Wuarom sell wie bäden?
JEBÄD. Een deel Menschen wellen jieren weeten, waut de Schreft äwa bäden sajcht. Well wie mol säwen Sachen seenen, waut de Menschen äwa daut Jebäd wellen weeten un waut de Schreft doaräwa sajcht. Dise Artikjels woaren die halpen, wan du west aunfangen met bäden ooda, wan du aul bätst, toom die secha moaken, daut Gott uk no diene Jebäda horcht.
AULAWÄAJEN opp de Welt doonen de Menschen von veschiedne Gloowes bäden. Dee bäden auleen ooda komen uk en Gruppen toop toom bäden. Dee bäden en Kjoakjen, en Tempels, en de Judenschoolen un noch opp aundre Aunbädungsstäden. Dee bäden veschieden to Gott un eenje brucken uk veschiedne Sachen doatoo.
Von aules, waut oppe Welt läft, doonen bloos de Menschen bäden. Daut stemt, wie haben välet äwareen met de Tieren, biejlikj bruck wie uk Äten, Loft un Wota. Un krakjt soo aus dee kom wie oppe Welt, wie läwen un wie stoawen (Liera 3:19). Oba wuarom doonen bloos Menschen bäden?
Eefach jesajcht: Ons fält daut aun daut Jebäd. De mieeschte Menschen, wan dee bäden, wellen dee wäm aunbäden, waut heilich ooda eewich es. De Schreft sajcht, daut wie soo jemoakt sent, daut ons daut doaraun fält (Liera 3:11, JHF). Jesus Christus säd eemol: “Jlekjlich sent dee, dee sikj doaräwa em kloaren sent, daut an daut jeistelje fält” (Matäus 5:3, NW).
Ons fält daut aula aun “daut jeistelje”. Daut es wuarom doa soo väl Gloowes sent un uk soo väl Städen, wua de Menschen gonen aunbäden. Oba eenje jleewen, daut see daut jeistelje, waut an fält, kjennen bie an selfst ooda bie aundre Menschen finjen. Es daut werkjlich soo? Rajcht jesajcht fält ons daut aun irjentwäm, waut weisa un stoakja es aus wie un uk lenja läft. Wiels wie sent je mau schwake Menschen, ons Läwen es kort un daut jeft soo väl Sachen, waut wie nich vestonen kjennen. Bie waut fält ons daut besonda aun Help?
Haft die daut mol aun Rot ooda Weisheit jefält? Ooda hast du soon Twiewel jehaut, waut kjeen Mensch die kunn oppem kloaren brinjen? Haft die daut mol aun Troost jefält, biejlikj wan doa wäa jestorwen es, dän du väl jeräakjent hast? Ooda fäld die daut mol aun Help, wan du must eene wichtje Entscheidunk moaken? Ooda feelsd du die mol sea schuldich, wäajen du waut orrajchtet jedonen hautst?
No de Schreft no sent dit aules Sachen, wua eena kaun om bäden. De Schreft kaun ons halpen to weeten, woo wie bäden sellen un om waut wie bäden sellen, wäajen en de Schreft sent väl Jebäda von true Mana un Frues bennen. Dee bäden om Troost, om Rot, om Vejäwunk un uk äwa Sachen, wua see nich Kloarheit äwa hauden (Psalm 23:3; 71:21; Daniel 9:4-5, 19; Habakuk 1:3).
De Jebäda von dise Menschen wieren aula veschieden, oba dee hauden uk aula waut äwareen. Dise Mana un Frues wisten daut wichtichste äwa daut Jebäd, waut een deel Menschen vondoag dän Dach aul vejäten haben: Dee wisten, to wäm see bäden sullen.