Уарзондзинады фӕрцы – хъӕбатыр
Уарзондзинады фӕрцы – хъӕбатыр
«Хуыцау нын цы сыгъдӕг уд радта, уый нӕ тӕппудтӕ нӕ аразы, фӕлӕ нӕ уадзы тых, дӕтты нын уарзондзинад ӕмӕ уӕззау зонд» (2 ТИМОФЕЙМӔ 1:7, НД).
1, 2. а) Уарзондзинад адӕймаджы цӕмӕ сразӕнгард кӕны? ӕ) Йесо цы хъӕбатырдзинад равдыста, уый диссаг цӕмӕн у?
АВСТРАЛИЙЫ иу лӕг ӕмӕ ус сӕ чындзӕхсӕвы фӕстӕ ацыдысты денджызы былмӕ аквалангимӕ ленк кӕнынмӕ. Хӕрдмӕ куы ленк кодтой, уӕд стыр урс акулӕ йӕхи сылгоймагыл ныццавта. Йӕ лӕг йӕхи тынг хъӕбатырӕй равдыста: иуварс ӕй атъӕпп кодта ӕмӕ йӕхӕдӕг акулӕйы амӕттаг баци. «Йӕ цард мӕн тыххӕй радта»,– загъта идӕдз сылгоймаг зианы бон.
2 Ӕцӕгдӕр, уарзондзинады руаджы адӕм диссаджы хъӕбатырдзинад равдисынц. Йесо Чырысти загъта: «Нӕй стылдӕр уыцы уарзондзинадӕй исчи йӕ уд куы сӕвӕра йӕ хӕлӕртты тыххӕй» (Иоанны 15:13). Уыцы ныхӕстӕ куы загъта, уымӕй иу бон дӕр нӕ рацыд, афтӕ йӕ цард радта ӕрмӕст иу адӕймаджы тыххӕй нӕ, фӕлӕ ӕппӕт адӕмы тыххӕй (Матфейы 20:28). Йесо цы хъӕбатырдзинад равдыста, уый сонтӕй нӕ уыд. Зыдта йӕ, кӕй йыл худдзысты, кӕй йӕ ’фхӕрдзысты, ӕнаххосӕй йыл кӕй стӕрхон кӕндзысты ӕмӕ йӕ хъизӕмӕртты хъӕдыл кӕй амардзысты. Суанг ма йӕ ахуыргӕнинӕгты дӕр цӕттӕ кодта уымӕ: «Мӕнӕ, мах цӕуӕм Иерусалиммӕ ӕмӕ Адӕймаджы Фырт лӕвӕрд уыдзӕн хистӕр сауджынтӕм ӕмӕ чиныджы дӕснытӕм, ӕмӕ Йын мӕлӕты тӕрхон скӕндзысты, ӕмӕ Йӕ ратдзысты муртаттӕм; ӕмӕ Дзы фӕхынджылӕг кӕндзысты, ӕмӕ Йӕ нӕмдзысты, ӕмӕ Йыл фӕтутӕ кӕндзысты, ӕмӕ Йӕ амардзысты» (Маркы 10:33, 34).
3. Йесо хъӕбатыр цӕй фӕрцы уыд?
3 Йесо афтӕ хъӕбатыр цӕй фӕрцы уыд? Уырнындзинад ӕм кӕй уыдис ӕмӕ Хуыцауӕй кӕй тарст, уый фӕрцы (Дзуттытӕм 5:7; 12:2). Фӕлӕ сӕйрагдӕр та, Йесо хъӕбатыр уыд уарзондзинады фӕрцы – уарзта Хуыцауы ӕмӕ адӕмы (1 Иоанны 3:16). Уырнындзинад ӕмӕ Хуыцауы тасӕй уӕлдай ма уарзын куы ахуыр кӕнӕм, уӕд мах дӕр Чырыстийау хъӕбатыр уыдзыстӕм (Ефесӕгтӕм 5:2). Нӕ бон куыд у ахӕм уарзондзинад нӕ удыхъӕды фидар кӕнын? Хъуамӕ базонӕм, уарзондзинад кӕмӕй цӕуы, уый.
«Уарзондзинад Хуыцауӕй у»
4. Цӕмӕн ис зӕгъӕн, уарзондзинад Иегъовӕйӕ кӕй цӕуы?
4 Иегъовӕ йӕхӕдӕг ӕгасӕй у уарзондзинад ӕмӕ уыцы миниуӕг йӕхицӕй цӕуы. Апостол Иоанн фыста: «Уарзонтӕ! Уарздзыстӕм кӕрӕдзийы, уымӕн ӕмӕ уарзондзинад Хуыцауӕй у, ӕмӕ алкӕцы уарзӕг Хуыцауӕй гуырд у ӕмӕ зоны Хуыцауы; чи нӕ уарзы, уый нӕ базыдта Хуыцауы, уымӕн ӕмӕ Хуыцау у уарзондзинад» (1 Иоанны 4:7, 8). Уӕдӕ цӕмӕй адӕймагмӕ, Хуыцаумӕ цы уарзондзинад ис, ахӕм уарзондзинад уа, уый тыххӕй хъуамӕ бӕлвырд зонындзинӕдты руаджы Иегъовӕмӕ ӕввахсдӕр кӕна, цы базоны, уымӕ гӕсгӕ цӕра ӕмӕ уа коммӕгӕс (Филиппӕгтӕм 1:9; Иаковы 4:8; 1 Иоанны 5:3).
5, 6. Фыццаг чырыстӕттӕм Йесойы уарзондзинад цӕй фӕрцы фӕзынд?
5 Йесо йӕ 11 иузӕрдион апостолимӕ фӕстаг хатт куы скуывта, уӕд равдыста, адӕймаг Хуыцауы базоныныл куы архайа, уӕд йӕ уарзондзинад кӕй фидардӕр кӕндзӕн. «Ӕз [сын] дӕ ном раргом кодтон ӕмӕ сын ӕй ноджыдӕр раргом кӕндзынӕн, цӕмӕй, ды мӕн куыд бауарзтай, уыдон дӕр афтӕ уарзой, ӕмӕ цӕмӕй ӕз уон семӕ иудзинады» (Иоанны 17:26, НД). Йесо йӕ фӕдылдзӕуджыты ахуыр кодта, йӕ Фыдимӕ кӕрӕдзи куыд уарзтой, ахӕм уарзондзинадыл. Ныхасӕй дӕр ӕмӕ хъуыддагӕй дӕр сын ӕвдыста, Иегъовӕйы ном цы нысан кӕны, уый – йӕ диссаджы миниуджытӕ. Уымӕ гӕсгӕ Йесойы бон уыд зӕгъын: «Мӕн чи федта, уый федта мӕ Фыды дӕр» (Иоанны 14:9, 10, НД; 17:8).
6 Чырыстимӕ цы уарзондзинад ис, ахӕм уарзондзинад фӕзыны Хуыцауы сыгъдӕг уды фӕрцы (Галатӕгтӕм 5:22). Н. э. 33 азы Фӕндзайӕм бон фыццаг чырыстӕттыл сыгъдӕг уд куы ’рцыд, уӕд сӕ зӕрдыл ӕрлӕууыдысты, Йесо сӕ цӕуыл ахуыр кодта, ӕрмӕст уыдӕттӕ нӕ, фӕлӕ ноджы арфдӕр бамбӕрстой Фыстад. Уыцы арф зонындзинӕдты фӕрцы Хуыцауы тынгдӕр уарзын райдыдтой (Иоанны 14:26; 15:26). Уый сыл куыд фӕзынд? Кӕд сӕ цардӕн тӕссаг уыд, уӕддӕр ныфсджынӕй ӕмӕ зӕрдиагӕй хъусын кодтой хорз хабар (Куыстытӕ 5:28, 29).
Хъӕбатырдзинад ӕмӕ уарзондзинад хъуыддагӕй
7. Павел ӕмӕ Варнавӕ сӕ балцы рӕстӕг цытӕ бавзӕрстой?
7 Апостол Павел фыста: «Хуыцау нын цы сыгъдӕг уд радта, уый нӕ тӕппудтӕ нӕ аразы, фӕлӕ нӕ уадзы тых, дӕтты нын уарзондзинад ӕмӕ уӕззау зонд» (2 Тимофеймӕ 1:7, НД). Павел йӕхи царды тыххӕй дзырдта. Ӕркӕсӕм ма, Варнавӕимӕ ӕртӕ балцы рӕстӕг цы бавзӕрстой, уымӕ. Хъусын кодтой бирӕ рӕтты, уыимӕ Антиохийы, Иконийы ӕмӕ Листрӕйы. Алы сахары дӕр-иу адӕмӕй чидӕртӕ уырнджытӕ систы, чидӕртӕ та карзӕй сӕ ныхмӕ цыди (Куыстытӕ 13:2, 14, 45, 50; 14:1, 5). Листрӕйы Павелы дуртӕй фӕхостой ӕмӕ йӕ мардӕнхъӕлӕй ныууагътой. «Ахуыргӕнинӕгтӕ йыл куы ӕрӕмбырд сты, уӕд уый сыстад ӕмӕ бацыд сахармӕ, дыккаг бон та Варнавӕимӕ ацыд Дервимӕ» (Куыстытӕ 14:6, 19, 20).
8. Павел ӕмӕ Варнавӕйы хъӕбатырдзинад стыр уарзондзинадыл дзурӕг куыд уыд?
8 Павелы марынмӕ кӕй хъавыдысты, уый тыххӕй, мыййаг, Варнавӕимӕ фӕтарстысты ӕмӕ нал хъусын кодтой? Куыннӕ стӕй! Дервийы «бирӕ ахуыргӕнинӕгтӕ куы бацӕттӕ кодтой», уый фӕстӕ дыууӕйӕ дӕр «раздӕхтысты Листрӕ, Икони ӕмӕ Антиохимӕ». Цӕмӕн? Цӕмӕй ног ахуыргӕнинӕгты ныфс бауадзой ӕмӕ сын сӕ уырнындзинад бафидар кӕной. Павел ӕмӕ Варнавӕ дзырдтой: «Хуыцауы паддзахадмӕ бацӕуынӕн мах бирӕ фыдӕвзарӕнты сӕрты ахизын хъӕуы». Уӕдӕ бӕрӕг у, Чырыстийы «гыццыл фысты» тынг кӕй уарзтой, уый фӕрцы кӕй уыдысты хъӕбатыр (Куыстытӕ 14:21–23, НД; Иоанны 21:15–17, НД). Павел ӕмӕ Варнавӕ ног ӕмбырдты хистӕр нӕлгоймӕгты куы снысан кодтой, уӕд скуывтой ӕмӕ сӕ, «кӕуыл баууӕндыдысты, уыцы Хуыцау Йегъовӕйыл бафӕдзӕхстой».
9. Ефесы ӕмбырды хистӕр нӕлгоймӕгтыл Павелы уарзондзинад куыд фӕзынд?
9 Павелмӕ ахӕм уарзондзинад ӕмӕ хъӕбатырдзинад кӕй уыд, уымӕ гӕсгӕ йӕ чырыстӕттӕй бирӕтӕ тынг бауарзтой. Нӕ зӕрдыл ма ӕрлӕууын кӕнӕм, Павел Ефесы хистӕр нӕлгоймӕгтимӕ куы фембӕлд, уӕд цы ’рцыд, уый (уым фӕци ӕртӕ азы ӕмӕ йӕ ныхмӕ тынг цыдысты) (Куыстытӕ 20:17–31). Павел хистӕр нӕлгоймӕгты куы сразӕнгард кодта, цӕмӕй, Хуыцау сын цы дзуг бабар кодта, уый хизой, уӕд йӕ зонгуытыл ӕрлӕууыд ӕмӕ скуывта. Уый фӕстӕ «иууылдӕр куыдтой, ныттыхстысты-иу ын йе ’фцӕгыл ӕмӕ йын батӕ кодтой. Афтӕ кӕй загъта, нал мӕ фендзыстут, зӕгъгӕ, уӕлдай хъыг та сын уый уыди». Куыд тынг уарзтой уыцы ’фсымӕртӕ Павелы! Павел ӕмӕ йе ’мбӕлцӕттӕн цӕуыны рӕстӕг куы ’рхӕццӕ, уӕд сӕ Ефесы ӕмбырды хистӕр нӕлгоймӕгтӕ нӕ уагътой (Куыстытӕ 20:36–21:1, НТ).
10. Абон Иегъовӕйы Ӕвдисӕнтӕ хъӕбатырдзинад ӕмӕ уарзондзинад куыд ӕвдисынц?
10 Абон дӕр цӕуӕг цӕстдарджыты, ӕмбырды хистӕр нӕлгоймӕгты ӕмӕ бирӕ ӕндӕр чырыстӕтты зӕрдиагӕй уарзынц, Иегъовӕйы фысты сӕраппонд хъӕбатырдзинад кӕй ӕвдисынц, уый тыххӕй. Зӕгъӕм, хӕстытӕ кӕм цӕуы кӕнӕ хъусын кӕнын кӕм нӕ уадзынц, ахӕм бӕстӕты цӕуӕг цӕстдарджытӕ сӕ устытимӕ ӕмбырдтӕ бӕрӕг кӕныны тыххӕй сӕ цард ӕмӕ сӕ сӕрибардзинадӕн нӕ тӕрсынц. Иегъовӕйы Ӕвдисӕнтӕй бирӕтӕ фӕхъизӕмар кодтой, сӕ ныхмӕ чи цыд, уыцы хицӕутты къухӕй, уымӕн ӕмӕ-иу се ’мчырыстӕтты нӕ ауӕй кодтой кӕнӕ литературӕ кӕцӕй исынц уый нӕ загътой. Мингӕйтты та ӕфхӕрдтой, хъизӕмарӕй мардтой, кӕйдӕрты та суанг маргӕ дӕр акодтой, хъусын кӕныны хъуыддаг кӕнӕ чырыстон ӕмбырдтӕ кӕй нӕ ныууагътой, уый тыххӕй (Куыстытӕ 5:28, 29; Дзуттытӕм 10:24, 25). Цӕй уӕдӕ, ахӕм хъӕбатыр хотӕ ӕмӕ ӕфсымӕрты уырнындзинад ӕмӕ уарзондзинад фӕзмӕм! (1 Фессалоникӕгтӕм 1:6).
Дӕ уарзондзинад ма ’руазал уӕд
11. Сайтан Иегъовӕйы адӕмимӕ тох кӕнгӕйӕ цӕмӕй пайда кӕны ӕмӕ уыдон цы хъуамӕ аразой?
11 Сайтан зӕхмӕ ӕппӕрст куы ’рцыд, уӕдӕй нырмӕ йӕ маст калы Иегъовӕйы лӕггадгӕнджытыл, уымӕн ӕмӕ уыдон «Хуыцауы фӕдзӕхстытӕм гӕсгӕ цӕрынц ӕмӕ Йесойӕн ӕвдисӕн лӕууыныц» (Раргомад 12:9, 17, НТ). Хӕйрӕгӕн йӕ хӕцӕнгӕрзтӕй иу у, адӕмы нӕ ныхмӕ кӕй аразы, уый. Фӕлӕ арӕх хъуыддаг иннӕрдӕм рауайы. Кӕй сӕ ’фефхӕрынц, уый Хуыцауы адӕмы кӕрӕдзиуыл ӕнгомдӕр бабӕтты чырыстон уарзондзинадӕй ӕмӕ афтӕмӕй бирӕты бафӕнды зӕрдиагдӕрӕй лӕггад кӕнын. Сайтанмӕ ма ис ӕндӕр хӕцӕнгарз дӕр – нӕ тӕригъӕдджын буары монцтӕ. Цӕмӕй уыцы къӕппӕджы ма бахауӕм, уый тыххӕй хъӕуы ӕндӕр хуызы хъӕбатырдзинад, уымӕн ӕмӕ адӕймаг фӕтох кӕны йӕ мӕнгард ӕмӕ хӕлд зӕрдӕйы фӕндтимӕ (Иереми 17:9; Иаковы 1:14, 15).
12. Сайтан ацы дунейы зондӕй куыд пайда кӕны, цӕмӕй Хуыцаумӕ нӕ уарзондзинад ӕруазал уа?
12 Сайтанмӕ ма ис ӕндӕр тыхджын хӕцӕнгарз – Хуыцауы сыгъдӕг уды ныхмӕ чи у, уыцы «дунейы зонд» йе ’взӕр хъуыдытӕ ӕмӕ фӕндтимӕ (1 Коринфӕгтӕм 2:12, НД). Дунейы зонд разӕнгард кӕны кӕрӕф ӕмӕ ӕхца уарзынмӕ – уыдӕттӕ сты «цӕстыты фӕндон» (1 Иоанны 2:16; 1 Тимофеймӕ 6:9, 10). Кӕд дзаумӕттӕ кӕнӕ ӕхца сӕхӕдӕг ницы зиан хӕссынц, уӕддӕр сӕ Хуыцауӕй фылдӕр уарзын куы райдайӕм, уӕд зӕгъӕн ис, ӕмӕ ныл Сайтан фӕуӕлахиз. Ацы дунейы зонды тых цырен кӕны тӕригъӕдджын буар, ӕмӕ уӕлдӕф фенӕн куыд нӕй, афтӕ уый дӕр зын рахатӕн у ӕмӕ ис алкӕмдӕр. Уӕдӕ дыл ацы дунейы зонд ма фӕзынӕд! (Ефесӕгтӕм 2:2, 3; Ӕмбисӕндтӕ 4:23).
13. Нӕ хъӕбатырдзинад фӕлвӕрд куыд цӕуы?
13 Ацы дунейы ӕвзӕр зонды ныхмӕ фӕлӕууынӕн хъӕуы хъӕбатырдзинад ӕмӕ уӕд не ’фсарм бахъахъхъӕндзыстӕм. Зӕгъӕм, хъӕбатырдзинад хъӕуы, цӕмӕй сыстӕм ӕмӕ рацӕуӕм театрӕй, кӕнӕ ахуыссын кӕнӕм компьютер йе та телевизор, исты ӕнӕгъдаудзинӕдтӕ дзы куы ’вдисой, уӕд. Хъӕбатырдзинад ма хъӕуы, цӕмӕй ӕмгӕртты ’взӕр зондыл ма ацӕуӕм кӕнӕ ’взӕр ӕмбӕлттимӕ мауал лымӕн кӕнӕм. Стӕй ма нӕ хъӕуы, цӕмӕй Хуыцауы закъӕттӕ ӕмӕ уагӕвӕрдтӕ ма халӕм, кӕд ныл не ’мкъласонтӕ, не ’мкусджытӕ, нӕ сыхӕгтӕ кӕнӕ нӕ хӕстӕджытӕ худынц, уӕддӕр (1 Коринфӕгтӕм 15:33; 1 Иоанны 5:19).
14. Цы хъуамӕ аразӕм, ацы дунейы зонд ныл куы фӕзына, уӕд?
14 Уӕдӕ куыд ахсджиаг у, нӕ уарзондзинад Хуыцаумӕ ӕмӕ не ’мчырыстӕттӕм фидар кӕнын! Куыд цӕрыс ӕмӕ дын цы нысӕнттӕ ис, уый сбӕрӕг кӕнынӕн рӕстӕг ар, цӕмӕй фенай, ацы дунейы зонд дыл фӕзынд ӕви нӕ. Кӕд дыл иу гыццыл дӕр фӕзынд, уӕд кув Иегъовӕмӕ, цӕмӕй дын хъӕбатырдзинад радта, дӕ зонд ӕмӕ дӕ зӕрдӕ ссыгъдӕг кӕнынӕн ӕмӕ дарддӕр фидар лӕууынӕн. Иегъовӕ ахӕм зӕрдиаг куывдтытӕ алкӕддӕр хъусы (Псалом 50:19). Стӕй дӕ рох ма уӕд, йӕ сыгъдӕг уд бирӕ хъомысджындӕр у ацы дунейы зондӕй (1 Иоанны 4:4).
Хъӕбатырдзинад фӕлварӕнты
15, 16. Чырыстимӕ цы уарзондзинад уыдис, ахӕм уарзондзинад нын куыд ӕххуыс кӕны фӕлварӕнты? Ӕрхӕсс цӕвиттон.
15 Иегъовӕйы лӕггадгӕнджытӕ ма зындзинӕдтӕ ӕййафынц, ӕнӕххӕст ӕмӕ зӕронд кӕй кӕнынц, уый тыххӕй. Иуӕй-иутӕ фӕрынчын вӕййынц, кӕмӕндӕр та йӕ ныфс асӕтты (Ромӕгтӕм 8:22). Чырыстимӕ цы уарзондзинад уыдис, ахӕм уарзондзинад нын баххуыс кӕны уыцы фӕлварӕнтӕ сфӕразынӕн. Ӕркӕсӕм Наманголвӕйы хабармӕ. Уый схъомыл чырыстон бинонты ’хсӕн Замбийы. Дыууӕаздзыдӕй фӕсахъат. Наманголвӕ дзуры: «Тынг ӕфсӕрмыгӕнаг уыдтӕн. Афтӕ мӕм каст, ӕмӕ адӕм мӕ уындӕй тӕрсдзысты. Фӕлӕ мын ӕмбырдӕй ӕфсымӕртӕ баххуыс кодтой мӕ зондахаст фӕивын. Уый фӕрцы фӕныфсджын дӕн ӕмӕ иуцасдӕры фӕстӕ донаргъуыд райстон».
16 Кӕд Наманголвӕмӕ коляскӕ ис, уӕддӕр ӕй змисджын фӕндагыл арӕх бахъӕуы йӕ цыппӕртыл цӕуын. Фӕлӕ уӕддӕр афӕдз, ӕппынкъаддӕр дыууӕ мӕйы, ӕххуысгӕнӕг пионерӕй фӕлӕггад кӕны. Наманголвӕ кӕмӕн хъусын кодта, иу ахӕм сылгоймаг скуыдта. Цӕмӕн? Уымӕн ӕмӕ йын нӕ хойы уырнындзинад ӕмӕ ныфс йӕ зӕрдӕ тынг бацагайдтой. Иегъовӕ йын кӕй арфӕ кӕны, уый бӕрӕг у уымӕй, ӕмӕ Библи кӕимӕ ахуыр кодта, уыдонӕй фондз адӕймаджы донаргъуыд райста, иу та дзы ӕмбырды хистӕр нӕлгоймаг сси. Наманголвӕ дзуры: «Арӕх мӕ къӕхтӕ тынг фӕриссынц, фӕлӕ мӕ уый нӕ бауромы». Ӕрмӕст ацы хо нӕ, фӕлӕ ӕгас дунейы дӕр ахӕм уавӕрты ис бирӕ Ӕвдисӕнтӕ. Уыдон кӕд буарӕй лӕмӕгъ сты, уӕддӕр сты хъӕбатыр, уымӕн ӕмӕ уарзынц Иегъовӕйы ӕмӕ адӕмы. Куыд зынаргъ сты ахӕм адӕм Иегъовӕйӕн! (Аггей 2:7).
17, 18. Бирӕтӕн алыхуызон фӕлварӕнты цы ’ххуыс кӕны? Дӕхӕдӕг кӕй зоныс, ахӕм хабар радзур.
17 Низӕфхӕрд адӕмӕн сӕ ныфс асӕтты, суанг ма сӕхимӕ дӕр ныхъхъусынц. Иу ӕмбырды хистӕр нӕлгоймаг дзуры: «Цы чиныгахуырмӕ цӕуын, уым иу хомӕ ис сӕкӕрниз ӕмӕ уыргты низ, иннӕ хомӕ та рак, дыууӕйӕ та уӕззау рынчын сты артритӕй, иннӕ та – цармы туберкулезӕй ӕмӕ фибромиалгийӕйӕ. Иуӕй-иу хатт сӕ ныфс дӕр асӕтты. Фӕлӕ ’мбырдтӕ фӕцух кӕнынц, ӕрмӕстдӕр тынг тыхст кӕнӕ рынчындоны куы вӕййынц, уӕд. Се ’ппӕт дӕр ӕппынӕдзух хъусын кӕнынц. Уыдон мын мӕ зӕрдыл лӕууын кӕнынц апостол Павелы, афтӕ чи загъта: „Ӕз ӕдых куы вӕййын, уӕд тыхджын дӕн“. Ӕз дис кӕнын сӕ уарзондзинад ӕмӕ сӕ хъӕбатырдзинадыл. Ӕвӕццӕгӕн, цы уавӕры сты, уый фӕрцы цардмӕ раст цӕстӕй кӕсынц ӕмӕ сӕйрагдӕр цы у, уый ӕмбарынц» (2 Коринфӕгтӕм 12:10).
18 Кӕд ды дӕр рынчын, ӕнӕфӕразгӕ дӕ кӕнӕ ӕндӕр зындзинӕдтӕ ’взарыс, уӕд «ӕнӕрынцойӕ кув», цӕмӕй дӕ ныфс ма асӕтта (1 Фессалоникӕгтӕм 5:14, 17). Кӕй зӕгъын ӕй хъӕуы, алы хатт зӕрдӕхъӕлдзӕг нӕ уыдзынӕ, фӕлӕ архай хъуыды кӕнын Хуыцауы хъуыддӕгтыл ӕмӕ хорз ӕмӕ пайда цы у, ууыл, сӕйрагдӕр та, нӕ диссаджы ныфсыл – ног дунейыл. Иу хо афтӕ загъта: «Хъусын кӕнын мын хосӕй уӕлдай нӕу». Иннӕтӕн хорз хабары тыххӕй кӕй дзуры, уый руаджы йӕ ныфс фидар у.
Чи фӕрӕдыд, уыдонӕн уарзондзинад ӕххуыс кӕны, Иегъовӕмӕ раздӕхынӕн
19, 20. а) Тӕригъӕд чи сарӕзта, уыдонӕн цы баххуыс кӕндзӕн хъӕбатырдзинад равдисын ӕмӕ Иегъовӕмӕ раздӕхынӕн? ӕ) Цы равзардзыстӕм иннӕ статьяйы?
19 Йӕ уырнындзинад кӕмӕн ӕрлӕмӕгъ кӕнӕ тӕригъӕд чи сарӕзта, уыдонӕн ӕнцон нӕу Иегъовӕмӕ раздӕхын. Кӕд ахӕм адӕм ӕцӕгӕйдӕр ӕрфӕсмон кӕнынц ӕмӕ Хуыцаумӕ сӕ уарзты цӕхӕр ногӕй ссудзынц, уӕд сӕм фӕзыны хъӕбатырдзинад. Ӕркӕсӕм Америкӕйы цӕрӕг Мариойы * хабармӕ. Марио ныууагъта чырыстон ӕмбырд, райдыдта фыднозт кӕнын ӕмӕ сси наркоман, 20 азы фӕстӕ та ахӕстонмӕ бахауд. Марио дзуры: «Мӕ цардыл арф хъуыды кодтон ӕмӕ та Библи кӕсын райдыдтон. Рӕстӕг цыд, ӕмӕ та ногӕй аргъ кӕнын райдыдтон Иегъовӕйы миниуджытӕн, уӕлдайдӕр та йӕ фӕлмӕнзӕрдӕдзинадӕн ӕмӕ уыцы миниуӕджы тыххӕй арӕх куывтон Хуыцаумӕ. Ахӕстонӕй куы ссӕрибар дӕн, уӕд мӕ рагон ӕрдхӕрдтӕй мӕхи хызтон, райдыдтон ӕмбырдтӕм цӕуын ӕмӕ та фӕстӕмӕ Иегъовӕйы Ӕвдисӕн сдӕн. Цы байтыдтон уый кӕрдын – мӕ раздӕры цард ме ’нӕниздзинадыл фӕзынд. Фӕлӕ уӕддӕр диссаджы ныфсӕй хайджын дӕн. Зӕгъӕн куыд нӕй, афтӕ бузныг дӕн Иегъовӕйӕ, фӕлмӕнзӕрдӕ ӕмӕ хатыргӕнаг кӕй у, уый тыххӕй» (Псалом 102:9–13; 129:3, 4; Галатӕгтӕм 6:7, 8).
20 Кӕй зӕгъын ӕй хъӕуы, Мариойы уавӕры чи ис, уыдонӕн зын у сӕ къахыл слӕууын ӕмӕ Иегъовӕмӕ раздӕхын. Фӕлӕ Библи куы ахуыр кӕной, куы кувой ӕмӕ арф куы хъуыды кӕной, уӕд та сӕ уарзондзинад ссудздзӕн, ӕмӕ сӕм фӕзындзӕн хъӕбатырдзинад ӕмӕ бафидар уыдзысты. Мариойӕн ма баххуыс кодта ног дунейы цӕрыны ныфс. Уарзондзинад ӕмӕ нӕм уырнындзинад кӕй ис, Хуыцауӕй кӕй тӕрсӕм, канд уый нын не ’ххуыс кӕны, фӕлӕ ма ныфс дӕр. Иннӕ статьяйы мах лӕмбынӕг равзардзыстӕм ацы ахсджиаг миниуӕг.
[Фиппаинаг]
^ 19 абз. Ном ивд у.
Дӕ бон у дзуапп радтын?
• Йесо уарзондзинады фӕрцы диссаджы хъӕбатырдзинад куыд равдыста?
• Павел ӕмӕ Варнавӕ ӕфсымӕрты кӕй уарзтой, уый сын стыр хъӕбатырдзинад куыд лӕвӕрдта?
• Цавӕр хӕцӕнгӕрзтӕй архайы Сайтан, цӕмӕй чырыстӕтты уарзондзинад ӕруазал уа?
• Цавӕр фӕлварӕнтӕ у нӕ бон сфӕразын, хъӕбатыр кӕй стӕм ӕмӕ Иегъовӕйы кӕй уарзӕм, уый руаджы?
[Фарстытӕ ахуыр кӕнынӕн]
[Ныв 25 фарсыл]
Павел адӕмы кӕй уарзта, уый йын хъӕбатырдзинад лӕвӕрдта дарддӕр лӕггад кӕнынӕн
