Aus Gott de Menschen muak, muak hee daut soo, daut bloos een Maun un eene Fru, waut befriet sent, kjennen Sex haben (1. Mose 1:27-28; 3. Mose 18:22; Spricha 5:18; 5:19, JHF). De Schreft sajcht daut gaunz auf, daut Mana met Mana ooda Frues met Frues (homoseksuelle) ooda Onbefriede kjennen Sex haben (1. Korinta 6:18). Doa es met en, jeschlajchtlich toopkomen uk toom Mul ooda to hinjen ooda wäm sien Jeschlajcht aunfoten toom dän oppreizen.

 Wan de Schreft daut uk nich fa rajcht talt, wan Mana met Mana ooda Frues met Frues Sex haben, sajcht dee oba nich, daut wie soone sellen haussen ooda schlajcht behaundlen. Enne Städ daut woat Christen toojerot, “aule Menschen Respakjt” to jäwen (1. Petrus 2:17, PB).

 Kaun een Mensch homoseksuell jebuaren woaren?

De Schreft sajcht nich krakjt, aus eena soo aus dit kaun jebuaren woaren, oba dee sajcht, daut aule Menschen daut von Jeburt aun en es, jäajen Gott siene Jebooten to gonen (Reema 7:21-25). Wan de Schreft uk nich krakjt sajcht, von wua soon Wensch häakjemt, sajcht dee daut oba auf, daut Mana met Mana ooda Frues met Frues doonen.

 Woo kaun eena Gott jefaulen, wan eena uk een homoseksuellet Velangen haft?

De Schreft sajcht: “Doawäajen moakt aules en junt doot waut von june sintliche Natua kjemt, de Huararie” (Kolossa 3:5, PB). Woo kaun eena eenem siene sintelje Natua, ooda een orrajchtet Velangen, dootmoaken? Doatoo mott eena siene Jedanken unja Kontroll hoolen. Wan eena pinkjlich äwa goodet nodenkjt, dan es daut leichta, schlajchte Jedanken auftoschuwen, wan dee oppkomen (Filippa 4:8; Jakobus 1:14-15). Daut kaun aum Aunfank sea schwoa sennen, oba met de Tiet woat daut veleicht leichta. Gott vesprakjt ons to halpen, “vom Grunt opp en Seel un Senn, niee Menschen [to] woaren” (Efeesa 4:22-24, PB).

 Millionende Menschen, waut no de Schreft no läwen wellen, motten uk jäajen jewesset Velangen schaufen. Biejlikj soone, waut sikj wellen befrieen, oba nich eenen paussenden Ehepoatna finjen ooda soone, waut befriet sent, oba eena von de Ehepoatna wäajen irjentwaut nich mea kaun Sex haben. Aul soone hoolen äa Velangen doawäajen unja Kontroll, wan daut uk nich emma leicht es. Un dee kjennen doawäajen noch schaftich sennen. Un uk soone, waut een homoseksuellet Velangen haben, kjennen sikj unja Kontroll hoolen, wan dee werkjlich Gott jefaulen wellen (5. Mose 30:19).