Йегъовӕйы Ӕвдисӕнтӕ уарзынц Хуыцауы ӕмӕ адӕмы, ӕмӕ се ’ппӕтӕн дӕр, суанг сӕм раздӕр чи нӕ байхъуыста, уыдонӕн дӕр, дзурынц Библийы рӕстдзинады тыххӕй (Матфейы 22:37–39). Хуыцауы кӕй уарзӕм, уый тыххӕй нӕ фӕнды йӕ Фырты фӕдзӕхстмӕ хъусын, зӕгъгӕ, адӕмӕн бӕстон хъусын кӕнут (Хъуыддӕгтӕ 10:42; 1 Иоанны 5:3). Гъемӕ мах дӕр, раджы заманты Хуыцауы пехуымпартӕ куыд кодтой, афтӕ, адӕммӕ ногӕй ӕмӕ ногӕй бацӕуӕм, цӕмӕй сын Хуыцауы ныхас хъусын кӕнӕм (Йереми 25:4). Адӕмы кӕй уарзӕм, уымӕ гӕсгӕ архайӕм, цӕмӕй «Хуыцауы паддзахады тыххӕй... хорз хабар» алкӕмӕ дӕр фӕхӕццӕ кӕнӕм. Уымӕй аразгӕ у сӕ цард, ӕмӕ уымӕ гӕсгӕ ногӕй ӕмӕ ногӕй бацӕуӕм, фыццаг нӕм чи нӕ байхъусы, уыдонмӕ дӕр (Матфейы 24:14).

 Арӕх афтӕ вӕййы, ӕмӕ нӕм кӕм нӕ байхъуыстой, уыцы хӕдзармӕ ногӕй куы ’рбацӕуӕм, уӕд дзы искӕимӕ аныхас кӕнӕм. Афтӕ цӕмӕн вӕййы? Уымӕн ис ӕртӕ аххосаджы:

•   Адӕм сӕ цӕрӕнбынат фӕивынц.

•   Хӕдзарӕй ӕндӕр исчи ракӕсы.

•   Адӕм ӕндӕрхуызон хъуыды кӕнын райдайынц. Дунейы уавӕртӕ, стӕй адӕмы уавӕртӕ дӕр ивынц. Ӕмӕ уый тыххӕй адӕм бамбарынц, «ӕнӕ Хуыцауӕй цӕрӕн кӕй нӕй», ӕмӕ сӕ бафӕнды Библийы рӕстдзинад базонын (Матфейы 5:3). Ӕмӕ ма, чи зоны, нӕ ныхмӕ чи цӕуы, суанг ахӕм адӕм дӕр апостол Павелау сӕ зондахаст фӕивой (1 Тимофеймӕ 1:13).

 Фӕлӕ куыдфӕнды ма уа, хорз хабар хъусын кӕнгӕйӕ мах никӕуыл ныттыххӕй вӕййӕм (1 Петры 3:15). Алчидӕр хъуамӕ йӕхӕдӕг аскъуыддзаг кӕна, цавӕр диныл хӕст уыдзӕн, уый (Дыккаг закъон 30:19, 20).