6. Een Prädichtwoakj oppe gaunze Welt

“Daut Evangelium von Gott sien Rikj woat en de gaunze Welt jeprädicht woaren” (MATÄUS 24:14, PB).

● Eene Fru, waut Vaiatea heet, wont opp eene von de Tuamotu-Inslen wiet auf em Pazifischen Mäa. Tuamotu haft meist 80 Inslen, waut en eene Jäajent von äwa 802 900 Kwadrotkilomeeta (310 000 Kwadrotmiel) vespreet sent, un doa wonen mau soo bie 16 000 Menschen. Un doch sent Jehova siene Zeijen aul bie Vaiatea un dee äare Nobasch jewast. Wuarom? Wiels Jehova siene Zeijen aule Menschen von de goode Norecht von Gott sien Kjennichrikj vetalen wellen, endoont wua dee wonen.

WAUT TO BEOOBACHTEN ES: De Norecht von daut Kjennichrikj woat bat de hinjaschte Akjen oppe Ieed jeprädicht. Bloos aune 2010 haben Jehova siene Zeijen äwa 1 600 Millionen Stunden dise goode Norecht en 236 Lenda jeprädicht. Daut wudd soo sennen, aus wan jieda eena von Jehova siene Zeijen jieda Dach 30 Minuten bie dit Prädichtwoakj metjeholpen haft. En de latste tieen Joa haben Jehova siene Zeijen äwa 20 000 Millionen Bieekja un Hefta jemoakt un vebreet, waut Menschen halpen, de Schreft bäta to vestonen.

WAUT EENJE SAJEN: De Schreft woat aul dusende Joaren jeprädicht.

ES DAUT SOO, AUS DEE SAJEN? Daut es soo, daut väle waut ut de Schreft jeprädicht haben. Oba de mieeschte haben daut mau fa een kjlienet Stootje jedonen un bloos opp wesse Städen. Oba Jehova siene Zeijen äa Prädichtwoakj es oppe gaunze Welt un hundade Millionen Menschen haben doaderch von de goode Norecht jehieet. Waut von de majchtichste un hunjschste Rejierungen, waut daut jeemols jeef, haben jeprooft, Jehova siene Zeijen äa Prädichtwoakj opptohoolen, oba nich mol dee haben daut kunt (Markus 13:13). Un Jehova siene Zeijen kjrieen fa daut prädjen nich mol betolt. Dee doonen daut friewellich un jäwen uk de Bieekja emsonst wajch. Daut drajcht sikj aules met friewelje Gowen.

WAUT JLEEFST DU? Woat daut “Evangelium von Gott sien Rikj” nu oppe gaunze Welt jeprädicht? Wan dise Profezeiunk sikj erfelt, bediet daut dan, daut boolt bätre Tieden komen woaren?

[Takjst]

“Soo lang aus Jehova daut toolat, woa wie flietich de goode Norecht von Gott sien Kjennichrikj wiedaprädjen un aule Mäajlichkjeiten brucken, waut wie haben, om Menschen doavon to vetalen” (JAHRBUCH DER ZEUGEN JEHOVAS 2010)