Woo väl Nomes haft Gott?
Waut de Schreft doatoo sajcht
Gott haft bloos eenen eensjen Nomen. Opp Hebräisch woat daut soo יהוה jeschräwen. Opp Plautdietsch woat jeweenlich “Jehova” jesajcht. a Derch dän Profeet Jesaja säd Gott: “Ekj sie Jehova. Daut es mien Nomen” (Jesaja 42:8, NW). Gott woat enne Schreft veschieden jenant, oba daut foakenste woat am bie sienen Nomen jenant. Bie 7 000 Mol kjemt dee en oole Schreftrollen väa. Daut es noch väl foakna aus irjent sest een Nomen. b
Jeft daut noch aundre Nomes fa Jehova?
Wan de Schreft fa Gott uk bloos eenen Nomen brukt, woat hee doch veschieden jenant. Hia es eene List von Wieed, woo hee jenant woat un waut ons daut äwa Jehova lieet.
Woo hee jenant woat |
Bibelvarsch |
Bediedunk |
|---|---|---|
Allah |
(Kjeena) |
Dit kjemt von een arabischet Wuat, waut “Gott” bediet; daut es nich een Nomen. En arabische Bibeläwasatungen un uk opp aundre Sproaken woat daut Wuat “Allah” fa “Gott” jebrukt. |
Dee aule Macht haft |
1. Mose 17:1 |
Kjeena un nuscht haft mea Macht aus hee. De hebräische Wieed El Schaddáj, waut “Aulmajchtja Gott” bedieden, komen säwen Mol enne Schreft väa. |
Daut A (Alfa) un daut O (Omega) |
Openboarunk 1:8; 21:6; 22:13, JHF |
“De Ieeschta un de Latsta” ooda “de Aunfank un daut Enj”. Daut meent, daut et kjeenen aulmajchtjen Gott ver Jehova jeef un doa woat uk kjeena no am sennen (Jesaja 43:10). Alfa es de ieeschte Lata von daut griechische Aubeetsee un Omega es de latste Lata. |
Däm siene Doag nich to talen sent |
Daniel 7:9, 13, 22 |
Hee haud kjeenen Aunfank. Am jeef daut aul von eewich, ea doa irjent sestwaut ooda sestwäa wia (Psalm 90:2). |
Erschaufa (Schepfa) |
Jesaja 40:28, JHF |
Dee aules jemoakt haft. |
Voda |
Dee, waut daut Läwen jeft. |
|
Gott |
1. Mose 1:1 |
Waut, waut doa aunjebät woat; een Stoakja. Daut hebräische Wuat Elohím wiest, daut Jehova groosoatich un harlich es un Iea traft. |
Gott äwa aule Jetta |
5. Mose 10:17 |
De hechsta Gott; nich soo aus de Jetta, waut nuscht daugen un von eenje Menschen aunjebät woaren (Jesaja 2:8). |
Erheara de Jebäda |
Psalm 65:3, JHF |
Hee horcht selfst no jieda Jebäd, waut em Gloowen to am jebät woat. |
Ekj sie, dee ekj sie |
2. Mose 3:14, PB |
Hee woat to aules, waut doa needich es, daut sien Wellen sikj erfelt. Dise Wieed sent uk mol soo aus dit äwasat worden: “Ekj woa to daut woaren, waut mie jankat” ooda “Ekj woa to daut woaren, waut ekj well” (The Emphasised Bible, by J. B. Rotherham; NW). Dit halpt ons fein, dän Nomen Jehova to vestonen, waut en dän näakjsten Bibelvarsch väakjemt (2. Mose 3:15, NW). |
Iewaja |
2. Mose 34:14, JHF |
Hee kaun daut nich vedroagen, daut se sestwäm ooda sestwaut aunbäden. Dit es uk äwasat worden met “velangt onjedeelde Ieaforcht” un “es bekaunt doafäa, daut se bloos am aunbäden un deenen sellen” (PB, NW). |
Eewja Kjennich |
1. Timotäus 1:17 |
Siene Rejierunk haft kjeenen Aunfank un uk kjeen Enj. |
Har |
Psalm 135:5 |
Ieejendeema ooda Wieet; opp Hebräisch Adón un Adoním. |
Gott de Häaschoa, Harr Zeebaot |
Jesaja 1:9, JHF; Reema 9:29, JHF |
Hee sajcht de Häaden Enjel, waut dee doonen sellen. De Wieed “Har Zeebaot” kjennen uk met “Jehova von de Armeeen” un “Har von de [himlische] Armeeen” äwasat woaren (Reema 9:29, NW; NET Bible, Footnoot). |
Aulahejchsta |
Psalm 47:2, NTR |
Dee, waut de gaunz hechste Städ haft. |
Toppstrikja |
Jesaja 64:7 |
Hee haft de Macht äwa eenselne Menschen un äwa Velkja, krakjt soo aus een Toppstrikja äwa dän Leem (Reema 9:20-21). |
Rada, Erleesa |
Jesaja 41:14; PB, JHF |
Hee moakt de Menschen von Sind un Doot frie derch daut Opfa von Jesus Christus (Johanes 3:16). |
Steen |
Psalm 18:3; 18:46, NTR |
Eene sechre Städ, wua eena Radunk finjen kaun. |
Hoad |
Psalm 23:1 |
Sorcht fa siene Deena. |
HAR, dee aules rejieet |
Jesaja 1:9 |
Haft de hechste Macht; opp Hebräisch Adonáj. |
De Hechsta |
Daniel 7:18, 27 |
De gaunz hechsta Harscha. |
Nomes von Städen en de Hebräische Schreften
En eenje Nomes von Städen en de Schreft es Gott sien Nomen bennen, oba daut sent nich aundre Nomes fa Gott.
Nomen von de Städ |
Bibelvarsch |
Bediedunk |
|---|---|---|
Jahwe Jire |
1. Mose 22:13-14 |
Jehova woat doano seenen. |
Jehova-Nissi |
2. Mose 17:15, NW |
“Jehova es mien Tieekjenpol” ooda “miene Tieekjenflag” (Today’s New International Version). Jehova es een Gott, no dän sien Volkj komen kaun, om Schutz un Help to kjrieen (2. Mose 17:13-16). |
Jehova-Schalom |
Rechta 6:23-24, NW |
“Jehova es Fräd”. |
Jehova-Schammah |
Hesekiel 48:35, Footnoot, American Standard Version |
“Jehova es doa”. |
Wuarom wie Gott sienen Nomen kjanen un brucken sellen
Gott mott sienen Nomen, Jehova, fa sea wichtich talen, wiels hee haft dän loten dusende Mol enne Schreft oppschriewen (Maleachi 1:11).
Gott sien Sän, Jesus, wees emma wada, woo wichtich Gott sien Nomen wia. Hee bäd biejlikj to Jehova un säd: “Dien Nomen saul heilich jehoolen woaren” (Matäus 6:9, PB; Johanes 17:6).
Gott sienen Nomen kjanen lieren un dän brucken es daut ieeschte, woo eena kaun met Jehova Frind woaren (Psalm 9:11; Maleachi 3:16). Gott vesprakjt siene Frind väl goodet. Hee sajcht: “Wiels hee mie goot es, . . . woa ekj am uthalpen. Wiels hee mienen Nomen kjant, woa ekj am bewoaren” (Psalm 91:14, PB; von ons dunkel jemoakt).
Daut es soo, aus de Schreft sajcht: “Daut jeft woll soone em Himmel ooda oppe Ieed, dee Jetta jenant woaren, soo aus daut werkjlich väl Jetta un väl Jewaulten jeft” (1. Korinta 8:5-6, PB). Oba de Schreft sajcht gaunz dietlich, woo de woara Gott heet, un daut es Jehova (Psalm 83:18, NW).
Veleicht jleichst du uk dit
WAUT SAJCHT DE SCHREFT ÄWA ...?
Wäa es Jehova?
Es daut de Gott von bloos een Volkj, soo aus de Israeliten?
WICHTJE BIBLISCHE LIEREN
Haft Gott eenen Nomen?
Gott woat veschieden jenant, biejlikj Aulmajchtja, Schepfa ooda Har. Oba en de Bibel steit uk äwa 7000 Mol Gott sien Nomen bennen.
MEA ÄWA ONS
West du met ons räden?
Räd äwa eene biblische Froag ooda lia mea äwa Jehova siene Zeijen.