1, 2. Цы дзуры Библи адӕмы уавӕры тыххӕй ӕмӕ уыцы уавӕрӕй фервӕзынӕн иунӕг мадзал цы у?

 «ӔППӔТ сконд ӕмдзыгуырӕй хъӕрзы ӕмӕ тухӕнӕй мӕлы» (Ромӕгтӕм 8:22). Ахӕм ныхӕстӕй апостол Павел равдыста, абон адӕм цы тӕригъӕддаг уавӕры сты, уый. Адӕймаджы цӕстӕй кӕсгӕйӕ, хъизӕмар, тӕригъӕд ӕмӕ мӕлӕтӕй фервӕзӕн нӕй. Фӕлӕ Иегъовӕйы гӕнӕнтӕ ӕгӕрон сты (Нымӕцтӕ 23:19). Рӕстдзинады Хуыцау нӕ ацы тӕригъӕддаг уавӕрӕй фервӕзын кӕнынӕн мадзал ссардта. Уый мах тыххӕй бафыста ахӕстаргъ.

² Иегъовӕ адӕмӕн цы лӕвӕрттӕ скодта, уыдонӕй ахӕстаргъӕй стырдӕр лӕвар нӕй. Уый фӕрцы нын ис фервӕзӕн тӕригъӕд ӕмӕ мӕлӕтӕй (Ефесӕгтӕм 1:7). Ууыл ӕнцайы ӕнусон царды ныфс дӕр — уӕлӕрвты уа ӕви дзӕнӕты зӕххыл (Лукайы 23:43; Иоанны 3:16; 1 Петры 1:4). Фӕлӕ цы у ахӕстаргъ? Ӕмӕ нын цы дзуры Иегъовӕйы ӕрдхӕрӕны рӕстдзинады тыххӕй?

Цӕмӕн бахъуыд ахӕстаргъ фидыны сӕр

3. а) Цӕмӕн бахъуыд ахӕстаргъ фидыны сӕр? ӕ) Цӕуылнӕ уыд Хуыцауы бон Адамы байзӕддӕгтӕн мӕлӕты тӕрхон ӕндӕрӕй баивын?

³ Ахӕстаргъ фидыны сӕр бахъуыд, Адам тӕригъӕд кӕй ракодта, уый тыххӕй. Хуыцаумӕ нӕ байхъуыста ӕмӕ уыйадыл йӕ байзӕддӕгты низтӕ, маст, рис ӕмӕ мӕлӕты хай фӕкодта (Уӕвынад 2:17; Ромӕгтӕм 8:20). Фӕлӕ сын Хуыцау фӕтӕригъӕд кодтаид ӕмӕ мӕлӕты тӕрхон ӕндӕрӕй баивтаид, уый гӕнӕн нӕ уыд. Афтӕ бакӕнгӕйӕ уый фехӕлдтаид йӕхи ӕвӕрд закъон: «Тӕригъӕды фиддон — мӕлӕт» (Ромӕгтӕм 6:23). Ӕмӕ Иегъовӕ йӕ рӕстдзинады домӕнты сӕрты куы ахызтаид, уӕд ӕгас Дун-дуне дӕр сӕмтъеры уыдаид, ӕнӕзакъон хъуыддӕгтӕй байдзаг уыдаид!

4, 5. а) Сайтан Хуыцауыл хахуыртӕ куыд фӕкодта ӕмӕ Иегъовӕ уыцы ныхӕстӕн дзуапп раттын йӕхицӕн хӕсыл цӕмӕн банымадта? ӕ) Цавӕр цъыфкалӕн ныхӕстӕ фӕкодта Сайтан Иегъовӕйы лӕггадгӕнджытӕй?

⁴ Дыууадӕсӕм сӕрӕй куыд базыдтам, афтӕмӕй Едемы цы  ’рцыд, уый сӕвзӕрын кодта ноджы ахсджиагдӕр фарстатӕ. Сайтан Хуыцауы сыгъдӕг номыл цъыф бакалдта: Иегъовӕйы фӕазымджын кодта, зӕгъгӕ, уый у ӕгъатыр залым, йе сконд удгоймӕгты сайы ӕмӕ сӕ сӕрибарӕй акъахдзӕф кӕнын нӕ уадзы (Уӕвынад 3:1—5). Хуыцауы фӕнд уый мидӕг уыд, цӕмӕй зӕхх байдзаг уыдаид рӕстаг адӕмӕй, фӕлӕ ныр цыма Сайтанӕн уыцы хъуыддаджы размӕ цӕлхдур сӕвӕрын бантыст, афтӕ зынд, ӕмӕ Хуыцауы ноджы уымӕй дӕр фӕзылын кодта, зӕгъгӕ, йӕ фӕнд кӕронмӕ ахӕццӕ кӕнын йӕ бон нӕу (Уӕвынад 1:28; Исай 55:10, 11). Уыцы хахуыртӕн Иегъовӕ дзуапп куы нӕ радтаид, уӕд йе сконд хъуыдыхъом удгоймӕгтӕй бирӕтӕ йӕ хицаудзинадыл тынг фӕдызӕрдыг уыдаиккой.

⁵ Сайтан ма Иегъовӕйы иузӕрдион лӕггадгӕнджыты номыл дӕр бакалдта цъыф, афтӕ сӕ кӕй загъта, зӕгъгӕ йын уыдон ӕрмӕстдӕр сӕхи пайдайы тыххӕй лӕггад кӕнынц ӕмӕ сӕ фыдӕвзарӕны Хуыцауыл иузӕрдионӕй иу дӕр нӕ баззайдзӕн (Иов 1:9—11). Ацы фарстатӕ, ӕппӕт адӕм дӕр цы зын уавӕры бахаудысты, уымӕй бирӕ ахсджиагдӕр уыдысты. Иегъовӕ йӕхицӕн хӕсыл банымадта Сайтаны хахуыр ныхӕстӕн дзуапп раттын. Фӕлӕ куыд уыдис уыцы дзырддаг фарстатӕ дӕр алыггӕнӕн ӕмӕ уыимӕ адӕмы дӕр фервӕзын кӕнӕн?

Ахӕстаргъ бафидын — сӕрмӕсӕр раттын

6. Цавӕр дзырдтӕй ӕмбарын кӕны Библи, Иегъовӕ адӕмы фервӕзын кӕнынӕн цы сарӕзта, уый?

⁶ Иегъовӕ хъуыддаг куыд алыг кодта, уым зыны йӕ ӕвӕджиауы фӕлмӕнзӕрдӕдзинад ӕмӕ ӕрдхӕрӕны рӕстдзинад — иу адӕймагмӕ дӕр нӕ разындаид ахӕм уынаффӕ рахӕссыны зонд. Фӕлӕ уыимӕ уый уыд тынг хуымӕтӕг. Библи йӕ ӕмбарын кӕны алыхуызон дзырдтӕй: балхӕнын, сраст кӕнын, бафидауын кӕнын, зӕрдӕ ӕрфӕлмӕн кӕнын (Псалом 48:9; Данелы 9:24; Галатӕгтӕм 3:13; Колоссӕгтӕм 1:20; Дзуттытӕм 2:17). Фӕлӕ йӕ, ӕвӕццӕгӕн, иууыл хуыздӕр ӕмбарын кӕны, Йесо кӕмӕй спайда кодта, уыцы дзырд. Уый загъта: «Адӕймаджы Фырт уый тыххӕй нӕ ӕрцыд, цӕмӕй Уымӕн лӕггад кӕной, фӕлӕ цӕмӕй балӕггад  кӕна ӕмӕ ратта Йӕ уды бирӕты балхӕныны тыххӕй [«ӕмӕ йӕ уд радта ахӕстаргъӕн бирӕты тыххӕй», НД]» (Матфейы 20:28).

7, 8. а) Цы нысан кӕны дзырд «ахӕстаргъ» Библийы? ӕ) Куыд ӕмбарын хъӕуы, зӕгъгӕ, ахӕстаргъ у сӕрмӕсӕр фиддон?

⁷ Цы у ахӕстаргъ? Грекъаг ӕвзаджы ацы дзырд (ли́трон) цы мивдисӕгӕй арӕзт у, уый нысан кӕны «ауадзын, ссӕрибар кӕнын». Уыцы дзырд амыдта уацайраджы сӕрмӕ фыст ӕхца. Уымӕ гӕсгӕ зӕгъӕн ис, ӕмӕ ахӕстаргъ у, цыдӕр фӕстӕмӕ райсынӕн цы бафидынц, уый. Дзуттаг Фыстыты «ахӕстаргъ»-ӕй ивд дзырд (ко́фер) та арӕзт у мивдисӕг «ӕмбӕрзын»-ӕй. Цӕвиттонӕн, Хуыцау Нойӕн загъта, ковчег писийӕ кӕй хъуамӕ «байсӕрда» (дзут. «бамбӕрза», уый дӕр уыцы дзырдӕй арӕзт) (Уӕвынад 6:14). Уый фӕрцы ӕмбарӕм, ахӕстаргъ фидын ма тӕригъӕдтӕ ӕмбӕрзын дӕр кӕй нысан кӕны.

⁸ Цымыдисаг уый у, ӕмӕ «Ног фӕдзӕхсты теологон дзырдуатмӕ» гӕсгӕ ацы дзырд (ко́фер) «алыхатт дӕр амоны сӕрмӕсӕр», кӕнӕ ӕмбӕрц («Theological Dictionary of the New Testament»). Афтӕ, фӕдзӕхсты ковчегы сӕр уыд растдӕр ковчегӕн йӕхи йас. Уыйау, тӕригъӕдӕй балхӕнынӕн, кӕнӕ йӕ бамбӕрзынӕн, ахӕм аргъ бафидын хъуыд, ӕмӕ, тӕригъӕд цы зиан ракодта, уый ӕмбӕрц куыд уыдаид, кӕнӕ йӕ ӕнӕхъӕнӕй дӕр куыд бамбӕрзтаид. Хуыцау Израилӕн цы Закъон радта, уым дӕр уымӕн фыст уыд: «Уды сӕрмӕ лӕвӕрд уыдзӕн уд, цӕстмӕ — цӕст, дӕндагмӕ — дӕндаг, къухмӕ — къух, къахмӕ — къах» (Дыккаг закъон 19:21).

9. Уырнындзинадӕй чи цард, уыцы лӕгтӕ кусӕрттӕгтӕ цӕмӕн хастой нывондӕн ӕмӕ цы цӕстӕй каст Иегъовӕ ахӕм нывӕндтӕм?

⁹ Авелӕй фӕстӕмӕ, уырнындзинадӕй чи цард, уыцы лӕгтӕ Хуыцауӕн нывондӕн хастой кусӕрттӕгтӕ. Цӕуыл дзурӕг уыд уыцы хъуыддаг? Уыдон ӕмбӕрстой, тӕригъӕдджын кӕй сты, тӕригъӕдӕй балхӕнын сӕ кӕй хъӕуы ӕмӕ ӕууӕндыдысты Хуыцауы зӕрдӕвӕрдыл, йӕ «мыггаджы» фӕрцы сӕ кӕй ссӕрибар кӕндзӕн (Уӕвынад 3:15; 4:1—4; Левит 17:11;  Дзуттытӕм 11:4). Иегъовӕйӕн ахӕм нывӕндтӕ уыдысты ӕхсызгон ӕмӕ йӕ лӕггадгӕнджытӕй разы уыд. Фӕлӕ фосы нывӕндтӕн уыдис ӕрмӕстдӕр ахӕсгӕ нысаниуӕг. Фосӕй адӕймаджы тӕригъӕд бамбӕрзӕн нӕ уыд, уымӕн ӕмӕ фос адӕмы ӕмсӕр не сты (Псалом 8:5—9). Гъе уый тыххӕй дзуры Библи: «Гӕнӕн нӕй, цӕмӕй родты ӕмӕ сӕгъты туг сафа тӕригъӕдтӕ» (Дзуттытӕм 10:1—4). Ахӕм нывӕндтӕ ӕвдыстой фидӕны ӕцӕг ӕлхӕнӕг нывонд.

«Сӕрмӕсӕр ахӕстаргъ»

10. а) Кӕй ӕмсӕр хъуамӕ уыдаид, ахӕстаргъ кӕмӕй фыстӕуыд, уый ӕмӕ цӕмӕн? ӕ) Ӕрмӕстдӕр иу адӕймаджы цӕмӕн хъуыди нывондӕн ӕрхӕссын?

¹⁰ «Адамы мидӕг иууылдӕр... мӕлынц»,— загъта апостол Павел (1 Коринфӕгтӕм 15:22). Уӕдӕ ахӕстаргъ бафидынӕн хъуыдис Адамы ӕмсӕр, ома ӕххӕст, адӕймаджы мӕлӕт (Ромӕгтӕм 5:14). Ӕндӕр ницы сӕмуӕз кодтаид рӕстдзинады тӕрӕзтӕ. Ӕрмӕстдӕр ӕххӕст адӕймагӕн, Адамы мӕлӕты тӕрхоны бар кӕуыл нӕ цыд, ахӕмӕн, уыд йӕ бон раттын «сӕрмӕсӕр ахӕстаргъ» — растдӕр Адамы ӕмсӕр (1 Тимофеймӕ 2:6, НД). Фӕлӕ Адамы байзӕддӕгтӕй алкӕцыйы хицӕнӕй ӕлхӕнын, ӕмӕ уый тыххӕй милуангай адӕмы нывондӕн хӕссын нӕ хъуыди. Апостол Павел бамбарын кодта: «Иу адӕймагӕй [Адамӕй] тӕригъӕд... бацыди дунемӕ, ӕмӕ тӕригъӕдӕй мӕлӕт» (Ромӕгтӕм 5:12). Ӕмӕ «иу адӕймагӕй мӕлӕт куыд ӕрцыд», афтӕ Хуыцау ӕлхӕнгӕ дӕр «иу адӕймагӕй» бакодта адӕмы (1 Коринфӕгтӕм 15:21, НФ). Куыд?

11. а) Куыд хъуамӕ «бавзӕрстаид мӕлӕт ӕппӕты тыххӕй», ахӕстаргъ чи бафыстаид, уый? ӕ) Ахӕстаргъ Адам ӕмӕ Евӕмӕ цӕуылнӕ хаудта? (Кӕс фиппаинаг.)

¹¹ Иегъовӕ афтӕ сарӕзта, цӕмӕй ӕххӕст адӕймаг барвӕндонӕй раттаид йӕ цард нывондӕн. Ромӕгтӕм 6:23 фыст ис, зӕгъгӕ, «тӕригъӕды фиддон — мӕлӕт». Йӕхи нывондӕн ратгӕйӕ, уыцы адӕймаг «бавзӕрстаид мӕлӕт ӕппӕты тыххӕй». Иудзырдӕй, Адамы тӕригъӕд бафыстаид (Дзуттытӕм 2:9; 2 Коринфӕгтӕм 5:21; 1 Петры 2:24). Уыцы хъуыддагӕн закъонмӕ гӕсгӕ уыдаид стыр тых: Адамы байзӕддӕгтӕй коммӕгӕс чи уыдаид, уыдонӕн ахӕстаргъы фӕрцы мӕлӕты  тӕрхон ивд ӕрцыдаид ӕмӕ уымӕй тӕригъӕды сафӕг тых йӕ тӕккӕ рӕбыныл асастаид a (Ромӕгтӕм 5:16).

12. Цӕвиттонӕй равдис, иу хӕс бафидын бирӕтӕн куыд у арфӕйаг хъуыддаг.

¹² Ӕркӕсӕм иу цӕвиттонмӕ. Зӕгъӕм, цӕрыс ахӕм горӕты, ӕмӕ цӕрджытӕн сӕ фылдӕр кусынц иу стыр фабрикӕйы. Ды дӕр ӕмӕ дӕ сыхӕгтӕ дӕр хорз мызд исут ӕмӕ ницӕуыл тыхсут. Фӕлӕ иуахӕмы фабрикӕйы куыст ныллӕууыд, сӕхгӕдтой йӕ. Цӕмӕн, цы ’рцыд? Йӕ хицау ӕууӕнкхор адӕймаг разынд ӕмӕ куыстуат заууатмӕ ӕртардта. Ӕнӕнхъӕлӕджы ӕгуыстӕй аззадыстут, ӕмӕ ныр дӕуӕн дӕр ӕмӕ дӕ сыхӕгтӕн дӕр уӕ хӕстӕ, хъалонтӕ бафидын уӕ бон нӕу. Кусджыты бинонтӕ, сӕ сывӕллӕттӕ ӕмӕ, фабрикӕйы куысты йе ’хца чи бавӕрдта, уыдон иу адӕймаджы фӕлывд хъуыддӕгты тыххӕй масты хай фесты. Цымӕ ма исты саразӕн ис? Куыннӕ! Йе ’ххуысы къух ӕрбадардта иу хъӕздыг хӕрзгӕнӕг. Уый ӕмбары, уыцы фабрикӕйы куыст ахсджиаг кӕй у. Стӕй дзы цы дуне адӕм куыстой, уыдоныл ӕмӕ сӕ бинонтыл дӕр йӕ зӕрдӕ риссы. Уымӕ гӕсгӕ уыцы куыстуаты хӕс бафидын ӕмӕ йӕ ногӕй скусын кӕнын йӕхимӕ райста. Уыцы иу хӕс фыст кӕй ӕрцыд, уый арфӕйаг хъуыддаг сси бирӕтӕн: кусджытӕн ӕмӕ сӕ бинонтӕн, стӕй, фабрикӕйы куысты ӕхца чи бавӕрдта, уыдонӕн се ’ппӕтӕн дӕр. Раст афтӕ, Адамы хӕс бафидыны хъуыддаг дӕр мин-мин адӕмӕн хӕссы стыр арфӕдзинӕдтӕ.

Чи бафыста ахӕстаргъ?

13, 14. а) Иегъовӕ адӕмы тыххӕй ахӕстаргъ куыд бафыста? ӕ) Кӕмӕн ӕрцыд фыст ахӕстаргъ ӕмӕ цӕмӕн бахъуыд уый саразын?

¹³ Ӕрмӕстдӕр Иегъовӕйӕн уыд йӕ бон раттын «Уӕрыккы, Йӕхиуыл дунейы тӕригъӕд Чи исы, Уый» (Иоанны 1:29, НФ). Фӕлӕ адӕмы фервӕзын кӕнынӕн Хуыцау кӕцыфӕнды зӕды  нӕ рарвыста. Иегъовӕ равзӕрста, йӕ лӕггадгӕнджытӕн ын Сайтан цы фидистӕ фӕкодта, уыдонӕн ӕнустӕм кӕрон чи скодтаид, уый. О, Иегъовӕ ӕрхаста иууыл стырдӕр нывонд — йӕ иунӕггуырд Фырты, «йе стыр цин» чи уыд, уый (Ӕмбисӕндтӕ 8:30). Хуыцауы Фырт барвӕндӕй «Йӕхи ӕрныллӕг кодта» — йӕ уӕларвон цард ныууагъта (Филиппӕгтӕм 2:7). Иегъовӕ йӕ фыццаггуырд уӕларвон Фырты цард ӕмӕ удыхъӕды сконд диссаджы ӕгъдауӕй рахаста дзуттаг чызг Мариайы хуылфмӕ (Лукайы 1:27, 35). Куы райгуырд, уӕд ӕй схуыдтой Йесо. Фӕлӕ закъоны ӕвзагыл дзургӕйӕ, уый уыдис схонӕн дыккаг Адам, уымӕн ӕмӕ алцӕмӕй дӕр уыд Адамы ӕмсӕр (1 Коринфӕгтӕм 15:45, 47). Афтӕмӕй Йесойӕн йӕ бон уыд тӕригъӕдджын адӕмы сӕрвӕлтау йӕ цардӕй ахӕстаргъ бафидын.

¹⁴ Кӕмӕн хъуыд уыцы ахӕстаргъ бафидын? Псалом 48:8 бӕлвырдӕй дзуры, ахӕстаргъ Хуыцауӕн фыст кӕй цӕуы. Фӕлӕ йӕ дӕтгӕ дӕр Иегъовӕ нӕ ракодта? О, Иегъовӕ йӕ радта, фӕлӕ уый тыххӕй афтӕ зӕгъӕн нӕй, ӕмӕ уыцы хъуыддаг ӕфсоны раив-баив у, мӕнӕ иу дзыппӕй куыд сисай ӕхца ӕмӕ йӕ иннӕйы куыд нывӕрай, афтӕ. Ӕмбарын хъӕуы уый, ӕмӕ ахӕстаргъ бафидын ӕнӕуи цыдӕр баивын нӕу, фӕлӕ, закъон кӕй домдта бакӕнын, ахӕм хъуыддаг. Ахӕстаргъ ратгӕйӕ Иегъовӕ бӕлвырд равдыста, йӕ ӕххӕст рӕстдзинад йӕхӕдӕг дӕр кӕй никуы халы, кӕд ын уый тынг зынаргъ слӕууыд, уӕддӕр (Уӕвынад 22:7, 8, 11—13; Дзуттытӕм 11:17; Иаковы 1:17).

15. Цӕмӕн хъуыд Йесойы хъизӕмӕрттӕ бавзарын ӕмӕ амӕлын?

¹⁵ Н. э. 33 азы уалдзӕджы Йесо Чырысти барвӕндӕй цы фыдӕвзарӕнты хай баци, уыдон ӕркодтой, ахӕстаргъ фыст кӕй ӕрцыд, уымӕ. Йесо бауагъта, цӕмӕй йӕ рӕстӕй фӕзылын кӕнгӕйӕ ӕрцахстаиккой, аххосджыныл ӕй банымадтаиккой ӕмӕ йӕ хъизӕмӕртты цӕджындзыл зӕгӕлтӕй ныххуыдтаиккой. Ау, ӕмӕ ӕцӕгдӕр хъуыд Йесойы афтӕ тынг фӕхъизӕмар кӕнын? О, уымӕн ӕмӕ, Хуыцауы лӕггадгӕнджыты иузӕрдиондзинады фӕдыл цы дзырддаг фарста лӕууыд, уый лыггӕнинаг уыд. Бафиппайын хъӕуы уый, ӕмӕ Йесо ӕнахъом саби куы уыд, уӕд Хуыцау кӕй нӕ бауагъта, цӕмӕй йӕ Ирод амардтаид (Матфейы 2:13—18). Фӕлӕ стырӕй Йесойӕн  йӕ бон уыд Сайтаны лӕбурдтыты ныхмӕ фӕлӕууын, хъуыддаг цӕй мидӕг ис, уый иттӕг хорз ӕмбаргӕйӕ b. Кӕд ын ӕвирхъау фыдмитӕ фӕкодтой, уӕддӕр «сыгъдӕг, фыддзинадӕй дард, ӕнаипп, хицӕнгонд тӕригъӕдджынтӕй» кӕй баззад, уымӕй Йесо мыггагмӕ сбӕлвырд кодта, Иегъовӕйӕн ахӕм лӕггадгӕнджытӕ кӕй ис, фыдӕвзарӕнты дӕр ыл йӕ зӕрдӕ чи нӕ ивы (Дзуттытӕм 7:26). Уӕдӕ йӕ куыннӕ ӕмбарӕм, йӕ царды фӕстаг уысм ма Йесо уӕлахиздзауы загъд цӕмӕн кодта: «Сӕххӕст ис!» (Иоанны 19:30).

Адӕмы балхӕныны хъуыддаг кӕронмӕ ахӕццӕ кодта

16, 17. а) Йесо адӕмы тӕригъӕдӕй балхӕныны хъуыддаг куыд адарддӕр кодта? ӕ) Цӕмӕн хъуыд Йесойы «мах тыххӕй Хуыцауы цӕсгомы раз» ӕрлӕууын?

¹⁶ Фӕлӕ адӕмы тӕригъӕдӕй балхӕныны хъуыддаг нырма кӕронмӕ кӕнинаг уыд. Йесо куы амард, уӕд ӕй ӕртыккаг бон Иегъовӕ райгас кодта (Куыстытӕ 3:15; 10:40). Уыцы стыр хъуыддагӕй Иегъовӕ йӕ Фырты йӕ иузӕрдион лӕггады тыххӕй схорзӕхджын кодта. Фӕлӕ ӕрмӕст уый нӕ — уымӕй ма йын фадат радта, цӕмӕй, куыд Хуыцауы Хистӕр Сауджын, афтӕ адӕмы тӕригъӕдӕй балхӕныны хъуыддаг кӕронмӕ ахӕццӕ кодтаид (Ромӕгтӕм 1:4; 1 Коринфӕгтӕм 15:3—8). Апостол Павел ӕмбарын кӕны: «Чырысти... Хистӕр сауджын, ӕрцӕугӕйӕ... сӕгътӕ ӕмӕ родты тугимӕ нӕ, фӕлӕ Йӕхи тугимӕ иухатт бацыд кувӕндонмӕ ӕмӕ ратта мыггагмӕйы хатырдзинад. Уымӕн ӕмӕ Чырысти къухӕй конд кувӕндонмӕ нӕ бацыд, ӕцӕджы фӕлгонцмӕ гӕсгӕ арӕзт чи уыд, фӕлӕ арвӕн йӕхимӕ, цӕмӕй ӕрлӕууа ныр мах тыххӕй Хуыцауы цӕсгомы раз» (Дзуттытӕм 9:11, 12, 24).

 ¹⁷ Чырыстийӕн уӕларвмӕ йӕ туг схӕссын нӕ уыд йӕ бон (1 Коринфӕгтӕм 15:50). Фӕлӕ Йесо схаста, уыцы туг цы ӕвдыста, уый: йӕ ӕххӕст адӕймаджы царды аргъ, нывондӕн кӕй ӕрхаста, уый. Стӕй «Хуыцауы цӕсгомы раз» ӕрлӕууыд, тӕригъӕдджын адӕмы балхӕныны тыххӕй ахӕстаргъӕн цы цард радта, уый аргъимӕ. Айста Иегъовӕ уыцы нывонд? О, ӕмӕ уый рабӕрӕг н. э. 33 азы Фӕндзайӕм боны, Иерусалимы 120 ахуыргӕнинагыл сыгъдӕг уд куы ’рцыд, уӕд (Куыстытӕ 2:1—4). Уыцы ӕвӕджиауы хабарӕй фӕстӕмӕ ахӕстаргъ ноджы диссагдӕр арфӕдзинӕдтӕ хӕссын райдыдта.

Ахӕстаргъ — арфӕдзинӕдтӕ

18, 19. а) Цавӕр дыууӕ къорды хъуамӕ бафидауой Хуыцауимӕ Чырыстийы тугныккалды руаджы? ӕ) «Тынг бирӕ адӕм» ахӕстаргъы фӕрцы абон цӕмӕй арфӕгонд сты ӕмӕ ма сӕм цавӕр арфӕдзинӕдтӕ ӕнхъӕлмӕ кӕсы?

¹⁸ Павел колоссӕгтӕм цы фыстӕг ныффыста, уым бамбарын кодта, Хуыцауы хорз фӕндон уый мидӕг кӕй уыд, цӕмӕй Чырыстийы уылты ӕппӕт дӕр йӕхиимӕ бафидауын кӕна, Йесо хъизӕмӕртты цӕджындзыл цы туг ныккалдта, уый руаджы. Павел ма загъта, Хуыцауимӕ дыууӕ къорды кӕй хъуыд бафидауын — «уӕларвонты» ӕмӕ «зӕххонты» (Колоссӕгтӕм 1:19, 20; Ефесӕгтӕм 1:10). Фыццаг къордмӕ хауынц, Йесо Чырыстиимӕ уӕларвыл сауджынтӕй лӕггад кӕнын ӕмӕ уырдыгӕй зӕххыл паддзӕхтӕй хицауиуӕг кӕныны ныфс лӕвӕрд кӕмӕн ис, уыцы 144 000 чырыстоны (Раргомад 5:9, 10; 7:4; 14:1—3). Уыдоны уылты коммӕгӕс адӕм мин азы дӕргъы исдзысты, ахӕстаргъ йемӕ цы арфӕдзинӕдтӕ хӕссы, уыдон (1 Коринфӕгтӕм 15:24—26; Раргомад 20:6; 21:3, 4).

¹⁹ «Зӕххонтӕ» та сты, дзӕнӕты зӕххыл ӕххӕст адӕймӕгтӕй цӕрыны ныфс кӕмӕн ис, уыдон. Раргомады 7:9—17 хуыйнынц, ӕрцӕуинаг «стыр бӕллӕхы» (НД) удӕгасӕй чи баззайдзӕн, уыцы «тынг бирӕ адӕм». Фӕлӕ, ахӕстаргъ цы арфӕдзинӕдтӕ хӕссы, уыдон фенынмӕ сӕ уӕдмӕ ӕнхъӕлмӕ кӕсын нӕ хъӕуы. Уыцы адӕм ныридӕгӕн «цӕхсадтой сӕ дарӕстӕ ӕмӕ сӕ сурс кодтой Уӕрыччы Тугӕй». Ахӕстаргъыл кӕй ӕууӕндынц, уымӕ гӕсгӕ ныр дӕр сты монон хорздзинӕдтӕй хайджын. Уыдон нымад ӕрцӕуынц рӕстгӕнджытыл  ӕмӕ свӕййынц Хуыцауы хӕлӕрттӕ! (Иаковы 2:23). Йесойы нывонды руаджы сӕ бон у «уӕндонӕй цӕуын хорз лӕвары [«Хуыцауы хорзӕхы», НФ] Паддзахы бадӕнмӕ» (Дзуттытӕм 4:14—16). Куы фӕрӕдийынц, уӕд сӕ рӕдыдтытӕ хатыргонд ӕрцӕуынц (Ефесӕгтӕм 1:7). Ӕмӕ кӕд ӕнӕххӕст сты, уӕддӕр сӕ цӕсгом у сыгъдӕг (Дзуттытӕм 9:9; 10:22; 1 Петры 3:21). Уӕдӕ нӕ Хуыцауимӕ бафидауынмӕ ӕнхъӕлмӕ кӕсын нӕ хъӕуы — уымӕн ныр дӕр ис гӕнӕн! (2 Коринфӕгтӕм 5:19, 20). Чырыстийы Миназон хицаудзинады рӕстӕджы уыдон цадӕггай ссӕрибар уыдзысты «ӕмбийындзинадӕн цагъарадӕй» ӕмӕ райсдзысты «Хуыцауы сывӕллӕтты кады сӕрибардзинад» (Ромӕгтӕм 8:21).

20. Ахӕстаргъыл арф куы фӕхъуыды кӕныс, уӕд дӕм дӕ зӕрдӕ цы фӕдзуры?

²⁰ «Арфӕ кӕнӕм Хуыцауӕн нӕ Хицау Йесо Чырыстийы номӕй» ахӕстаргъы тыххӕй! (Ромӕгтӕм 7:25, НФ). Ахӕстаргъ бафидынӕн бындурӕн ист уыд хуымӕтӕг уагӕвӕрд, фӕлӕ нӕ уӕддӕр уыцы хъуыддаг йӕ арф хъуыдыйӕ дисы ӕфтауы (Ромӕгтӕм 11:33). Ӕмӕ йыл лӕмбынӕг кӕй хъуыды кӕнӕм, Хуыцауӕй дзы бузныг кӕй стӕм, уый фӕрцы нын ахӕстаргъ бафидыны хъуыддаг нӕ зӕрдӕ агайы ӕмӕ нӕ рӕстдзинады Хуыцаумӕ ӕввахсдӕр кӕны. Иегъовӕ «уарзы рӕстдзинад ӕмӕ тӕрхон», ӕмӕ йӕ уый тыххӕй мах дӕр, псаломзарӕггӕнӕгау, куыннӕ хъуамӕ кадджын кӕнӕм! (Псалом 32:5).