«ХОРЗ УС». Иуӕй-иу хатт-иу Йесо афтӕ сдзырдта сылгоймӕгтӕм. Зӕгъӕм, 18 азы дӕргъы рынчын чи уыд ӕмӕ йӕ низӕй чи ныкъкъӕдзтӕ, ахӕм сылгоймаджы куы сдзӕбӕх кодта, уӕд ын загъта: «Хорз ус, дӕ низӕй фервӕзтӕ» (Лук. 13:10–13). Иухатт Марийӕ Магдалинӕимӕ куы ныхас кодта, уӕд уымӕ дӕр афтӕ сдзырдта (Иоан. 20:15). Уыцы заман уый уӕздандзинадыл нымад уыди. Фӕлӕ ма сылгоймагмӕ дзургӕйӕ пайда кодтой ӕндӕр ныхасӕй дӕр, ӕмӕ уыцы ныхас та фылдӕр цӕуылдӕр дзурӕг уыди.

Библийы уыцы ныхас ӕмбӕлы, иуӕй-иу сылгоймӕгты кой дзы кӕм цӕуы, уым. Йесо дзы спайда кодта, 12 азы тугцыдӕй чи удхар кодта, ахӕм сылгоймагимӕ ныхас кӕнгӕйӕ. Сылгоймаг Йесомӕ кӕй бацыд, уый Хуыцауы Закъонмӕ гӕсгӕ раст нӕ уыд, уымӕн ӕмӕ ахӕм уавӕры адӕймаг сыгъдӕгыл нымад нӕ уыди. Уыцы сылгоймаг хъуамӕ иннӕтӕй йӕхи хызтаид (Лев. 15:19–27). Фӕлӕ сылгоймаг тынг тыхст уыди. «Бирӕ дохтыртӕм фӕцыд, ӕмӕ йын бирӕ хъизӕмӕрттӕ бавзарын кодтой, стӕй йӕм цыдӕриддӕр уыд, уый схардз кодта, фӕлӕ фыддӕр йеддӕмӕ хуыздӕр нӕ фӕци» (Мар. 5:25, 26).

Сылгоймаг адӕмы ’хсӕнты сабыргай Йесомӕ фӕстӕрдыгӕй бацыд ӕмӕ йын йӕ уӕлӕдарӕсы хаутыл андзӕвыд. Ӕмӕ йӕ туг уайтагъд йӕ цӕуынӕй банцад! Сылгоймаджы ныфс уыд, цы сарӕзта, уый кӕй ничи базондзӕн, фӕлӕ Йесо бафарста: «Чи мыл андзӕвыд?» (Лук. 8:45–47). Уӕд ӕм сылгоймаг тӕрсгӕ-ризгӕйӕ бацыд, йӕ разы йӕ зонгуытыл ӕрхауд «ӕмӕ йын ӕппӕт дӕр радзырдта» (Мар. 5:33).

Цӕмӕй сылгоймаг ма фӕтыхстаид, уый тыххӕй йын Йесо фӕлмӕнӕй загъта: «Ма тӕрс, мӕ чызг» (Матф. 9:22). Библи иртасджытӕ куыд зӕгъынц, афтӕмӕй дзуттаг ӕмӕ грекъаг ӕвзӕгтыл дзырд «чызг» чи нысан кӕны, уыцы дзырдтӕй пайда кодтой ахӕсгӕ хуызы дӕр, ӕмӕ-иу сылгоймагмӕ афтӕ чи сдзырдта, уый-иу равдыста, хорз зӕрдӕ йӕм кӕй дары. Йесойы фӕндыд сылгоймаджы ноджы тынгдӕр ӕрсабыр кӕнын ӕмӕ йын загъта: «Дӕ уырнындзинад дӕ фервӕзын кодта. Фарнимӕ цу. Дӕ удхайраг низӕй макуыуал схъӕрз» (Мар. 5:34).

«Мӕ чызг». Афтӕ загъта хъӕздыг израилаг Вооз моавитаг Руфӕн. Руф дӕр, ӕвӕццӕгӕн, тарст, уымӕн ӕмӕ хъӕбӕрхоры ӕфсиртӕ ӕмбырд кодта ӕнӕзонгӕ адӕймаджы быдыры. Вооз ын загъта: «Хъусыс, мӕ чызг». Стӕй йын загъта, цӕмӕй-иу йӕ быдыры ӕфсиртӕ ӕмбырд кодтаид. Руф Воозы раз йӕ зонгуытыл ӕрхауд ӕмӕ йӕ бафарста, ӕндӕрбӕстаг куы дӕн, уӕд мӕм афтӕ хӕларзӕрдӕ цӕмӕн дӕ, зӕгъгӕ. Вооз ын цы дзуапп радта, уымӕй дзы фылдӕр ныфс бауагъта: «Де ’фсинӕн [идӕдз ус Ноеминӕн] цы хӕрзты бацыдтӕ, уыдӕттӕ мын иууылдӕр радзырдтой... Йегъовӕ дын раарфӕ кӕнӕд, афтӕ кӕй бакодтай, уый тыххӕй» (Руф 2:8–12).

Йесо ӕмӕ Вооз хистӕр нӕлгоймӕгтӕн фӕзминаг сты. Иуӕй-иу хатт дыууӕ хистӕр нӕлгоймаджы бахъӕуы чырыстон хойӕн Фыстады фӕрцы баххуыс кӕнын ӕмӕ йӕ бафидар кӕнын. Хистӕр нӕлгоймӕгтӕ Йегъовӕмӕ разамынды тыххӕй куы скувой ӕмӕ стӕй хомӕ лӕмбынӕг куы байхъусой, уӕд ын сӕ бон уыдзӕн баххуыс кӕнын, Хуыцауы Ныхас цы удӕнцой дӕтты, уый ссарынӕн (Ром. 15:4).