Jieda Joa woaren een deel Sondavoltietdeena von äwa de gaunze Welt no de Gilead-Bibelschool fa Missionoaren enjelot, waut en Patterson, New York, es. a Bie dise School lieren de Schiela, woo see äare veschiedne Oppgowen en Jehova siene Organisazion noch bäta doonen kjennen. Dise School halpt dee, de Breeda en de Vesaumlungen un en de Betels oppe gaunze Welt to stoakjen un opptomuntren.

 De Gilead-School es fa Breeda oppe gaunze Welt. Biejlikj en de 147. Klauss, waut aune 2019 wia, wieren 56 Schiela von 29 Lenda. De Breeda un Sestren, waut dise School derchjegonen sent, wieren ea aul em Sondavoltietdeenst, biejlikj schauften dee em Betel, wieren em Kjreisdeenst, Missionoaren ooda Sondapionieren.

 Doa mott väl em verut reedjemoakt, ea dise School aunfangen kaun. Biejlikj kjaft de Reisaufdeelunk von de Hauptoffiz Zhett-Tickets fa dee, waut fa de School enjelot sent. De Tickets fa de 147. Klauss fa de Gilead-School kosten fa jieda eenem han un trigj em Derchschnett 1 075 stätsche Dolla. Fa de Schiela von de Salomon-Inslen musten vea Tickets jekoft toom no Patterson komen un lota noch dree Tickets toom trigjflieejen; em gaunzen wieren daut äwa 35 400 Kilomeeta (22 000 Miel), waut dee reisden. Fa jieda eenen kosten de Tickets 2 300 stätsche Dolla. Toom Jelt spoaren bruck de Reisaufdeelunk een Komputa-Program toom feine Priesen fa Tickets sieekjen. Un mau rajcht nodäm daut see een Ticket jekoft haben, deit dit Program noch Wäakjen un Moonaten wieda selfst sieekjen, om to seenen, aus de Priesen noch raufgonen. De Reisaufdeelunk brukt uk Punkta von Jeltkoaten un Mielen toom Tickets kjeepen, waut aundre de Organisazion jejäft haben.

 Väle von onse Schiela fälen Papieren toom en de Stäts nenkomen. De Aufdeelunk fa Jesazessachen von de Hauptoffiz halpt dee dan, soone Papieren to kjrieen, waut doa needich sent, daut eena studieren kaun. Met aules toop kosten soone Papieren em Derchschnett 510 stätsche Dolla opp eenen.

 Woo kjemt ons dise Belierunk togood, waut de Schiela kjrieen? Hendra Gunawan deent aus een Eltesta en Asien. Hee es en eene Vesaumlunk met een Poa Lied, waut de Gilead-School derchjegonen sent. Hee sajcht: “Ea wieren en onse Vesaumlunk kjeene Pionieren. Oba de Iewa un de goode Enstalunk, waut dit Poa Lied haud, brocht uk aundre en de Vesaumlunk bat doa, met dän Pioniadeenst auntofangen. Lota jinkj mau rajcht eene Sesta von onse Vesaumlunk no de School fa Kjennichrikjsvekjindja.”

 Sergio Panjaitan schauft en daut Betel von Asien met Breeda toop, waut de Gilead-School sent derchjegonen. Hee sajcht: “De Belierunk, waut dee jekjräajen haben, kjemt nich bloos dee togood, oba uk ons. Dee haben soo väl jelieet. Oba enne Städ daut dee sikj doa groot met doonen, vetalen dee aundre doavon, waut see jelieet haben. Dit jeft ons Moot un wie kjennen doaderch uk aundre Moot toospräakjen.”

 Met waut betolt de Organisazion de Onkosten fa dise School? Met Gowen, waut fa daut Woakj oppe gaunze Welt jejäft woaren. Väle brucken eent von de Mäajlichkjeiten, waut daut opp donate.jw.org jeft. Dankscheen fa june friewelje Gowen, waut methalpen, daut daut dise School jäwen kaun.