos kjikjen un sikj en de Help toom nosieekjen Sachen noläsen

8. Jaunewoa 2021 – Eena kaun daut Heft un Buak Een scheenet Läwen fa emma! en de App brucken