«Райсынӕй раттын амондджындӕр хъуыддаг у» (ХЪУЫДДӔГТӔ 20:35).

Иуӕй-иутӕ Рождество цӕмӕн бӕрӕг кӕнынц?

Чырысти куыд загъта, афтӕмӕй амондджын вӕййы, лӕвар чи скӕны, уый дӕр ӕмӕ, лӕвар кӕмӕн скӕнынц, уый дӕр. Уымӕ гӕсгӕ бирӕтӕм афтӕ кӕсы, ӕмӕ Рождествомӕ лӕвӕрттӕ кӕнын ӕнӕмӕнг хъуыддаг у. Фарон экономикон кризисы рӕстӕг, иуӕй-иу бӕлвырдгӕнӕнтӕм гӕсгӕ, зӕгъӕм, Ирландийы, алы бинонты дӕр Рождествомӕ цы лӕвӕрттӕ скӕнын фӕндыд, уыдоныл сын ацыдаид 500 евройӕ фылдӕр (660 доллӕры бӕрц).

Уый зын бамбарӕн цӕмӕн у?

Бирӕтӕ лӕвӕрттӕ кӕнынӕй циндзинад уыйбӕрц нӕ райсынц, тыхсгӕ цас скӕнынц. Афтӕ цӕмӕн рауайы? Сӕ лӕвӕрттӕ ӕгӕр зынаргъ слӕууынц. Уыцы рӕстӕг иууылдӕр лӕвӕрттӕ кӕй фелхӕнынц, уымӕ гӕсгӕ дуканиты адӕмӕй къух бакӕнӕн нӕ вӕййы, исты балхӕныны тыххӕй та рады уыйбӕрц лӕууын фӕхъӕуы, ӕмӕ бирӕтӕ афтӕ сфӕлмӕцынц, ӕмӕ сӕ ницыуал фӕхъӕуы.

Библийӕ нын цавӕр уагӕвӕрдтӕ баххуыс кӕндзысты?

«Дӕттут»,– загъта Чырысти (Лукайы 6:38). Уымӕй уый зӕгъынмӕ нӕ хъавыд, ӕмӕ афӕдзы дӕргъы лӕвӕрттӕ кӕнӕн ис ӕрмӕстдӕр бӕлвырд рӕстӕг, адӕм лӕвӕрттӕм куы фенхъӕлмӕ кӕсынц, уӕд. Чырысти йӕ фӕдылдзӕуджыты ахуыр кодта, цӕмӕй иннӕтӕн лӕвӕрттӕ кӕной, кӕддӕриддӕр сӕ бафӕнда, уӕд.

«Алчидӕр кӕнӕд, йӕхицӕн куыд загъта, афтӕ – мацы кӕнӕд ӕвӕндонӕй кӕнӕ тыххӕй кӕнӕгау, уымӕн ӕмӕ Хуыцау, зӕрдиагӕй чи дӕтты, уый уарзы» (2 Коринфӕгтӕм 9:7). Ацы уынаффӕйӕн йӕ хъуыды цы у, уый фӕдыл, Библи чи ӕмбарын кӕны, иу ахӕм чиныджы фыст ис, зӕгъгӕ, «ницы хъӕуы „тыххӕй кӕнӕгау“ кӕнын, цыма дын цыдӕр тыххӕй дӕттын кӕнынц, уыйау». «Зӕрдиагӕй чи дӕтты», уыцы адӕймаг йӕхи хӕсджыныл нӕ нымайы бӕлвырд лӕвӕрттӕ бӕлвырд рӕстӕг ӕмӕ бӕлвырд кӕмӕндӕр лӕвар кӕнын, зӕгъӕм, Рождествойы рӕстӕг куыд вӕййы, афтӕ.

«Адӕймаг исты зӕрдиагӕй куы ратта, уӕд ахӕм лӕвар... уӕлдай ӕхсызгон у. Ӕмӕ адӕймаг дӕтгӕ та фӕкӕны, цы йӕм нӕй, уый нӕ, фӕлӕ йӕм цы ис, уый» (2 Коринфӕгтӕм 8:12). Хуыцау чырыстӕттӕй нӕ домы, цӕмӕй зынаргъ лӕвӕрттӕ кӕныны тыххӕй хӕстӕ исой. Адӕймагӕн йӕ лӕвар, йӕ къух цас амоны, уымӕ гӕсгӕ куы уа, уӕд ахӕм лӕвар «уӕлдай ӕхсызгон» вӕййы. Куыд тынг хицӕн кӕны уый, бӕрӕгбӕтты размӕ рекламӕтӕ цӕмӕ фӕразӕнгард кӕнынц, уымӕй – «абон балхӕн, райсом бафид»!