Wäa woat nom Himmel komen?
Waut de Schreft doatoo sajcht
Gott haft eene jewesse Somm true Christen jewält, daut dee no äaren Doot oppstonen woaren toom em Himmel läwen (1. Petrus 1:3-4). Nodäm daut dee fa äa Läwen em Himmel utjewält sent, motten dee uk wieda soo läwen, aus sikj daut fa eenen Christ jehieet (Efeesa 5:5; Filippa 3:12-14).
Waut woaren dee, dee nom Himmel komen, doa doonen?
Dee woaren met Jesus toop aus Kjennichs un Priesta fa 1 000 Joa rejieren (Openboarunk 5:9-10; 20:6). Daut es de niea “Himmel”, ooda de himlische Rejierunk, waut äwa de “niee Ieed”, ooda de Menschen oppe Ieed, rejieren woat. Dise Rejierunk woat de Menschen dan halpen soo to läwen, aus Gott daut von Aunfank aun haben wull (Jesaja 65:17, PB; 2. Petrus 3:13).
Woo väl woaren oppstonen toom em Himmel läwen?
De Schreft wiest, daut 144 000 Menschen woaren oppstonen toom em Himmel läwen (Openboarunk 7:4). De Apostel Johanes sach en eene Vision “daut Laum opp däm Zions Boajch stonen, un met am 144.000”, soo aus daut en Openboarunk 14:1-3, (PB) sajcht. En dise Vision stalt “daut Laum” Jesus väa, dee vom Doot oppstunt (Johanes 1:29; 1. Petrus 1:19). De “Zions Boajch” stalt de huage Stalunk väa von Jesus un de 144 000, waut met am toop em Himmel rejieren (Psalm 2:6; Hebräa 12:22).
De Beroopne un Utjewälde, waut met Christus toop en sien Kjennichrikj rejieren, woaren uk “kjliene Häad” jenant (Openboarunk 17:14; Lukas 12:32, PB). Daut wiest, daut daut mau weinich sent em Vejlikj met aul Jesus siene Schop (Johanes 10:16).
Waut eenje orrajcht jleewen äwa dee, waut nom Himmel komen
Waut eenje jleewen: Aule goode Menschen komen nom Himmel.
Woo daut es: Gott vesprakjt, daut de mieeschte goode Menschen woaren eewjet Läwen kjrieen oppe Ieed (Psalm 37:11, 29, 34).
Jesus säd: “Noch es kjeena nom Himmel jefoaren” (Johanes 3:13, PB). Hee muak doaderch dietlich, daut de goode Menschen, waut ver am jestorwen sent, soo aus Abraham, Moses, Hiob un David, nich nom Himmel jefoaren sent (Aposteljeschicht 2:29, 34). Enne Städ daut haben dee de Hopninj hia oppe Ieed wada opptostonen (Hiob 14:13-15).
Daut oppstonen toom em Himmel läwen woat “daut ieeschte Oppstonen” jenant (Openboarunk 20:5-6, PB). Dit bediet, daut woat noch een aundret oppstonen jäwen. Dit woat oppe Ieed sennen.
De Schreft lieet, “doa woat kjeen Doot … mea sennen”, wan Gott sien Kjennichrikj rejieet (Openboarunk 21:3-4, PB). Dit Vespräakjen mott sikj hia oppe Ieed erfellen, wiels em Himmel haft daut dän Doot noch kjeenmol jejäft.
Waut eenje jleewen: Jieda Mensch kaun selfst wälen, aus hee woat daut Läwen em Himmel ooda oppe Ieed kjrieen.
Woo daut es: Daut es Gott siene Sach to bestemmen, woone true Christen “dän Pries” kjrieen, aulsoo de Hopninj mol em Himmel to läwen (Filippa 3:14, PB). Endoont woo sea wie ons daut wenschen ooda woo sea wie ons aunstrenjen, wie kjennen nich selfst entscheiden, aus wie Gott woaren em Himmel ooda oppe Ieed deenen (Matäus 20:20-23).
Waut eenje jleewen: Daut eewje Läwen oppe Ieed es weinja wieet un daut kjrieen bloos dee, waut daut nich wieet sent em Himmel to läwen.
Woo daut es: Gott nant dee, waut daut eewje Läwen oppe Ieed kjrieen, “mien Volkj”, “miene jewälde” un hee sajcht: “See woaren unja mienen Säajen sennen” (Jesaja 65:21-23, PB). Dee haben de Mäajlichkjeit Gott sienen Wellen uttofieren, waut hee von Aunfank aun fa de Menschen jehaut haft: Daut de Menschen fa eewich en een Paradies hia oppe Ieed läwen woaren (1. Mose 1:28; Psalm 115:16; Jesaja 45:18).
Waut eenje jleewen: Wan daut en de Openboarunk von 144 000 rät, es daut bloos een Jlikjnis un nich werkjlich eene Zol.
Woo daut es: En de Openboarunk sent väl Nummasch aus Jlikjnis to vestonen. Oba daut jeft uk Nummasch, waut wuatlich to vestonen sent. Toom Biespel rät daut von “daut Laum siene 12 Apostel äare Nomes” (Openboarunk 21:14, PB). Wuarom kjenn wie dan sajen, daut de Zol 144 000 wuatlich to vestonen es? See wie mol waut Bewies.
En Openboarunk 7:4 (PB) sajcht daut, daut “de Zol, wooväl doa wieren jetieekjent worden [ooda utjewält, om em Himmel to läwen] … 144.000” wia. Lota en dautselwje Kapitel rät daut oba noch von eene aundre Häad: “Eene Häad, dee kjeena talen kunn”. Un dise groote Häad woat uk von Gott jerat (Openboarunk 7:9-10, PB). Wan wie de Zol 144 000 nich wuatlich neemen un nich wisten, woo väl daut wieren, dan wudd je daut kjeenen Unjascheet jäwen tweschen dise Grupp un de groote Häad, waut kjeena talen kaun. a
Un dan sajcht daut uk noch von de 144 000: “Dee sent von mank de Menschen loosjekoft aus Ieeschtlinjsfrucht” (Openboarunk 14:4, PB). Daut Wuat “Ieeschtlinjsfrucht” moakt dietlich, daut daut een kjlienet Poat von daut groote es. Dit beschrift paussent deejanje, waut met Jesus toop em Himmel äwa aul de Menschen oppe Ieed rejieren woaren (Openboarunk 5:10).
a Krakjt dit säd uk Professa Robert L. Thomas äwa de Zol 144 000 en Openboarunk 7:4. Hee schreef: “Hia rät daut von eene bestemde Zol, un nich soo aus en [Openboarunk] 7:9, wua eena nich weet, woo väl daut sent. Wan wie dise Zol nich wudden wuatlich nämen, dan wudd wie kjeene Zol en dit Bibelbuak kjennen wuatlich nämen” (Revelation 1-7: An Exegetical Commentary, Sied 474).
Veleicht jleichst du uk dit
WICHTJE BIBLISCHE LIEREN
Waut es Gott sien Kjennichrikj?
Aus Jesus oppe Ieed wia, lieed hee aundre mea äwa Gott sien Kjennichrikj aus äwa aundret. Aul hundade Joaren haben siene Nofolja om dit Kjennichrikj jebät.
BIBLISCHE LIEREN
Fang een Bibelstudium aun
Du kaust een Studium haben met dienen ieejnen Bibelliera un daut kost nuscht.