Wulu kɔ nuhua edwɛkɛ ne azo

Wulu kɔ nuninyɛne ne azo

 Foa 1

Tie Nyamenle Amaa Wɔ Agyalɛ Ayɛ Anyelielɛ

Tie Nyamenle Amaa Wɔ Agyalɛ Ayɛ Anyelielɛ

“Mɔlebɛbo ne Nyamenle bɔle bɛ nrenya nee raalɛ.”Mateyu 19:4

Gyihova * a hyehyɛle agyalɛ mɔɔ lumua a. Baebolo ne ka kɛ ɔbɔle raalɛ mɔɔ lumua la na “ɔvale ye ɔrɛlɛle nrenya ne.” Adam anye liele na ɔhanle kɛ: “Ɛhye le me mbowule nu bowule, ɔle me nwonane nu nwonane.” (Mɔlebɛbo 2:22, 23) Gyihova kpondɛ kɛ agyalɛma anye die.

Saa ɛgya a, bie a ɛbadwenle kɛ ɛnrɛyia ngyegyelɛ ɛlɛ. Noko, nɔhalɛ ne a le kɛ kunli nee yelɛ mɔɔ bɛkulo bɛ nwo kpalɛ bɔbɔ la bayia ngyegyelɛ bie mɔ. (1 Kɔlentema 7:28) Wɔ buluku ɛhye anu, ɛbanwu Baebolo ngyinlazo mɔɔ saa ɛfa ɛdi gyima a, ɔbamaa wɔ agyalɛ nee wɔ abusua ayɛ anyelielɛ la.Edwɛndolɛ 19:8-11.

 1 YƐ GYIMA MƆƆ GYIHOVA ƐVA ƐMAA WƆ LA

MƆƆ BAEBOLO NE KA LA: Kunli ne a le abusua ne ati a.Ɛfɛsɛsema 5:23.

Saa ɛle kunli a, Gyihova kpondɛ kɛ ɛkulo ɛ ye na ɛdwenle ɔ nwo. (1 Pita 3:7) Ɔbɔle ɛ ye kɛ wɔ bokavolɛ na ɔkulo kɛ ɛdi ye eni na ɛkulo ye. (Mɔlebɛbo 2:18) Saa ɛkulo ɛ ye kpalɛ a, ɛbava ye ngyianlɛ wɔalumua wɔ ɛdeɛ ne anyunlu.Ɛfɛsɛsema 5:25-29.

Saa ɛle yelɛ a, Gyihova kpondɛ kɛ ɛdi ɛ hu eni na ɛboa ye ɛmaa ɔyɛ ye gyima ne. (1 Kɔlentema 11:3; Ɛfɛsɛsema 5:33) Saa ɔsi kpɔkɛ a, die to nu na boa ye. (Kɔlɔsaema 3:18) Saa ɛyɛ ye zɔ a, ɛ hu nee Gyihova anye balie ɛ nwo kpalɛ.1 Pita 3:1-6.

DUZU A ƐBAHOLA WƆAYƐ A?:

  • Biza wɔ bokavolɛ ne kɛ, ‘Duzu a meyɛ a ɔbamaa meayɛ kunli anzɛɛ yelɛ kpalɛ a?’ Tie mualɛ ne kpalɛ na yɛ nzenzaleɛ mɔɔ fɛta la

  • Si abotane. Ɔbalie mekɛ na wɔanwu mɔɔ ɛyɛ a wɔ bokavolɛ ne anye balie nwo la

2 DWENLE WƆ BOKAVOLƐ NE NGANEƐDELƐ NWO

MƆƆ BAEBOLO NE KA LA: Bɔ mɔdenle kɛ ɛbanwu mɔɔ wɔ bokavolɛ ne anye die nwolɛ la. (Felepaema 2:3, 4) Kile kɛ wɔ bokavolɛ ne sonle bolɛ maa wɔ, na kakye kɛ Gyihova kpondɛ kɛ ye azonvolɛ ‘yɛ atiakunlukɛnlɛma maa awie biala.’ (2 Temɔte 2:24) “Sonla ne bie anloa edwɛkɛ wowɔ kɛ dadeɛ, na nrɛlɛbɛvolɛ edwɛkɛ le ayile.” Yemɔti dwenle na wɔadendɛ. (Mrɛlɛbulɛ 12:18) Gyihova sunsum ne baboa wɔ yeamaa wɔavi atiakunlukɛnlɛma nee ɛlɔlɛ nu wɔadendɛ.Galeehyeama 5:22, 23; Kɔlɔsaema 4:6.

DUZU A ƐBAHOLA WƆAYƐ A?:

  • Kolaa na ɛ nee wɔ bokavolɛ ne azuzu edwɛkɛ mɔɔ anwo hyia anwo la, sɛlɛ Gyihova moalɛ amaa wɔahola wɔahomo ɛ nwo zo na wɔadie wɔ bokavolɛ ne

  • Dwenle mɔɔ ɛbaha nee kɛzi ɛbaha ye la anwo

 3 BƐMAA BƐ ADWENLE ƐYƐ KO

MƆƆ BAEBOLO NE KA LA: Saa ɛgya a, ɛ nee wɔ bokavolɛ ne bayɛ “sonla ko” anzɛɛ nwonane ko. (Mateyu 19:5) Noko ɛhye ɛngile kɛ bɛ adwenle bayɛ ko wɔ debie biala anwo. Ɔwɔ kɛ bɛsukoa kɛ bɛbamaa bɛ adwenle nee kɛzi bɛte nganeɛ wɔ ninyɛne nwo la ayɛ ko. (Felepaema 2:2) Ɔhyia kɛ bɛ adwenle yɛ ko wɔ kpɔkɛzilɛ nu. Baebolo ne ka kɛ: “Folɛdulɛ zo yɛɛ bɛdua bɛfa adwenle a.” (Mrɛlɛbulɛ 20:18) Fa Baebolo ngyinlazo di gyima wɔ mekɛ mɔɔ bɛ mu nwiɔ bɛlɛsi kpɔkɛ la.Mrɛlɛbulɛ 8:32, 33.

DUZU A ƐBAHOLA WƆAYƐ A?:

  • Saa ɛ nee wɔ bokavolɛ ɛlɛdi adwelie a anrɛɛ ka kɛzi ɛte nganeɛ la

  • Ɛ nee wɔ bokavolɛ ne ɛzuzu ninyɛne nwo kolaa na wɔazi kpɔkɛ

^ ɛden. 4 Nyamenle duma mɔɔ wɔ Baebolo ne anu la a le Gyihova.