Ӕнхъӕлмӕ кӕсын зон!
Ӕнхъӕлмӕ кӕсын зон!
«Ӕз ӕнхъӕлмӕ кӕсдзынӕн мӕ ирвӕзынгӕнӕг Хуыцаумӕ. Мӕ Хуыцау фехъусдзӕн мӕн» (МИХЕЙ 7:7).
1, 2. а) Ӕдзӕрӕгран израилӕгтӕн сӕ зондахаст хорз кӕй нӕ уыд, уый сӕ цӕмӕ ӕркодта? ӕ) Чырыстонӕн алы хъуыддагмӕ дӕр раст ахаст куы нӕ уа, уӕд ын цӕмӕй у тӕссаг?
ЦАРДЫ нын бирӕ цӕмӕдӕрты хорз ахаст уыдзӕн ӕви ӕвзӕр, уый баст у нӕ зондахастыл. Израилӕгтӕ ӕдзӕрӕгран куы уыдысты, уӕд диссаджы хуызы ӕфсӕст цыдысты маннӕйӕ. Ӕдзӕрӕгран бахӕрынӕн кӕй ницы уыд, уый уынгӕйӕ уыдон хъуамӕ стыр бузныг уыдаиккой Иегъовӕйӕ, ӕххормагӕй сӕ кӕй нӕ уагъта, уый тыххӕй. Ӕмӕ уымӕй бӕрӕг уыдаид, раст зондахаст сын кӕй уыд, уый. Уыдон та, Египеты цы алыхуызон хӕринӕгтӕ хордтой, уыдон мысыдысты ӕмӕ маннӕйыл былысчъилтӕ кодтой, ад дзы нӕй, зӕгъгӕ. Ӕвӕдза, цӕй фыдзонд уыдысты! (Нымӕцтӕ 11:4—6).
2 Абон дӕр, чырыстонӕн йӕ алыварс цы цӕуы, уымӕ йын цавӕр ахаст ис, уымӕй кӕнгӕ у, царды райгонд уыдзӕн ӕви ныфссаст, уый. Чырыстонӕн раст ахаст куы нӕ уа, уӕд ӕнцонӕй фесафдзӕн йӕ циндзинад, ӕмӕ уый та гыццыл хъуыддаг нӕу. Нееми уый тыххӕй афтӕ загъта: «Иегъовӕйыл кӕй цин кӕнӕм, уый [нӕ] фидар кӕны» (Нееми 8:10). Раст зондахаст ӕмӕ хъӕлдзӕг зӕрдӕйы уаг ахъаз сты, куыд нӕ фидардзинадӕн, афтӕ ӕмбырды фарн ӕмӕ иудзинадӕн дӕр (Ромӕгтӕм 15:13; Филиппӕгтӕм 1:25).
3. Ӕвзӕр заманы цӕргӕйӕ Иеремийӕн раст зондахаст куыд ӕххуыс кодта?
3 Кӕд Иереми тынг ӕвзӕр заманы цард, уӕддӕр ын уыд хорз зондахаст. Н. э. агъоммӕ 607 азы Иерусалимыл цы ӕвирхъау бӕллӕхтӕ ӕрцыд ӕмӕ куыд ныппырх, уый йӕхи цӕстӕй федта, фӕлӕ уӕддӕр ӕмбӕрста хъуыддаг бынтон ӕвзӕр кӕй нӕу, уый. Иегъовӕ нӕ ферох кӕндзӕн Израилы ӕмӕ йӕ адӕм бынтон нӕ фесӕфдзысты. Иеремийы куыды чиныджы пехуымпар фыста: «Иегъовӕйы уарзондзинад ӕмӕ хорзӕхы руаджы бынысӕфт нӕ фестӕм, уымӕн ӕмӕ йӕ хатырдзинад нӕ фӕуыдзӕн. Уый алы райсом дӕр тыхджынӕй-тыхджындӕр кӕны. Дӕ иузӕрдиондзинад ӕнӕкӕрон у» (Иеремийы куыд 3:22, 23). Хуыцауы лӕггадгӕнджытӕ алы заманты дӕр ӕмӕ цыфӕнды зын уавӕрты дӕр архайдтой, цӕмӕй сын уыдаид хорз зӕрдӕйыуаг ӕмӕ сӕ циндзинад ма фесӕфтаиккой (2 Коринфӕгтӕм 7:4; 1 Фессалоникӕгтӕм 1:6; Иаковы 1:2).
4. Йесойӕн алыхатт дӕр цавӕр зондахаст уыд ӕмӕ йын уыцы зондахаст куыд ӕххуыс кодта?
4 Иереми куы цард, уымӕй ӕхсӕз ӕнусы фӕстӕ зӕххыл цард Йесо, ӕмӕ уый дӕр бафӕрӕзта, раст зондахаст ын кӕй уыд, уый фӕрцы. Мах кӕсӕм: «Цы циндзинад Ӕм хаудта, уый бӕсты [«цы циндзинад ӕм ӕнхъӕлмӕ каст, уый сӕраппонд», НД] [Йесо] бавзӕрста дзуар, ницӕмӕ ӕрдаргӕйӕ ӕгаддзинад, ӕмӕ ӕрбадт Хуыцауы бадӕны рахизварс» (Дзуттытӕм 12:2). Йесойӕн йӕ ныхмӕ куы цыдысты, куы йӕ сырдтой, суанг ма хъизӕмары цӕджындзыл куы мард, уӕд дӕр хъуыды кодта, «цы циндзинад ӕм ӕнхъӕлмӕ каст», ууыл. Йӕ циндзинады сӕр та уый уыд, ӕмӕ йӕм ӕрхауд стыр кад: Иегъовӕ дунейы иунӕг стыр Хуыцау кӕй у, уый сбӕлвырд кӕнын ӕмӕ йын йӕ ном скадджын кӕнын, уыимӕ ма фидӕны ӕппӕт коммӕгӕс адӕмӕн дӕр стыр арфӕдзинӕдтӕ ӕрхӕссын.
Ӕнхъӕлмӕ кӕсын ахуыр кӕнӕм
5. Ӕнхъӕлмӕ кӕсын куы зонӕм, уӕд нын уый цавӕр уавӕрты ӕххуыс кӕндзӕн раст цӕстӕй кӕсынӕн?
5 Махӕн дӕр Йесойы зондахасты хуызӕн зондахаст куы уа, уӕд алыхатт дӕр цин кӕндзыстӕм Иегъовӕйыл, ӕгӕрыстӕмӕй хъуыддӕгтӕ мах куыд ӕнхъӕл уыдыстӕм, ӕмӕ мах кӕд фӕндыд, афтӕ куы нӕ цӕуой, уӕддӕр. Пехуымпар Михей загъта: «Ӕз та Иегъовӕйыл сӕвӕрдзынӕн мӕ ныфс. Ӕз ӕнхъӕлмӕ кӕсдзынӕн мӕ ирвӕзынгӕнӕг Хуыцаумӕ» (Михей 7:7; Иеремийы куыд 3:21). Махӕн дӕр нӕ бон у ӕнхъӕлмӕ кӕсын ахуыр кӕнын. Куыд? Уымӕн ис бирӕ фадӕттӕ. Зӕгъӕм, афтӕ нӕм куы кӕса, цыма ӕмбырды бӕрнхӕссӕг ӕфсымӕр цыдӕр раст нӕ сарӕзта ӕмӕ йӕ хъӕуы ӕвӕстиатӕй сраст кӕнын. Фӕлӕ кӕд ӕнхъӕлмӕ кӕсын зонӕм, уӕд ахъуыды кӕндзыстӕм: цымӕ ӕцӕгдӕр раст нӕ сарӕзта, ӕви ӕз рӕдийын? Стӕй кӕд ӕцӕгдӕр фӕрӕдыд, уӕд ӕй Иегъовӕ цӕмӕн ӕруагъта? Кӕд ӕй, мыййаг, ныфс ис, уыцы адӕймаг кӕй сраст уыдзӕн ӕмӕ йӕ карзӕй бафхӕрын кӕй нӕ бахъӕудзӕн?
6. Ӕнхъӕлмӕ кӕсын кӕй зонӕм, уый нын тыхст уавӕры куыд ӕххуыс кӕндзӕн?
6 Фӕразондзинад нӕ тынг хъӕуы, царды исты зындзинадыл куы сӕмбӕлӕм кӕнӕ исты ӕвзӕр миниуӕг ныууадзыныл куы фӕархайӕм, уӕд дӕр. Зӕгъӕм, Иегъовӕйӕ ӕххуыс курӕм, фӕлӕ уӕддӕр нӕ уавӕр нӕ ивы. Уӕд куыд? Хъуамӕ ӕппӕт тыхтӕй архайӕм, цӕмӕй уыцы зындзинад аиуварс кӕнӕм, ӕмӕ ӕууӕндӕм Йесойы ныхӕстыл: «Курут, ӕмӕ уын лӕвӕрд уыдзӕн; агурут, ӕмӕ ссардзыстут; хойут, ӕмӕ уын бакӕндзысты» (Лукайы 11:9). Кув, ӕмӕ ӕнхъӕлмӕ кӕс Иегъовӕмӕ. Иегъовӕ ӕнӕмӕнг ратдзӕн дзуапп дӕ куывтытӕн, йӕ хъуыдымӕ гӕсгӕ йӕ афон куы уа, уӕд ӕмӕ хуыздӕр куыд уа, афтӕ (1 Фессалоникӕгтӕм 5:17).
7. Ӕнхъӕлмӕ кӕсын куы зонӕм, уӕд нын уый куыд баххуыс кӕндзӕн, Библийы ӕмбарынад сындӕггай кӕй гом кӕны, уымӕ раст цӕстӕй кӕсынӕн?
7 Библийы пехуымпарӕдтӕ куыд ӕххӕст кӕнынц, афтӕ хуыздӕр ӕмбарӕм Фыстад. Фӕлӕ нӕм хаттӕй-хатт, чи зоны, афтӕ фӕкӕсы, цавӕрдӕр фарст ӕгӕр ӕрӕгмӕ цӕуы ӕмбӕрстгонд. Мах цы рӕстӕджы вӕййӕм ӕнхъӕл, дзуапп уӕд куы нӕ ӕрцӕуы, уӕд цӕттӕ вӕййӕм ӕнхъӕлмӕ кӕсынмӕ? Ӕрхъуыды ма кӕнӕм, Иегъовӕ «Чырыстийы сусӕггад» ӕргом кодта цадӕггай, ӕнӕхъӕн 4 000 азы дӕргъы (Ефесӕгтӕм 3:3—6). Цымӕ нын уӕдӕ уӕд исты ӕфсон ис, цӕмӕй мауал быхсӕм? Цымӕ Иегъовӕ йӕ адӕмӕн «афоныл хӕринаг» дӕттынӕн кӕй сӕвӕрдта, уыцы «ӕууӕнкджын ӕмӕ зондджын цагъарыл» ӕнӕууӕнк кӕндзыстӕм? (Матфейы 24:45). Алцы кӕронмӕ кӕй не ’мбарӕм, уый тыххӕй нӕхи хъуамӕ бынтондӕр фӕцух кӕнӕм Хуыцауы циндзинадӕй? Ма рох кӕнӕм, Иегъовӕ йӕхӕдӕг кӕй скъуыддзаг кӕны, йӕ «сусӕгдзинӕдтӕ» кӕд ӕмӕ куыд раргом кӕндзӕн, уый (Амос 3:7).
8. Иегъовӕйы фӕразондзинад бирӕтӕн пайда куыд ӕрхаста?
8 Чи зоны иуӕй-иу чырыстӕттӕн сӕ ныфс асаст, бирӕ азты иузӕрдионӕй фӕлӕггад кодтой ӕмӕ сӕм ныр афтӕ кӕй кӕсы, ӕмӕ «Иегъовӕйы стыр ӕмӕ тасӕфтауӕг боны» ӕрцыдмӕ нӕ фӕцӕрдзысты (Иоиль 2:30, 31). Фӕлӕ хъуыддагмӕ раст цӕстӕй куы кӕсой, уӕд сӕ уый бафидар кӕндзӕн. Петр ахӕм уынаффӕ радта: «Нӕ Хицауы бирӕ фӕразондзинад нымайут ирвӕзындзинадыл» (2 Петры 3:15). Иегъовӕйы фӕразондзинады фӕрцы ма милуангай сыгъдӕгзӕрдӕ адӕймӕгтӕн сӕ бон сси ӕцӕгад базонын. Ӕмӕ уый хорз нӕу? Иегъовӕ афтӕ бирӕ кӕй быхсы, уый фӕрцы нӕхицӕн дӕр ис фылдӕр рӕстӕг, цӕмӕй «тасимӕ ӕмӕ ризгӕйӕ ӕххӕст кӕнӕм [нӕ] ирвӕзындзинад» (Филиппӕгтӕм 2:12; 2 Петры 3:11, 12).
9. Иегъовӕйӕн лӕггадгӕнгӕйӕ нӕ цас фӕнды, нӕ бон уыйбӕрц куы нӕ уа аразын, уӕд нын ӕнхъӕлмӕ кӕсын кӕй зонӕм, уый куыд баххуыс кӕндзӕн?
9 Ӕнхъӕлмӕ кӕсын куы зонӕм, уӕд Паддзахады тыххӕй хъусын кӕнгӕйӕ цы цӕлхдуртыл ӕмбӕлӕм, уыдон нын не уӕнг нӕ амардзысты. Зӕгъӕм, низ ныл кӕй стых кӕнӕ кӕй базӕронд стӕм, уымӕ гӕсгӕ нӕ бон афтӕ бирӕ кӕй нал у, кӕнӕ чидӕр нӕ ныхмӕ кӕй цӕуы, уый аххосӕй, йе та ӕндӕр зындзинады тыххӕй. Иегъовӕйы уый ныфс ис, ӕмӕ йын ӕппӕт зӕрдӕйӕ кӕй лӕггад кӕндзыстӕм (Ромӕгтӕм 12:1). Фӕлӕ нӕ йӕхӕдӕг дӕр ӕмӕ йӕ Фырт, мӕгуыр адӕймагӕн тӕригъӕд чи кӕны, уый дӕр, нӕ бон цы у, уымӕй фылдӕр нӕ домынц (Псалом 71:13). Уӕдӕ нӕ уавӕртӕ ацы дунейы фӕивой ӕви ног дунейы, уӕддӕр нӕ Библи разӕнгард кӕны, цӕмӕй фӕразонӕй ӕнхъӕлмӕ кӕсӕм ӕмӕ нӕ бон цы у, уый аразӕм. Алкӕддӕр нӕ зӕрдыл дарӕм: «Хуыцау ӕнӕраст нӕу, цӕмӕй ферох кӕна нӕ хъуыддаг ӕмӕ уарзондзинады куыст, кӕцы мах кӕнӕм Уый номыл, бакусгӕйӕ ӕмӕ кусгӕйӕ сыгъдӕджытӕн» (Дзуттытӕм 6:10).
10. Адӕймаг ӕнхъӕлмӕ кӕсын куы зона, уӕд йӕхи цавӕр ӕнӕхуыцау миниуӕгӕй бахиздзӕн? Бамбарын ӕй кӕн.
10 Ӕнхъӕлмӕ кӕсын куы зонӕм, уӕд ма нын уый ӕххуыс кӕндзӕн, цӕмӕй ӕгӕр ныфсхаст макуы суӕм. Иуӕй-иутӕ ӕцӕгады фӕндаг ныууагътой, ӕнхъӕлмӕ кӕсын сӕ кӕй нӕ фӕндыд, уый тыххӕй. Чи зоны уыдон хъуыды кодтой, цыдӕр кӕй хъӕуы фӕивын, Библи куыд ӕмбӕрстгонд цӕуы кӕнӕ Хуыцауы организацийы разамынд куыд лӕвӕрд цӕуы, уыцы хъуыддаджы. Фӕлӕ уыдон нӕ фӕндыд бамбарын, Иегъовӕйы сыгъдӕг уд кӕй разӕнгард кӕны ӕууӕнкджын ӕмӕ зондджын цагъары ивындзинӕдтӕ бахӕссынмӕ, мах кӕд нымайӕм ӕнӕмӕнгхъӕуӕгыл уӕд нӕ, фӕлӕ Уый цы рӕстӕг снысан кӕны, уӕд. Стӕй алы ивындзинад дӕр хъуамӕ уа, мах фӕндонмӕ гӕсгӕ нӕ, фӕлӕ Иегъовӕйы фӕндонмӕ гӕсгӕ. Аздӕхджытӕ афтӕ скъӕйных вӕййынц, ӕмӕ цы фӕаразынц, уый нал фембарынц ӕмӕ уыйадыл рӕдыд фӕндагыл ацӕуынц. Фӕлӕ сын Чырыстийы зондахаст куы уыдаид, уӕд сӕ циндзинад нӕ фесӕфтаиккой ӕмӕ дарддӕр дӕр Иегъовӕйы адӕмимӕ уаиккой (Филиппӕгтӕм 2:5—8).
11. Ӕнхъӕлмӕ кӕсгӕйӕ нын рӕстӕгӕй раст пайда кӕнынӕн кӕй дӕнцӕг ӕххуыс кӕны ӕмӕ куыд?
11 Кӕй зӕгъын ӕй хъӕуы, ӕнхъӕлмӕ кӕсын уый нӕ нысан кӕны, ӕмӕ ӕнӕмӕтӕй, нӕ иу къах не ’ннӕ къахыл сӕвӕргӕйӕ, бадӕм. Махӕн ис, цы аразӕм, уый. Зӕгъӕм, ӕрвылкъуыри дӕр нӕ хъӕуы Библи иртасын ӕмӕ уымӕй ӕвдисын, Хуыцауы хъуыддӕгтӕ иузӕрдион пехуымпарты ӕмӕ ма суанг зӕдты дӕр куыд цымыдис кодтой, мах дӕр афтӕ кӕй цымыдис кӕнынц, уый. Уыцы стыр цымыдисдзинады тыххӕй дзургӕйӕ, Петр загъта: «Ацы удыбӕстӕдзинады фӕцагуырдтой ӕмӕ йӕ иртӕстой пехуымпартӕ... Зӕдты дӕр фӕнды ацы хъуыддагмӕ бахъарын [ацы хъуыддаг бамбарын]» (1 Петры 1:10—12, НФ). Фӕлӕ уымӕн фаг нӕу Библи сӕрмагондӕй ахуыр кӕнын. Хъӕуы ма алы къуыри дӕр фембӕлдтӕм цӕуын ӕмӕ Хуыцаумӕ кувын (Иаковы 4:8). Уӕдӕ уырнындзинад фидар кӕнын кӕй хъӕуы, уый чи ӕмбары ӕмӕ йыл ӕдзух архайгӕ дӕр чи кӕны, йе ’мчырыстӕттимӕ чи ӕмбӕлы, уыдон ӕвдисынц, Чырыстийы зондахаст сын кӕй ис, уый (Матфейы 5:3).
Ӕмбаргӕ у
12. а) Адам ӕмӕ Евӕ цавӕр хӕдбардзинад агуырдтой? ӕ) Адӕм Адам ӕмӕ Евӕйы фӕдыл кӕй цӕуынц, уый цӕмӕ ӕркодта?
12 Хуыцау фыццаг лӕг ӕмӕ усы куы сфӕлдыста, уӕд сын уый бар нӕ радта, цӕмӕй хорз ӕмӕ ӕвзӕр цы у, уый сӕхӕдӕг скъуыддзаг кодтаиккой (Уӕвынад 2:16, 17). Фӕлӕ Адам ӕмӕ Евӕ сфӕнд кодтой Хуыцауӕй сӕхи аиуварс кӕнын, ӕмӕ уый тыххӕй ис абон ӕгас дуне ахӕм уавӕры. Апостол Павел загъта: «Иу адӕймагӕй тӕригъӕд куыд бацыди дунемӕ, ӕмӕ тӕригъӕдӕй мӕлӕт, афтӕ мӕлӕт дӕр бахызт ӕппӕт адӕммӕ, уымӕн ӕмӕ уый мидӕг иуылдӕр тӕригъӕд ракодтой» (Ромӕгтӕм 5:12). Адамӕй фӕстӕмӕ ӕхсӕз миназы дӕргъы адӕм куыд цардысты, уымӕй диссаджы хуызы бӕлвырд кӕны, Иеремийы ныхӕстӕ раст кӕй сты, уый: «О, Иегъовӕ, зонын ӕй, лӕджы фыртӕн йӕ фӕндаг йӕхицӕй кӕнгӕ кӕй нӕу, уый. Фӕндаггон лӕгӕн йӕ къахдзӕфтӕ йӕ бар кӕй не сты, уый» (Иереми 10:23). Мах ӕмбарӕм, Иеремийы ныхӕстӕ ӕрхӕндӕг ахастыл дзурӕг кӕй не сты, уый. Уыцы ныхӕсты зыны ӕмбаргӕдзинад. Уыдон ӕмбарын кӕнынц, ӕнусты дӕргъы «адӕймаг адӕймагыл йӕ зианӕн [цӕмӕн] хицауиуӕг кӕны», уый — уымӕн ӕмӕ адӕм хицауиуӕг кодтой ӕнӕ Хуыцауӕй (Екклесиаст 8:9).
13. Адӕмӕн сӕ бон цы у саразын, уымӕ Иегъовӕйы Ӕвдисӕнтӕн цавӕр ахаст ис?
13 Дунейы уавӕрмӕ кӕсгӕйӕ Иегъовӕйы Ӕвдисӕнтӕ ӕмбарынц, цалынмӕ ацы цардӕвӕрд уа, уӕдмӕ хорзырдӕм стыр ивындзинӕдтӕм ӕнхъӕлмӕ кӕсӕн кӕй нӕй, уый. Цӕмӕй нӕ циндзинад ма фесафӕм, уый тыххӕй нӕ хъӕуы царды хорзӕй цы ис, уый уынын ӕмӕ райгонд уӕвын, фӕлӕ кӕй зӕгъын ӕй хъӕуы, уымӕй дунейы фарстатӕ нӕ алыг уыдзысты. 1950-ӕм азты райдианы иу америкаг сауджын мыхуыры рауагъта тынг зындгонд чиныг «Хорз зондахасты тых» («The Power of Positive Thinking»). Уыцы чиныгӕн йӕ сӕйраг хъуыды уый мидӕг уыд, ома зындзинӕдтӕн сӕ фылдӕр аскъуыддзаг кӕнӕн ис хорз зондахасты фӕрцы. Кӕй зӕгъын ӕй хъӕуы, адӕймагӕн хорз зондахаст куы уа, уӕд уый хорз у. Фӕлӕ цард куыд ӕвдисы, афтӕмӕй нӕ алкӕмӕндӕр йӕ разы цы цӕлхдуртӕ сӕвзӕры, уыдон сӕрты цас ӕнтыстджынӕй ахиздзӕн, уый баст у нӕ зонындзинӕдтӕ, нӕ арӕхстдзинад, нӕ фӕрӕзтӕ ӕмӕ ма бирӕ ӕндӕр цӕуылдӕртыл. Ӕмткӕй дунейы раз цы зындзинӕдтӕ ис, уыдон та афтӕ стыр сты, ӕмӕ адӕмӕн цыфӕнды хорз зондахаст ма уа, уӕддӕр сӕ сӕ бон никуыд у алыг кӕнын!
14. Иегъовӕйы Ӕвдисӕнтӕн зыгъуыммӕ зондахаст ис? Бамбарын ӕй кӕн.
14 Иегъовӕйы Ӕвдисӕнтӕ ахӕм фарстатӕ раст кӕй ӕмбарынц, уый тыххӕй сӕм хаттӕй-хатт ахӕм азым фӕхӕссынц, зӕгъгӕ, уыдонӕн ӕвзӕр зондахаст ис. Фӕлӕ ӕцӕгӕй та хъуыддаг уый мидӕг ис, ӕмӕ уыдон адӕмӕн зӕрдиагӕй дзурынц, цард бындуронӕй кӕй бон у фӕивын, Уый тыххӕй. Ӕмӕ та ам дӕр уыдон ӕвдисынц, Чырыстийы зондахаст сын кӕй ис, уый (Ромӕгтӕм 15:2, НФ). Уыдон сӕ рӕстӕг ӕмӕ сӕ хъарутӕ не ’вгъау кӕнынц, адӕмӕн Хуыцауимӕ хорз ахастытӕ скӕнынӕн баххуыс кӕнынӕн, уымӕн ӕмӕ зонынц, ӕппынфӕстаг уый кӕй ӕрхӕсдзӕн адӕмӕн иууыл стырдӕр хорздзинад (Матфейы 28:19, 20; 1 Тимофеймӕ 4:16).
15. Иегъовӕйы Ӕвдисӕнтӕ цы аразынц, уый бирӕты цардыл хуыздӕрырдӕм куыд ӕндавы?
15 Афтӕ зӕгъӕн нӕй, ӕмӕ Иегъовӕйы Ӕвдисӕнтӕ куыдфӕндыйы цӕстӕй кӕсынц дунейы адӕм цы зындзинӕдтыл ӕмбӕлынц, уыдонмӕ, уӕлдайдӕр та адӕмы ӕнӕхуыцау уагахастмӕ. Цымыдисгӕнӕг адӕймаг цалынмӕ Иегъовӕйы Ӕвдисӕн свӕййы, уӕдмӕ йӕ цард фӕивы, арӕх та йӕ бахъӕуы, Хуыцауы зӕрдӕмӕ чи нӕ цӕуы, ахӕм хъуыддӕгтӕ ныууадзын дӕр (1 Коринфӕгтӕм 6:9—11). Афтӕмӕй Иегъовӕйы Ӕвдисӕнтӕ бирӕ сыгъдӕгзӕрдӕ адӕймӕгтӕн баххуыс кодтой, фыднозт, наркотиктӕ, ӕнӕгъдау цардыуаг ӕмӕ ӕхцайыл хъазын ныууадзынӕн. Йӕ цард чи фӕивта, уыдон сахуыр сты сӕ бинонты дарын ӕмӕ сыл зӕрдӕбынӕй аудын (1 Тимофеймӕ 5:8). Ӕмӕ уыцы адӕймӕгтӕ, стӕй ма сӕ бинонтӕ дӕр ахӕм ӕххуыс куы райсынц, уӕд фӕкъаддӕр вӕййынц ӕхсӕнады зындзинӕдтӕ дӕр: уымӕн ӕмӕ фӕкъаддӕр вӕййы наркомантӕ, йӕ бинонтӕм йӕ къух чи исы кӕнӕ ӕндӕр хуызы фыдракӕндтӕ чи аразы, ахӕм адӕймӕгты нымӕц. Иегъовӕйы Ӕвдисӕнтӕ сты, закъон цӕсгомджынӕй чи ӕххӕст кӕны, ахӕм ӕмбӕстӕгтӕ, ӕмӕ ма иннӕтӕн дӕр ӕххуыс кӕнынц сӕ цард хуыздӕрырдӕм фӕивынӕн, ӕмӕ уымӕй рогдӕр кӕнынц, ӕхсӕнады зындзинӕдтимӕ чи тох кӕны, уыцы хицӕутты уӕззау уаргъ.
16. Иегъовӕйы Ӕвдисӕнтӕ ӕхсӕнадон змӕлдты хайад цӕуылнӕ исынц?
16 Цымӕ Иегъовӕйы Ӕвдисӕнты архайд ацы дунейыл ӕмткӕй райсгӕйӕ исты хуызы фӕзынд хуыздӕрырдӕм? Кӕй зӕгъын ӕй хъӕуы. Фӕстаг дӕс азы дӕргъы уацамынды ӕрвылмӕй дӕр зӕрдӕбынӕй чи исы хайад, уыцы Ӕвдисӕнты нымӕц 3 800 000 схызт 6 000 000 онг. Цы 2 200 000 адӕймаджы фӕфылдӕр сты, уыдонӕй бирӕтӕ цалынмӕ чырыстон фӕндагыл не слӕууыдысты, уӕдмӕ кодтой ӕнӕгъдау цард. Ныр сӕ цард фӕивта хуыздӕрырдӕм! Фӕлӕ ӕгас зӕххы къорийы адӕмы нымӕц та фӕфылдӕр 875 000 000 адӕймаджы, ӕмӕ уыимӕ абаргӕйӕ уыцы нымӕц, кӕй зӕгъын ӕй хъӕуы, тынг гыццыл у. Кӕд Иегъовӕйы Ӕвдисӕнтӕн тынг ӕхсызгон у, чи сӕм хъусы, уыдонӕн ӕххуыс кӕнын, уӕддӕр ӕмбарынц, дунейы адӕмӕй царды фӕндагыл ӕрмӕстдӕр стӕмтӕ кӕй цӕудзысты, уый (Матфейы 7:13, 14). Ӕвдисӕнтӕ зонынц, цард хуыздӕрырдӕм ӕрмӕстдӕр Хуыцау кӕй фӕивдзӕн, уый, ӕмӕ, уыцы рӕстӕгмӕ ӕнхъӕлмӕ кӕсгӕйӕ, хайад нӕ исынц алыхуызон ӕхсӕнадон змӕлдты. Кӕд ахӕм змӕлдтӕ арӕх хорз фӕндтӕй райдайынц, уӕд фӕстагмӕ фыдӕнхъӕл фӕвӕййынц ӕмӕ ма суанг тыхмимӕ дӕр ӕркӕнынц (2 Петры 3:13).
17. Йесо адӕмӕн баххуыс кӕнынӕн цы арӕзта ӕмӕ цы нӕ арӕзта?
17 Афтӕ аразгӕйӕ Иегъовӕйы Ӕвдисӕнтӕ ӕвдисынц, Йесо йӕ зӕххон царды дӕргъы куыд ӕууӕндыд Иегъовӕйыл, уыдон дӕр ыл афтӕ кӕй ӕууӕндынц, уый. Фыццаг ӕнусы Йесо адӕмы диссаджы хуызы дзӕбӕх кодта (Лукайы 6:17—19). Суанг ма мӕрдты дӕр ӕгас кодта (Лукайы 7:11—15; 8:49—56). Фӕлӕ Йесо уӕд адӕмы низтӕ ӕмӕ мӕлӕтӕй нӕ фервӕзын кодта. Йесо зыдта, уыцы хъуыддӕгтӕн Хуыцау цы ӕмгъуыд снысан кодта, уый кӕй нӕма ӕрцыд, уый. Ӕххӕст адӕймаг уӕвгӕйӕ, Йесойӕн йӕ бон уыд стыр политикон ӕмӕ ӕхсӕнадон фарстатӕ алыг кӕнын. Куыд зонӕм, афтӕмӕй йе ’мдуггӕгтӕй иуӕй-иуты фӕндгӕ дӕр кодта, Йесойы паддзахӕй сӕвӕрын ӕмӕ йын уыцы хъуыддӕгтӕ йӕ бар бакӕнын, фӕлӕ сын уый нӕ бакуымдта. Мах кӕсӕм: «Йесо цы диссаг сарӕзта, уый фенгӕйӕ, адӕм загътой: ай ӕцӕгдӕр, дунемӕ Чи хъуамӕ ӕрцӕуа, Уыцы Пехуымпар у. Фӕлӕ Йесо куы базыдта, ӕрбацӕуыны фӕнд сӕм кӕй ис, цӕмӕй Йӕ ӕрцахсой ӕмӕ Йӕ паддзах скӕной, уӕд ногӕй иунӕгӕй хохмӕ сфардӕг» (Иоанны 6:14, 15, «Мах дуг» № 5, 1992 аз).
18. а) Йесо ӕнхъӕлмӕ кӕсын кӕй зоны, уый цӕмӕй бӕрӕг у? ӕ) 1914 азӕй Йесойы архайд куыд фӕивта?
18 Йесо политикон ӕмӕ ӕхсӕнадон хъуыддӕгты хайад исын уымӕн нӕ бакуымдта, ӕмӕ зыдта, йӕ рӕстӕг куы ’рцӕуа, уӕд паддзах кӕй суыдзӕн ӕмӕ уӕд зӕххыл адӕм кӕмфӕнды ма уой, уӕддӕр сӕ иууылдӕр кӕй сдзӕбӕх кӕндзӕн, уый. Уӕларвмӕ куы ацыд ӕмӕ ӕнӕмӕлгӕ фӕлдисонд куы сси, уӕддӕр уайтагъд нӕ райдыдта архайын, фӕлӕ ӕнхъӕлмӕ каст Иегъовӕйы нысангонд рӕстӕгмӕ (Псалом 109:1; Куыстытӕ 2:34, 35). Фӕлӕ 1914 азы уый сси Хуыцауы Паддзахады Паддзах, ӕмӕ уымӕ гӕсгӕ ныр архайы, «куыд уӕлахизхӕссӕг, ӕмӕ цӕмӕй фӕуӕлахиз уа» (Раргомад 6:2; 12:10). Кӕд иннӕты, сӕхи чырыстӕттыл чи нымайы, уыдон нӕ фӕнды, Библи Паддзахады тыххӕй цы дзуры, ууыл ӕууӕндын, уӕд мах та амондджын стӕм йӕ Паддзахады дӕлбар кӕй стӕм, уымӕй!
Ӕнхъӕлмӕ кӕсын — масты хос ӕви циндзинады?
19. Ӕнхъӕлмӕ кӕсынӕй «адӕймаг зӕрдӕниз кӕд райсы» ӕмӕ стыр циндзинад та кӕд райсы?
19 Соломон зыдта, ӕнхъӕлмӕ кӕсын ӕнцон кӕй нӕу, уый. Уый фыста: «Бирӕ ӕнхъӕлмӕ кӕсынӕй адӕймаг зӕрдӕниз исы» (Фӕсномыг ныхӕстӕ 13:12). Адӕймаг, ӕрцӕуӕн цӕмӕн нӕй, ахӕм цӕмӕдӕрты куы ӕнхъӕлмӕ кӕса, уӕд, кӕй зӕгъын ӕй хъӕуы, фыдӕнхъӕл фӕуыдзӕн, ӕмӕ, гӕнӕн ис, зӕрдӕниз дӕр райса. Фӕлӕ ӕхсызгон цаутӕм куы фенхъӕлмӕ кӕсӕм, зӕгъӕм чындзӕхсӕвмӕ, сывӕллоны райгуырдмӕ, кӕнӕ кӕй уарзӕм, уыдонимӕ фембӕлдмӕ, уӕд нӕ зӕрдӕтӕ развӕлгъау цинӕй байдзаг вӕййынц. Нӕ циндзинад ноджы фылдӕр вӕййы, уыцы боны ӕрцыдмӕ ӕнхъӕлмӕ кӕсгӕйӕ, иу ран куы нӕ фӕбадӕм, фӕлӕ нӕхи куы фӕцӕттӕ кӕнӕм, уӕд.
20. а) Цавӕр диссаджы цаутӕм ӕнхъӕлмӕ кӕсӕм? ӕ) Иегъовӕйы зӕрдӕвӕрдты сӕххӕстмӕ ӕнхъӕлмӕ кӕсгӕйӕ, нӕ бон куыд у циндзинад арын?
20 Цӕмӕ ӕнхъӕлмӕ кӕсӕм, уый кӕд уыдзӕн, уый бӕлвырдӕй куы нӕ зонӕм, фӕлӕ кӕй ӕрцӕудзӕн, ууыл фидарӕй куы ӕууӕндӕм, уӕд, ӕнхъӕлмӕ кӕсгӕйӕ, «зӕрдӕниз никуы райсдзыстӕм». Хуыцауы иузӕрдион лӕггадгӕнджытӕ зонынц, Чырыстийы Миназон хицауиуӕгад нӕ къӕсӕрыл кӕй ис, уый. Уыдон фидарӕй уырны, мӕлӕт ӕмӕ низтӕ кӕй фесӕфдзысты, уый сӕхи цӕстӕй кӕй фендзысты, уый. Уыдон ӕхсызгонӕй ӕнхъӕлмӕ кӕсынц, миллиардгай адӕймӕгтӕ, уыимӕ сӕ зынаргъ адӕймӕгтӕ дӕр, куы райгас уой, уымӕ (Раргомад 20:1—3, 6; 21:3, 4). Кӕд абон ӕрдз афтӕ чъизи у, уӕддӕр уыдон фидарӕй зонынц, Дзӕнӕты зӕххыл алцыдӕр йӕ гаччы кӕй сбаддзӕн, уый (Исай 35:1, 2, 7). Уӕдӕ куыд ахсджиаг у, цӕмӕй ӕнхъӕлмӕ цалынмӕ кӕсӕм, уӕдмӕ рӕстӕгӕй раст пайда кӕнӕм, ома «ӕдзухдӕр ӕнтыстджын [уӕм] Хицауы хъуыддаджы»! (1 Коринфӕгтӕм 15:58). Хуыцауы Ныхас кӕсӕм алы бон дӕр. Алы бон дӕр Иегъовӕимӕ нӕ ахастытӕ ӕнгомдӕр кӕнӕм. Агурӕм, Иегъовӕйӕн лӕггад кӕнын ма ноджыдӕр кӕй фӕнды, уыцы сыгъдӕгзӕрдӕ адӕймӕгты. Фидар кӕнӕм не ’муырнджыты. Цалынмӕ ма нын Иегъовӕ фадат дӕтты, уӕдмӕ алы минутӕй дӕр раст пайда кӕнӕм. Ӕмӕ уӕд, Иегъовӕмӕ ӕнхъӕлмӕ кӕсгӕйӕ, «зӕрдӕниз нӕ райсдзыстӕм», фӕлӕ цин кӕндзыстӕм!
Куыд бамбарын кӕндзынӕ?
• Йесо ӕнхъӕлмӕ кӕсын кӕй зоны, уый цӕмӕй бӕрӕг у?
• Чырыстӕтты фӕразондзинад цавӕр уавӕрты хъӕуы?
• Иегъовӕйы Ӕвдисӕнтӕ Иегъовӕмӕ кӕй ӕнхъӕлмӕ кӕсынц, уый сын циндзинад цӕмӕн хӕссы?
• Цӕмӕй Иегъовӕмӕ ӕнхъӕлмӕ кӕсгӕйӕ циндзинад исӕм, уый тыххӕй цы хъӕуы?
[Фарстатӕ ахуыр кӕнынӕн]
[Нывтӕ 24 фарсыл]
Йесо бафӕрӕзта, цы циндзинад ӕм ӕнхъӕлмӕ каст, уый сӕраппонд.
[Ныв 25 фарсыл]
Кӕд Иегъовӕйӕн бирӕ азты дӕргъы лӕггад кӕнӕм, уӕддӕр нӕ бон у нӕ циндзинад ма фесафын.
