Stoakjet drinkjen unja Kontroll hoolen

EEN Maun, waut Tony heet, haud väl Trubbels en sien Läwen, wäajen hee daut nich toostunt, daut hee too väl drunk. Hee docht soo aus dit, wäajens hee een deel drinkjen kunn, onen daut hee bedrunken wia. Un doawäajen haud hee daut no siene Meenunk no aula unja Kontroll. Oba wuarom wia daut orrajcht, woo hee denkjen deed?

Wäajen hee too väl drinkjen deed, kunn hee nich kloa denkjen. Aus hee daut enwort ooda nich, wan hee too väl drunk, dan schauft sien Vestaunt nich soo fein un hee wort daut dan uk nich en, waut daut aun am deed.

Noch eene Uasoak, wuarom Tony sien denkjen orrajcht wia, wia, wiels hee verheipts nich wull opphieren met drinkjen. Een Maun, waut Allen heet, stunt daut aum Aunfank nich too, daut hee eenen Trubbel haud met stoakjet drinkjen. Hee säd: “Ekj vestuak mien Drinkjtich. Ekj deed daut bloos veschmäaren, daut et nich sull soo oajch loten met mien drinkjen. Ekj wia mie eenich, daut ekj nich wull opphieren met drinkjen.” Wan aundre daut uk seenen kunnen, daut Tony un Allen Trubbel hauden met drinkjen, dochten dee beid bie sikj, daut aules normal wia. Beid Mana musten waut doonen, daut see de Kontroll kjrieejen äwa äa drinkjen. Oba waut fäld doa to doonen?

Doo doa waut met!

Väle, waut Trubbel hauden met stoakjet drinkjen, haben kunt opphieren, wäajen dee no Jesus siene Wieed jehorcht haben, wua hee sajcht: “Wan dien rajchtet Uag die veuasoakt to sindjen, dan riet daut ut un schmiet daut wajch. Daut es bäta wan du een Poat vom Kjarpa velist, aus wan dien gaunza Kjarpa en de Hal jeschmäten woat” (Matäus 5:29, PB).

Jesus meend hia secha nich, daut wie ons opp iernst sullen daut Uag utrieten. Hee brukt daut bloos soo aus een Biespel, daut wie sullen reed sennen, irjentwaut en ons Läwen to endren, wan ons daut em jeisteljen schoden deed. Daut es soo, daut kaun sea schwoa sennen. Oba wan wie daut doonen, dan woat ons daut halpen, daut wie nich Drinkja woaren. Wan aundre to die sajen, see aul doaräwa beduat sent, daut du too väl stoakjet drinkjst, dan doo doa nu waut met. * Wan du nich kaust weinja drinkjen, dan doo gaunz met drinkjen opphieren. Daut kaun sea schwoa sennen, oba daut kaun dien Läwen raden.

Wan du uk nich een Drinkja best, drinkjst du oba too väl? Wan jo, waut kaun die halpen, stoakjet drinkjen unja Kontroll hoolen?

Wua kaust du Help finjen

1. Hab Gloowen, daut Jehova die woat Krauft jäwen, wan du pinkjlich un von Hoaten bätst. De Schreft jeft aul dee disen Rot, waut Jehova Gott jefaulen wellen: “Lot Gott met bäden un prachren un dankscheen sajen aules weeten waut junt fält! Un Gott sien Fräd, dee wiet äwa aules jeit waut Menschen vestonen kjennen, woat june Hoaten un Jedanken en Christus Jesus bewoaren” (Filippa 4:6-7, PB). Om waut kjenn wie bäden, soo daut wie disen Fräd kjrieen?

Sto daut too, daut du Trubbel hast met stoakjet drinkjen un daut et diene Veauntwuatunk es, doamet to schaufen. Saj Gott daut, waut du doonen west toom die endren un hee woat diene Aunstrenjunk säajnen, soo daut doa nich noch jratre Trubbels oppkomen. De Schreft sajcht: “Wäa siene Sinden velicht, woat nich Jlekj haben; wäa dee bekjant un doamet opphieet, woat Metleet finjen” (Spricha 28:13, PB). Jesus säd uk, wie kunnen bäden: “Brinj ons nich en Vesieekjunk, oba bewoa ons fa dän beesen” (Matäus 6:13, PB). Oba woo kaust du selfst doamet schaufen, nodäm daut du jebät hast?

2. Stoakj die derch Gott sien Wuat. “Gott sien Wuat läft un es kjraftich … Daut Wuat recht de Jedanken un Enstalungen em Hoat” (Hebräa 4:12, PB). Väle, waut ea groote Drinkja wieren, haft daut jeholpen, jieda Dach de Bibel to läsen un doaräwa notodenkjen. Een Psalmenschriewa säd: “Jesäajent es dee, dee de gottloose äaren Rot nich aunnemt,” … “oba siene Freid aun däm HARN sien Jesaz haft, un sikj Dach un Nacht doamet beschafticht. . . . Un am jelinjt wautemma hee deit” (Psalm 1:1-3, PB).

Allen kunn opphieren met too väl drinkjen, aus hee met Jehova siene Zeijen toop de Schreft studieed. Hee sajcht: “Ekj sie mie secha, daut de Schreft un de Gruntsauzen ut de Schreft mie jeholpen haben, opptohieren met drinkjen. Wan ekj daut nich haud, dan wia ekj doot.”

3. Lia daut, die to beoabeiden. De Schreft rät von soone enne Christenvesaumlunk, waut ea wieren Drinkja jewast un lota “derch dän Jeist von onsem Gott” rein jeworden wieren (1. Korinta 6:9-11, PB). Woo hauden dee daut kunt? Eenatlei wia, daut dee Selfstbeharschunk hauden. Daut es waut, waut eena derch Gott sienen heiljen Jeist kjricht, un doaderch kunnen dee opphieren met sea drinkjen un hauden uk nich mea schlajchte Fasten. De Bibel sajcht: “Bedrinkjt junt nich aun Wien, wuaderch jie de Kontroll äwa junt selfst velieren, oba woat voll vom Heiljen Jeist” (Efeesa 5:18, PB; Galata 5:21-23). Jesus Christus vespruak dit: “Jun Voda em Himmel, [woat] dee dän Heiljen Jeist jäwen, dee am doano froagen.” Doawäajen: “Froacht, un junt woat jejäft woaren” (Lukas 11:9, 13, PB).

Dee, waut Jehova deenen wellen un am schaftich moaken wellen, kjennen sikj selfst beharschen, wan dee de Bibel läsen un studieren un pinkjlich von Hoaten bäden. Enne Städ mootloos to woaren, denkj aun dit Vespräakjen von Gott sien Wuat: “Wäa oba seit dän Jeist to jefaulen, woat vom Jeist daut eewje Läwen arnten. Well wie nich meed woaren goodet to doonen, wiels wan wie nich mootloos woaren, woa wie arnten, wan daut ieescht Tiet doatoo es” (Galata 6:8-9, PB).

4. Sieekj die de rajcht Frind. “Wäa daut met weise Menschen helt, woat weis, oba wäa met Noaren vekjieet, woat Schoden lieden” (Spricha 13:20, PB). Lot diene Frind daut weeten, daut du die eenich best, nich mea too väl stoakjet to drinkjen. Oba Gott sien Wuat sajcht ons, wan wie opphieren met “drinkjen [un] supen” un opphieren met schlajchte Fasten haben, dan woaren eenje von de “väaje Frind sikj wundren . . . un see woaren uk äwa junt spotten un lachen” (1. Petrus 4:3-4, PB). Sie reed, von dee Frind wajchtobliewen, waut die tooroden, too väl to drinkjen.

5. Sat die Jrensen, woo väl du drinkjen west. “Stalt junt nich soo han aus dise Welt deit. Jie sellen derch june niee Jesennunk veendat woaren, daut jie weeten kjennen, waut Gott sien Wellen, waut goot, aunjenäm un volkomen es” (Reema 12:2, PB). Wan du die Jrensen satst, woo väl stoakjet du drinkjen west, dan denkj doaräwa no, waut de Schreft sajcht un nich doaräwa, waut diene Frind sajen, waut nich Jehova deenen. Wan du daut deist, dan woat Gott schaftich met die sennen. Oba woo kaust du weeten, woo väl daut baste es fa die?

Wan dien Vestaunt ieescht nich mea gaunz kloa es, dan es daut aul too väl stoakjet fa die. Sat die Jrensen, woo väl du drinkjen west, ea du aunfangst met stoakjet drinkjen un nich, wan du ieescht bedrunken best. Sie opprechtich doaräwa, woo väl du wurscht sellen drinkjen. Unjasto die daut, woo väl du vedroagen kaust un dan sie die gaunz eenich, nich mea to drinkjen.

6. Lia daut, “Nä” to sajen. “Lot jun jo, jo sennen, un jun nä, nä sennen” (Matäus 5:37, PB, von ons dunkel jemoakt). Wan aundre die aunbeeden, mea stoakjet to drinkjen, aus waut du vedroagen kaust, dan saj daut leeftolich auf. “Jun räden saul emma leeftolich un intressaunt sennen. Bemieecht junt, eenen jiedren soo to auntwuaten, daut daut goot fa am es” (Kolossa 4:6, PB).

7. Froag diene Famielje un Frind no Help. Goode Frind, waut uk Jehova leewen, woaren daut respakjten, wan du die eenich best, weinja to drinkjen. Soo, froag dee, daut see die halpen, dien drinkjen unja Kontroll to hoolen. “Twee sennen, es bäta aus auleen sennen; dee haben een scheengonen en daut waut see doonen. Wan eena hanfelt, dan halpt de tweeda däm opp” (Liera 4:9-10, PB; Jakobus 5:14, 16). Eene Organisazion enne Stäts, waut äwa Alkohol mesbrucken un drinkjen Rot jeft, sajcht: “Wan eena well noloten met drinkjen, dan kaun daut schwoa sennen. Doawäajen froag de Famielje un Frind no Help, daut du daut doonen kaust, waut du die väajenomen hast.”

8. Sie die eenich. “Jie motten oba uk doonen waut daut Wuat sajcht, wiels bloos hieren, rieekjt nich too, sest beschummel jie junt selfst. Wäa en daut volkomne Jesaz Gottes nenn kjikjt, waut ons frie moakt, wäa doabie blift un nich een vejätsoma hiera es, oba deit waut daut sajcht, dee woat bie sienem schaufen tofräd sennen” (Jakobus 1:22, 25, PB).

Doavon looskomen

Nich aule, waut too väl drinkjen, woaren von stoakjet aufhenjich. Oba wan eenje aunfangen, too väl to drinkjen ooda too foaken, dan woaren dee doavon aufhenjich. Wan een Mensch von stoakjet aufhenjich es un dee haustich opphieet met drinkjen, dan kaun daut sennen, daut dee krank woat un eenen Dokta mott no Help froagen. Allen sajcht: “Aus ekj mie daut drinkjen wull aufwanen, dan wort ekj opp iernst krank. Dan wort ekj en, daut ekj eenen Dokta must no Help froagen un daut bloos de Schreft studieren nich nuach deed.”

Väle, waut von drinkjen looskomen wellen un Jehova jefaulen wellen, motten biem Dokta no Help froagen. * Fa eenje es daut needich, daut dee en Hospitol sent un doa dan de rajchte Medizien kjrieen, daut dee daut stoakje dee Tiet nich soo sea foddat. Jesus säd: “De jesunde brucken dän Dokta nich; dän brucken mau de kranke” (Markus 2:17, PB).

Woo goot daut es, wan wie no Jehova horchen

Waut de Schreft äwa stoakjet drinkjen sajcht, kjemt von dän woaren Gott, waut daut baste fa ons well. Hee well nich, daut ons daut bloos nu scheen jeit, oba fa emma. Allen, waut aul fa 24 Joa nich mea jedrunken haft, sajcht: “Daut wia soo scheen to weeten, daut ekj mie kunn endren. Ekj hab daut jelieet, daut Jehova mie halpen wull, un hee wull daut haben, daut ekj mie endren sull. Daut to weeten, daut Jehova mie vestonen kunn un mie dee Help jeef, waut mie fäld, wia sea besonda.” Aus hee dit säd, kjeemen am de Tronen.

Wan du die daut hast aunjewant to drinkjen ooda von stoakjet aufhenjich best, dan kaust du doavon looskomen. Jeff nich opp, doa es Hopninj. Allen un väl aundre, waut doa wieren, wua du nu best, haben kunt aunfangen, weinja to drinkjen ooda gaunz von stoakjet wajchtobliewen. Dee haben daut nich beschot un du woascht uk nich.

Wan du die best eenich jeworden, met Mot stoakjet to drinkjen ooda verheipts nich, dan denkj aun Gott siene leewe Wieed, wan hee sajcht: “Wan du bloos hautst no miene Jebooten jehorcht, dan wurscht du Fräd jehaut haben, soo aus een Riefa, un Sachen wudden bie die soo rajcht stonen aus de Walen oppem Mäa” (Jesaja 48:18, PB).

[Footnooten]

[Kausten/​Bilt]

 Deit stoakjet drinkjen die kontrollen?

Denkj mol äwa dise Froagen no:

• Drinkj ekj nu mea, aus ekj ea deed?

• Drinkj ekj nu foakna, aus ekj ea deed?

• Drinkj ekj nu stoakjret?

• Mott ekj de Buddel haben, wan ekj mie äwafoddat feel ooda toom proowen, von Trubbels to vejäten?

• Haft een Frint ooda wäa von de Famielje mol jesajcht, daut ekj too väl drinkj?

• Haft drinkjen mie Trubbel jejäft, wan ekj tus sie ooda wan ekj bie de Oabeit sie ooda hinjawäajes sie?

• Wudd daut schwoa sennen fa mie, eene Wäakj onen stoakjet to sennen?

• Es daut schwoa fa mie, met soone toop to sennen, waut nich wellen stoakjet drinkjen?

• Proow ekj daut plietsch to hoolen, woo väl stoakjet ekj drinkj?

Wan du to eent ooda to mea Froagen “Jo” sajchst, dan es daut nu Tiet, waut doamet to doonen, daut du daut drinkjen unja Kontroll helst.

[Kausten/​Bilt]

Woo kaun eena goode Entscheidungen moaken äwa stoakjet drinkjen

Ea du stoakjet drinkjst, denkj äwa dit no:

• Es daut goot fa mie, wan ekj stoakjet drinkj, ooda sull ekj mie doavon wajchhoolen?

Hia es een Rot: Wan du nich kaust met Mot drinkjen, dan doo verheipts nich.

• Woo väl wudd ekj sellen drinkjen?

Hia es een Rot: Ea du waut stoakjet drinkjst, sie die aul eenich, woo väl du drinkjen kaust.

• Wanea woa ekj drinkjen?

Hia es een Rot: Drinkj nich verem foaren ooda wan du saust bie de Sach sennen. Drinkj uk nich ver du jeistelje Sachen deist uk nich, wan du schwanga best uk nich, wan du wesse Medizien brukst.

• Wua woa ekj drinkjen?

Hia es een Rot: Drinkj nich opp soone Städ, wua de Menschen sikj nich natieedlich oppstalen, un doo uk nich em plietschen drinkjen un uk nich ver Menschen, waut daut baudat.

• Met wäm woa ekj toop drinkjen?

Hia es een Rot: Met Frind un Famielje, waut uk nich too väl drinkjen un nich met soone, waut Trubbel haben met drinkjen.

[Kausten/​Bilt]

Gott sien Wuat holp eenem, waut ieeschtemma een Drinkja wia

Supot, waut en Tailaunt wont, drunk sea. Aum Aunfank drunk hee bloos zeowes, met de Tiet funk hee uk aun, zemorjes to drinkjen un uk noch opp Meddach. Foaken deed hee bloos drinkjen toom sikj besupen. Oba aus hee aunfunk, met Jehova siene Zeijen toop to studieren, lieed hee, daut Jehova Gott daut nuscht jleicht. Soo, hee hieed opp met drinkjen. Oba met de Tiet jinkj hee wada trigj no siene Drinkjen-Jewanheit. Siene Famielje wia daut sea schod.

Oba Supot leewd Jehova un wull am rajcht deenen. Siene Frind holpen am un rooden siene Famielje too, mea Tiet met am toop to sennen un nich opptohieren, am to halpen. Woo kunn hee dan entlich opphieren met drinkjen? De Wieed von 1. Korinta 6:10 (PB) holpen am. Daut sajcht doa, daut dee, waut “drinkjen, . . . woaren daut Gottesrikj nich oawen”. Dee Varsch haft am jeholpen to seenen, woo wichtich daut wia. Dan wia am daut dietlich, daut hee sea must doaraun schaufen, daut hee kunn opphieren met drinkjen.

Ditmol wia Supot sikj gaunz eenich, daut hee wudd opphieren met stoakjet drinkjen. Met de Tiet un met de Krauft von Gott sienen heiljen Jeist un Gott sien Wuat un met de Help von de Famielje un de Vesaumlunk kunn Supot met daut opphieren. Siene Famielje freid sikj sea, aus hee sikj haud Gott hanjejäft un sikj deepen leet. Supot freit sikj uk, daut hee nu kaun Frind sennen met Gott, soo aus hee daut noch emma haud wult un daut hee siene Tiet nu kaun brucken toom aundre uk halpen, Jehova kjanen to lieren.