Ongeru el Ker: Ngera mo Duubech Sel Kmad?

SERA dirk lekekerei el buik a Roman e a sechelil a mlad er a accident er a mlai. Me ngdmu el kmo, “Ngkmal mlo mekngit a renguk er a kodellel a sechelik. Me ngmle betok el rak el kulatk el kmo ngera mo duubech el me er kid sel demad.”

Ngera uchul me kede oker a ker? A kodall a diak el kirel el ngar er ngii el tekoi. Me a demechuodel me a lechub e kede dirk ngeasek me ngdi diak a ta er kid el soal el mad. A rebetok a medakt er a tekoi el mo duubech er a uriul er a lemad.

Ngerang a nger er a rebebil? A rebetok a oumerang el kmo sel lemad a chad e ngngar er ngii a kmung ngerang el tuobed er a bedengel e melemolem el ngar. Te oumerang el kmo a rungil el chad a mo kiei er a eanged, e tirke el mekngit a mo obals el kirel a kngterir el diak a ulebengelel. E a rebebil a omdasu el kmo a chad sel lemad e ngdi mo diak e a cherengel a taem e ngmo diak a melatk er ngii.

Ngera belkul a nger er tir? Sel kot el nger a belkul a kmo a chad el mad a diak el mera el mad. E sel ongeru el nger a belkul a kmo a klengar a diak a belkul, a uchul me a rechad a omdasu el kmo: “Di dongang e dolim ele kede mo mad er a klukuk.”​—1 Korinth 15:32.

Ngera ngolisechakl a Biblia? A Biblia a diak lolisechakl el kmo ngngar er ngii a kmung ngerang el tuobed er a bedengel a chad e melemolem el ngar er a uriul er a lemad. A Dios a ulemekrael er a King el Salomon el meluches el kmo: “A re chad a medengei el kmo te mo mad, e ngdi rulekoad a diak a ngeral lodengei.” (Olisechakl 9:5) Me a rulekoad a diak el sebechir el omelechesiu me a lechub e loruul a ngii di lengerang. Me ngdiak el sebechir el olengeseu me a lechub e lolemall er a rechad.

A rebetok a diak lodengei el kmo ngkmal dimlak el moktek er a Dios el soal a lemad a rechad. A kot el chad el Adam a mla er ngii a techellel el kiei er tia el chutem el mo cherechar. E a Dios a di milsaod er a kodall el kmo ngmo belsel a lsekum ngmo diak lolengesenges e kolii a redechel a ta el kerrekar. (Genesis 2:17) Me a lsekum a  Adam me a Eva a ullengesenges er a Dios, e tir me a rokui el uldidellel a rsechir el ullengesenges er a Dios a mle sebechir el kiei er tia el chutem el diak a ulebengelel.

A Adam a mlo er a klengit er sera bo lak lolengesenges er a Dios, me ngmlad. (Rom 6:23) Me sera lemad, e ngdimlak a ngerang el tuobed er a bedengel e lolemolem el ngar. A Dios a dilu er a Adam el kmo: “Ke mo kesib e mo meringel el oureor el omekdubech a dellomel el dimerkmo cho mluut el mor a chutem el ngii cho mlengai er ngii. Ele kau a ulebeob er a chutem, me ke lmuut el mo chutem.” (Genesis 3:19) Me a rokui el chad a mludiukes er a klengit me a kodall e le tir el rokui a di ngelekel a Adam.​—Rom 5:12.

Me alta e a Adam a mlo diak lolengesenges, engdi a Dios a mo otutii a moktek er ngii el soal a rengelekel a Adam a bo lekiei er tia el chutem. (Genesis 1:28; Isaia 55:11) Ngdi kmedung e a Jehovah a mo olekiis er a ruumesingd el chad el mla mad. A apostol el Paulus a mesaod el kirel sel taem el kmo: “A rokui el chad, el ungil ma re mekngit, a mo mekiis er a kodall.”​—Rellir 24:15.

A Roman, el dulsaod er ngii er a uchei, a milsuub er a Biblia e mlo medengei a omesodel el kirel a kodall me a Jehovah el Dios. Me ngkmal mlo mechas a rengul er a tekoi el lesiluub.

A lsoam a lmuut el betok el omesodel a tekoi el kirel a kodall, e momes er a 6 el bliongel er a babier el Ngerang Mera el Lolisechakl a Biblia? Ngsebechem el download er tia el babier er a www.jw.org

[Baks el ngar er a 7 el llel]

Ngera Ngdilung a Jesus el Kirel a Kodall?

A Jesus a dimlak lekengei a tekingir a remengeteklel a klechelid el kmo ngdiak a okiis er a rulekoad. (Lukas 20:27) E dirrek el dimlak lolisechakl el kmo ngar er ngii a kmung ngerang el tuobed er a bedengel a chad sel lemad. A Jesus a bai ullisechakl el kmo:

A kodall a di ua cheliuaiu. Sera lemad a Lasarus e a Jesus a dilu el kmo: “A sechelid er a Lasarus a mla mo mechiuaiu, ngdi ngak a mong el mo okisii.” A ruleltirakl er a Jesus a mlo cheleuid a uldesuir e dilu el kmo: “A le mechiuaiu e Rubak, e ng mo ungil er a rektel.” Me a Biblia a mesaod el kmo: “A belkul a tekingel a Jesus a kmo a Lasarus a mla mad, e ngdi tir a ulemdasu el kmo ng millekoi er a meral cheliuaiu. Me ng mocha bleketakl a Jesus el ouchais er tir el kmo, ‘A Lasarus a mla mad.’”​—Johanes 11:11-​14.

A rulekoad a mo mekiis er a kodall. A Jesus er a lebo er a blil a Lasarus, e ngmilengelaod er a Martha el ochedal a Lasarus el melekoi el kmo: “A ochedam a lmuut el mo chad.” Ngdirrek el dilu el kmo: “Ngak a okiis er a kodall e klengar. Ngikel oumera er ngak a le mad, e ng dirrek el di ngar.” A Jesus a uleltaut a tekingel er sera lokisii a Lasarus er mederir a rebetok el chad, alta e ngmla mo eua el klebesei er a lemad.​—Johanes 11:23, 25, 38-​45.

Ngar er sel ues el lebilsang a apostol el Johanes, e a Jesus a liluut el tibir el kmo a rulekoad a mo mekiis er a kodall. Ngmilsaod el kirel a ngar medad el taem el kmo a kodall a mo oltobed er a re mla mad, el tir a ua lekelebus er a chelsel.​—Ocholt 20:13.