Yɛdi mɔɔ Baebolo ne ka ye wɔ agyalɛ nee ewolebɔlɛ nwo la azo. Nyamenle hyehyɛle agyalɛ kɛ ɔyɛ raalɛ nee nrenyia avinli ngyehyɛleɛ mɔɔ bɛmpɛ nu ɛlɛ. Nla nu ɛbɛlatane ala a Baebolo ne maa adenle kɛ awie kola gyinla zo bɔ ewole a.​—Mateyu 19:5, 6, 9.

 Ɛhɛe, yɛdua ndenle dɔɔnwo azo yɛboa:

•   Mbuluku. Bɛta bɛka edwɛkɛ mɔɔ kola maa agyalɛ gyinla, bɔbɔ mɔɔ asɛɛ ɛzɛkye bɔkɔɔ la anwo edwɛkɛ wɔ yɛ mbuluku ne mɔ anu. Kɛ neazo la, nea edwɛkɛ mɔɔ se, “Maintaining Commitment in Your Marriage,” “How to Forgive,” yɛɛ “Rebuilding Trust in a Marriage.”

•   Ayia. Yɛsuzu Baebolo nu folɛdulɛ kpalɛ mɔɔ fale agyalɛ nwo la anwo wɔ yɛ ayia ne mɔ nee yɛ nyianu ne mɔ abo.

•   Mgbanyima. Asafo nu mgbanyima fa moalɛ maa agyalɛma, bɛtwe bɛ adwenle bɛsie ngɛlɛlera le kɛ Ɛfɛsɛsema 5:22-25 la azo.

 Kyɛkyɛ. Saa bɛka bɛkile asafo nu mgbanyima kɛ bɛboa agyalɛma mɔɔ ɛlɛyia ngyegyelɛ la a, bɛmmaa bɛ adenle kɛ bɛhile agyalɛma ne mɔɔ ɔwɔ kɛ bɛyɛ la. (Galeehyeama 6:5) Noko akee, awie mɔɔ bɔ ɔ hu anzɛɛ ɔ ye ewole wɔ adenle mɔɔ Baebolo ne ɛnlie ɛndo nu azo la ɛnrɛhola ɛnrɛgya bieko.​—1 Timote 3:1, 5, 12.

 Baebolo ne maa agyalɛma anwosesebɛ kɛ bɛbɔ nu bɛdɛnla bɔbɔ wɔ mekɛ ɛtane nu. (1 Kɔlentema 7:10-16) Saa agyalɛma yɛ asɔne ɛsesebɛ, bɛfa Baebolo ngyinlazo bɛyɛ gyima na bɛda ɛlɔlɛ ali a bɛbahola bɛali ngyegyelɛ dɔɔnwo anwo gyima.​—1 Kɔlentema 13:4-8; Galeehyeama 5:22.

 Noko, wɔ tɛnlabelɛ mɔɔ anu yɛ se le kɛ mɔɔ doɔdoa zo la anu, Kilisienema bie mɔ ɛzi kpɔkɛ kɛ bɛbahwe bɛ nwo bɛavi bɛ hu anzɛɛ bɛ ye anwo:

•   Saa awie tu ɔ gye kɛ ɔnrɛnlea ye abusua ne a.​—1 Timote 5:8.

•   Saa bɛ nuhua ko fa ɔ gɔnwo ngoane to esiane nu a.​—Edwɛndolɛ 11:5.

•   Saa bɛ nuhua ko maa ɔyɛ se kɛ ɔ gɔnwo bazonle Nyamenle a. Kɛ neazo la, agyalɛma ne anu ko bahola abɔ mɔdenle kɛ ɔmaa mɔɔ le Dasevolɛ ne la abulu Nyamenle mɛla zo wɔ adenle bie azo. Ɔti, kunli anzɛɛ yelɛ ne mɔɔ bɛlɛgyegye ye la bahola abɔ kpɔkɛ kɛ ɔtete agyalɛ ne anu amaa ‘yeadie Nyamenle kɛ tumivolɛ yeadɛla sonla.’​—Gyima ne 5:29.