Wulu kɔ nuhua edwɛkɛ ne azo

Boni A Baebolo Ne Ka Ye Wɔ Mogya Ɛlielɛ Nwo A?

Boni A Baebolo Ne Ka Ye Wɔ Mogya Ɛlielɛ Nwo A?

Baebolo ne bua kɛ

Baebolo ne se yɛmmadi mogya. Ɔti ɔnle kɛ yɛdie mogya anzɛɛ mogya nu ninyɛne titili nna ne biala yɛɛ ɔnle kɛ yɛdi. Yɛ ngɛlɛlera ne mɔ mɔɔ doa zo la nzonlɛ:

  • Mɔlebɛbo 9:4. Nyamenle maanle Nowa nee ye abusua ne adenle kɛ bɛli nane wɔ Azuyilɛ ne anzi noko ɔhanle kɛ bɛmmadi ye mogya ne. Nyamenle hanle hilele Nowa kɛ: “Debie ko ala a metua bɛ kɛ bɛmmadi a, yemɔ a le nane mɔɔ mogya ne tɛbɔ nu la.” Mɛla ɛhye wɔ ɛkɛ ne maa alesama kɔsɔɔti ɔluakɛ yɛ muala yɛle Nowa abozoamra.

  • Sɛlɛvolɛma 17:14. “Awie biala mmadi abɔdeɛ biala mogya. Ɔluakɛ nane biala ngoane a le ye mogya ne. Mɔɔ kɛli bie la bɛbaye ye bɛavi menli ne avinli.” Nyamenle bu ngoane ne mɔɔ wɔ mogya ne anu la kɛ ɔle ye ɛdeɛ. Ɔle nɔhalɛ kɛ bɛvale mɛla ɛhye bɛmaanle Yizilayɛma noko ɔmaa yɛnwu adwenle mɔɔ Nyamenle lɛ ye wɔ mogya nwo la.

  • Gyima ne 15:20. “Bɛhwe bɛ nwo bɛvi . . . mogya nwo.” Nyamenle ɛva mɛla ko ne ala mɔɔ ɔvale ɔmaanle Nowa la yemaa Kilisienema. Tetedwɛkɛ kile kɛ alimoa Kilisienema anli mogya yɛɛ bɛanva bɛanli gyima wɔ ayileyɛlɛ nu.

Nzɔne ati a Nyamenle se yɛhwe yɛ nwo yɛvi mogya nwo ɛ?

Ayileyɛlɛma kile kɛ esiane wɔ mogya mɔɔ bɛfa bɛmaa la anu. Mɔɔ hyia kpole la, Nyamenle se yɛhwe yɛ nwo yɛvi mogya nwo ɔluakɛ ɔle nwuanzanwuanza ɔmaa ye.​—Sɛlɛvolɛma 17:11; Kɔlɔsaema 1:20.