HAST DU MOL SOO JEDOCHT, WUA GOTT WIA, AUS DOA WAUT SCHLEMMET PASSIEED OODA AUS DU SELFST MOL WAUT SCHLEMMET BELÄWSD? HAST DU MOL JEDOCHT, AUS GOTT SIKJ WERKJLICH OM DIE KJEMMAT?

Veleicht hast du die mol soo jefeelt aus Sheila, waut enne Stäts wont. See woss en eene Famielje opp, waut stoakj aun Gott jleewd. See sajcht: “Von kjlien aun jleicht ekj Gott, wiels hee haft je ons jemoakt, oba ekj feeld mie kjeenmol sea dicht bie am. Ekj docht emma, hee beoobacht mie bloos von wiet auf. Ekj feeld mie nich soo, aus wan hee mie schlajcht lieden kunn, oba uk nich, daut hee om mie bekjemmat wia.” Wuarom twieweld Sheila, aus Gott ar leewd? See sajcht: “Miene Famielje jinkj eene schwoare Loag no de aundre derch un daut späad sikj soo, Gott holp ons doa nich met.”

Veleicht best du die krakjt soo secha aus Sheila, daut et dän aulmajchtjen Gott jeft, oba veleicht twiewelst du, aus hee werkjlich om die bekjemmat es. Mau rajcht de trua Hiob haud uk soone Twiewel, wan hee uk Gloowen haud aun Gott siene Weisheit un Macht (Hiob 2:3; 9:4). Nodäm daut Hiob eene schwoare Loag no de aundre derchjemoakt haud, un daut nich doano sach, daut daut wudd bäta woaren, fruach hee Gott: “Wuarom latst du die nich seenen, un deist, aus wan ekj dien Fient sie?” (Hiob 13:24).

Waut sajcht de Schreft? Es daut Gott siene Schult, wan doa waut schwoaret oppkjemt? Jeft daut Bewies, daut Gott sikj om de Menschen kjemmat, uk om jieda eenen von ons? Kaun een jiedra eena von ons daut weeten, aus Gott om ons todoonen es, aus hee ons vestonen kaun, aus hee met ons metfeelen kaun ooda daut hee ons halpt, wan wie Trubbels haben?

En de näakjste Artikjels woa wie seenen, woo de Schepfunk wiest, daut Gott om ons bekjemmat es (Reema 1:20). Dan woa wie uk seenen, woo Gott sien Wuat ons daut wiest. Je bäta wie am kjanen lieren derch de Schepfunk un derch sien Wuat, je sechra kjenn wie ons sennen, daut Gott om ons bekjemmat es (1. Johanes 2:3; 1. Petrus 5:7).