Horcht Gott no onse Jebäda?
Haft sikj die daut mol soo jespäat, daut Gott nich no diene Jebäda horcht? Wan jo, dan best du nich de eensja. Väle haben bie Gott no Help jefroacht, oba dee haben noch emma Trubbels. Meent daut dan, daut Gott doa nuscht om romjeft, wan wie bäden? Nä, wiels de Schreft vesprakjt, daut Gott no ons horchen woat, wan wie opp de rajchte Wajch bäden. Well wie mol seenen, waut de Schreft doatoo sajcht.
GOTT HORCHT WERKJLICH NO ONS
“Du hieescht onse Jebäda, doawäajen kjemt aulemaun no die” (Psalm 65:3)
Eenje Menschen bäden, bloos wiels dee sikj dan bäta feelen, oba jleewen nich werkjlich, daut Gott an toohorcht. Oba bäden halpt ons nich bloos, daut wie ons bäta feelen, wan wie Trubbels haben. De Schreft sajcht, daut Jehova * “aul dee noaun [es], dee am aunroopen, aul dee, dee am en Woarheit aunroopen. . . . Hee hieet wan see schrieen un halpt an” (Psalm 145:18-19).
Wie kjennen ons secha sennen, daut Jehova Gott no siene Deena horcht, wan dee bäden. Hee sajcht leeftolich: “Dan woa jie mie aunbäden, un jie woaren komen un mie froagen, un ekj woa no junt horchen” (Jeremia 29:12).
GOTT WELL, DAUT WIE TO AM BÄDEN
“Siet . . . aunhoolent em Jebäd” (Reema 12:12)
De Schreft rot ons too, daut wie emma bäden sellen. Daut wiest, daut Jehova Gott well, daut wie daut doonen (Matäus 26:41; Efeesa 6:18).
Wuarom well Gott daut? Na, een Voda freit je sikj, wan sien kjlienet Kjint sajcht: “Pape, west mie een bät halpen?” Secha weet de Voda aul, waut daut Kjint fält. Oba wan daut Kjint am frajcht, dan weet de Voda, daut dee sikj opp am velat un am väl räakjent. Krakjt soo es daut bie Jehova Gott. Wan wie am no waut froagen, dan weet hee, daut wie opp am vetruen un am wellen noda komen (Spricha 15:8; Jakobus 4:8).
GOTT ES SEA OM ONS BEKJEMMAT
“Schmiet aul june Sorjen opp am; hee sorcht fa junt” (1. Petrus 5:7)
Gott well, daut wie to am bäden, wiels hee ons leeft un om ons bekjemmat es. Hee weet krakjt, waut wie fa Sorjen un Trubbels haben, un well ons halpen.
De Kjennich David fruach Jehova Gott emma no Help un säd am, waut hee oppem Hoaten haud (Psalm 23:1-6). Woo docht Gott äwa David? Hee leewd David un horcht no dän siene Jebäda (Aposteljeschicht 13:22). Krakjt soo woat Gott uk no onse Jebäda horchen, wiels hee om ons bekjemmat es.
“EKJ SIE DÄN HARN GOOT, WIELS HEE HIEED MIE”
Dise Wieed sent ut eenen Psalm von de Bibel. Deejanja, waut dit schreef, wia sikj secha, daut Gott no siene Jebäda horcht, un daut jeef am väl Moot. Hee feeld sikj dolla met Gott vebungen un kunn met siene Sorjen un Trubbels foadich woaren (Psalm 116:1-9).
Wan wie ons secha sent, daut Gott no onse Jebäda horcht, dan woa wie aunhoolent bäden. Krakjt daut deed uk Pedro, waut em Nuaden von Spaunien wont. Sien 19-joascha Sän kjield doot, aus dee een Ojjlekj haud. Pedro bäd emma wada, daut Gott am treesten un halpen sull, un vetald Gott aules, woo hee sikj feeld. Woo kjeem daut ut? Pedro sajcht: “Jehova beauntwuad miene Jebäda doaderch, daut de Gloowesbreeda mie un miene Fru treesten un halpen deeden.”
Foaken beauntwuat Gott onse Jebäda derch leeftolje Frind, waut ons treesten un biestonen
Woo holp daut Jebäd Pedro un siene Famielje? De Sän kjeem je nich wada toom läwen, oba Pedro siene Fru María Carmen sajcht: “Daut bäden holp mie, met mienen Trua foadich to woaren. Ekj wist, daut Jehova Gott mie vestonen kunn, wiels wan ekj bäd, dan feeld ekj mie gaunz ruich.”
Daut, waut de Schreft sajcht, un waut aundre beläft haben, wiest ons dietlich, daut Gott no onse Jebäda horcht. Un doch es daut soo, daut Gott nich aule Jebäda erhieet. Wuarom horcht Gott no eenje Jebäda un no aundre nich?
^ Varsch 5 Jehova es Gott sien Nomen (Psalm 83:18, NW).
