Нӕ уырнындзинад цы хъуыддӕгты фӕрцы фидар кӕнӕм, уыдонӕй иу у, брошюрӕйы «Алы бон дӕр Фыстад иртас» стих ӕмӕ йӕм цы комментари вӕййы, уый кӕй бакӕсӕм, уый. Ды дӕр афтӕ фӕкӕныс? Кӕд нӕ, уӕд дӕ бон нӕ уаид бацархайын, цӕмӕй йӕ алы бон дӕр кӕсай? Бирӕтӕ стих бакӕсынц райсомӕй, цӕмӕй йыл сӕ хъуыддӕгтӕ кӕнгӕйӕ боны дӕргъы хъуыды кӕной (ЙсН 1:8; Пс 119:97). Библийы стих дын ноджы фылдӕр пайда цӕй фӕрцы ӕрхӕсдзӕн? Стих кӕцӕй ист у, уыцы скъуыддзаг-иу бакӕс, цӕмӕй-иу контекст бамбарай. Ахъуыды-иу кӕн, стихы цы уагӕвӕрд ис, уый Библийӕ цавӕр хабар ӕвдисы. Стӕй-иу уыцы уагӕвӕрдмӕ гӕсгӕ архай. Уынаффӕтӕ хӕсгӕйӕ, Хуыцауы Ныхас цы дзуры, уымӕ гӕсгӕ куы архайай, уӕд дӕ раст фӕндагыл кӕндзӕн, ӕмӕ дын уый хӕсдзӕн стыр пайда (Пс 119:105).

Ӕгас зӕххыл дӕр Вефилы бинонтӕ брошюрӕйӕ стих иумӕ февзарынц райсомӕй, сӕ куысты размӕ. Ӕмӕ стих куыд февзарынц, уый ӕвдыст кӕм фӕцӕуы, уыцы видеороликтӕй бирӕтӕм фӕстаг азты бакӕсӕн вӕййы нӕ интернет-телеуынынады. Ныр сӕ ссарӕн вӕййы сайты jw.org (хай ПРОГРАММӔТӔ ӔМӔ ХАБӔРТТӔ). Фӕстаг хатт ахӕм видеороликмӕ кӕд бакастӕ? Чи зоны дзы кӕцыдӕрты ссарай, дӕуӕн чи баххуыс кӕндзӕн, ахӕм хъуыдытӕ. Зӕгъӕм, уынаффӕтӕ хӕссын дӕ куы хъӕуа, уӕд дын Лоты хабар, гӕнӕн ис, куыд баххуыс кӕна?

БАКӔС ВИДЕОРОЛИКМӔ «МА УАРЗУТ ДУНЕ» (1ИН 2:15) ӔМӔ ДЗУАПП РАТТ АЦЫ ФАРСТАТӔН:

• Видеороликы Библийӕ цавӕр уагӕвӕрдыл цыди дзырд?

• Лоты хабарӕй куыд зыны, ацы дуне ӕмӕ дзы цы ис, уый уарзын тынг тӕссаг кӕй у? (Рд 13:12; 14:12; 19:3, 12, 13, 24–26).

• Нӕ бон куыд у равдисын, ацы дуне ӕмӕ дзы цы ис, уый кӕй нӕ уарзӕм, фӕлӕ Йегъовӕйы кӕй уарзӕм?