Kuakjes fa miene kjliene Hunj
NICK, waut en Oregon, Stäts wont, schreef: “Aum Aunfank vonne 2014 jinkj ekj en miene Staut, wua ekj oppjewossen sie, opp eene Sauz delenjd de Gauss met miene twee kjliene Hunjkjes. De Zeijen wieren jeweenlich emma enne Medd von de Staut un stunden biesied äare Bieekjakrotasch. Dee wieren schmock aunjetrocken un kjikjten to aulem schaftich, waut doa vebie jinjen.
De Zeijen wieren nich bloos frintlich to de Menschen, oba uk to miene Hunj. Eenen Dach jeef Elaine, waut biesied dän Bieekjakrota stunt, miene kjliene Hunjkjes waut Kuakjes toom fräten. Von dan aun wullen de Hunj emma no dän Bieekjakrota, wua de Zeijen wieren, daut dee an sullen waut to fräten jäwen.
En de näakjste Moonaten jleichten miene Hunjkjes daut emma sea, daut see äare Kuakjes kjrieejen, un ekj jleicht daut, daut ekj mie emma kunn een Stootje met de Zeijen unjahoolen. Oba ekj wull nich too frintlich sennen to dee. Ekj wia aul äwa 70 Joa oolt, un ekj wist nich soo rajcht, waut de Zeijen jleewden. Wäajen ekj von eenje Kjoakjen aunjeschmäat wia, docht ekj soo, daut wia bäta, wan ekj fa mie selfst bloos de Bibel studieed.
En dise Tiet sach ekj uk aundre Zeijen, waut opp aundre Städen von de Staut wieren un biesied äare Bieekjakrotasch stunden. Dee wieren uk emma sea frintlich. Dee beauntwuaten miene Froagen emma met de Schreft un doaderch kjrieech ekj mea Vetruen opp dee.
Eenen Dach fruach Elaine mie: ‘Jleew jie, daut de Tieren een Jeschenkj von Gott sent?’ Ekj säd: ‘Jo secha, daut jleew ekj.’ Dan läsd see mie Jesaja 11:6-9 väa. Von doa aun wull ekj mea ut de Schreft lieren, oba ekj wull noch nich waut toom läsen haben von dee.
En de näakjste Doag haud ekj dan sea goode Unjahoolungen met Elaine un äaren Maun Brent. Dee säden to mie, daut ekj mol sull von Matäus bat Aposteljeschicht läsen toom bäta vestonen, waut doa met en wia, een Christ to sennen. Daut deed ekj dan. Nich lang no daut, wia ekj dan doamet envestonen, daut Brent un Elaine met mie de Bibel studieeden. Daut wia em Somma aune 2016.
Ekj freid mie aul jieda Wäakj to daut Bibelstudium un daut ekj kunn bie de Toopkomes em Vesaumlungshus sennen. Ekj wia sea schaftich, daut ekj nu kunn lieren, waut de Bibel werkjlich säd. Een bät mea aus een Joa lota leet ekj mie dan aus eent von Jehova siene Zeijen deepen. Nu sie ekj 79 Joa un ekj weet, daut ekj opp dän rajchten Wajch sie. Jehova haft mie sea jesäajent, wäajen ekj nu kaun Poat von siene Famielje oppe gaunze Welt sennen.”
Veleicht jleichst du uk dit
WAUT FOAKEN JEFROACHT WOAT
Woo es een Bibelstudium met Jehova siene Zeijen?
Wan Jehova siene Zeijen emsonst met die de Bibel studieren, dan kaust du soone Bibel brucken, aus du west. Doa kaun diene gaunze Famielje met bie sennen un uk Frind, wan du dee enloden west.
