Wulu kɔ nuhua edwɛkɛ ne azo

Duzu Ati A Bɛnlie Mogya A?

Duzu Ati A Bɛnlie Mogya A?

Adwenle mɔɔ ɛndenrɛ

 Adalɛ edwɛkɛ: Gyihova Alasevolɛ ɛnlie ɛnli kɛ dɔketama bahola aboa bɛ yemɔti bɛnlie ayileyɛlɛ bɛndo nu.

 Nɔhalɛ edwɛkɛ: Yɛkpondɛ ayileyɛlɛ kpalɛ yɛmaa yɛ nwo nee yɛ mbusua. Saa yɛ nwo to yɛ a, yɛkpondɛ dɔketama mɔɔ bɔ mɔdenle na bɛnva mogya bɛnyɛ ayile la. Yɛ nye die anyuhɔlɛ mɔɔ bɛnyia ye wɔ ayileyɛlɛ nu la anwo. Nɔhalɛ ne a le kɛ, bɛyɛ nyile anzɛɛ apelehyɛne mɔɔ bɛnva mogya bɛmboka nwo la ngyehyɛleɛ ne kɛ bɛfa baboa Alasevolɛ noko menli gyɛne dɔɔnwo ɛnyia ɛhye azo nvasoɛ. Saa awie die mogya a, ɔkola ɔnyia mogya nu ewule, bie a mogya ne nee ye ɛdeɛ ne ɛnrɛyɛ ko, yɛɛ bɛkola bɛfo wɔ mogya ɛmanlɛ ne anu. Noko wɔ maanle dɔɔnwo anu menli kola si kpɔkɛ mɔɔ bamaa bɛahoati esiane ɛhye mɔ a.

 Adalɛ edwɛkɛ: Gyihova Alasevolɛ suzu kɛ awie diedi bahola ayɛ ye ayile.

 Nɔhalɛ edwɛkɛ: Yɛnlie ayileyɛlɛ zɛhae yɛnli.

 Adalɛ edwɛkɛ: Menli mɔɔ ɛnlie mogya la ayileyɛlɛ bolɛ yɛ se.

 Nɔhalɛ edwɛkɛ: Ayileyɛlɛ mɔɔ bɛnva mogya bɛnli gyima la bolɛ ɛnyɛ se. *

 Adalɛ edwɛkɛ: Alasevolɛ dɔɔnwo mɔɔ ngakula boka nwo la wu ɛvolɛ biala ɔluakɛ bɛnlie mogya la ati.

 Nɔhalɛ edwɛkɛ: Edwɛkɛ ɛhye ɛnlɛ ngyinlazo biala. Dɔketama yɛ apelehyɛne mɔɔ yɛ ɛzulolɛ wɔ awie mɔ ahonle nee bɛ mbowule nu, na bɛkakyi bie mɔ sonlabaka ne nvɛyeba ne mɔ mɔɔ bɛnva mogya bɛnli gyima a. * Wuleravolɛma mɔɔ ngakula boka nwo mɔɔ bɛnlie mogya la ta te kpɔkɛ ndɛndɛ tɛla bɛdabɛ mɔɔ bɛdie mogya la. * Edwɛkɛ ne a le kɛ, awie biala ɛnrɛhola ɛnrɛzi ye pi kɛ wuleravolɛ bie bawu ɔluakɛ yeanlie mogya la ati anzɛɛ ɔbade kpɔkɛ ɔluakɛ yelie mogya la ati.

Duzu ati a Gyihova Alasevolɛ ɛnlie mogya a?

 Ɛhye le ɛzonlenlɛ nu edwɛkɛ. Ngyekyeleɛ Dɛba ne nee Fofolɛ ne ka kɛ yɛhwe yɛ nwo yɛvi mogya nwo. (Mɔlebɛbo 9:4; Sɛlɛvolɛma 17:10; Mɛla ne 12:23; Gyima ne 15:28, 29) Bieko, Nyamenle bu mogya kɛ ɔle ngoane. (Sɛlɛvolɛma 17:14) Yemɔti yɛnlie mogya ɔluakɛ yɛkulo kɛ yɛtie Nyamenle yɛɛ eza yɛbu Nyamenle kɛ ɔle yɛ ngoane Maavolɛ.

Menli ɛlɛkakyi bɛ adwenle

Bɛkola bɛyɛ apelehyɛne mɔɔ anu yɛ se kpalɛ la mɔɔ bɛmmaa wuleravolɛ ne mogya a

 Mekɛ bie mɔɔ ɛze ɛhɔ la, ɛnee menli mɔɔ yɛ ayile la te nganeɛ kɛ saa awie ka kɛ ɔnrɛlie mogya a ɛnee ɔkulo kɛ ɔku ɔ nwo, ɔluakɛ nwolɛ edwɛkɛ ɛnla aze. Noko kenlensa ye bɛlɛkakyi bɛ adwenle. Kɛ neazo la, wɔ 2004 ne anu, edwɛkɛ bie mɔɔ bɛhɛlɛle ye wɔ ayileyɛlɛ nwo adwelie buluku bie anu la hanle kɛ “kenlebie, ayileyɛlɛ ngyehyɛleɛ mɔɔ bɛyɛ bɛmaa Gyihova Alasevolɛ wuleravolɛma la a barayɛ adenle kpalɛ mɔɔ bɛdua zo bɛyɛ ayile a.” * Edwɛkɛ bie mɔɔ rale Heart, Lung and Circulation adwelie buluku nu wɔ 2010 la hanle kɛ “tɛ [Gyihova Alasevolɛ] angomekye a ɔwɔ kɛ bɛyɛ bɛ ayile mɔɔ ‘bɛnva mogya bɛnli gyima a,’ ɔwɔ kɛ bɛfa ayileyɛlɛ adenle ɛhye bɛdi gyima alehyenlɛ biala.”

 Dɔketama apenle dɔɔnwo mɔɔ wɔ ewiade amuala la dua adenle mɔɔ ɔmmaa mogya dɔɔnwo ɛndu wuleravolɛ ne la azo yɛ apelehyɛne mɔɔ anu yɛ se kpalɛ mɔɔ bɛnva mogya bɛnli gyima a. Bɛfa adenle ɛhye bɛdi gyima bɔbɔ wɔ maanle mɔɔ bɛnlɛ ezukoa dɔɔnwo la anu na wuleravolɛma dɔɔnwo mɔɔ bɛnle Gyihova Alasevolɛ la ka kɛ bɛkulo ayileyɛlɛ mɔɔ bɛnva mogya bɛnli gyima la.

^ ɛden. 6 Nea Transfusion and Apheresis Science, Volume 33, No. 3, m. 349.

^ ɛden. 8 Nea The Journal of Thoracic and Cardiovascular Surgery, Volume 134, No. 2, m. 287-288; Texas Heart Institute Journal, Volume 38, No. 5, m. 563; Basics of Blood Management, m. 2; yɛɛ Continuing Education in Anaesthesia, Critical Care & Pain, Volume 4, No. 2, m. 39.

^ ɛden. 8 Nea The Journal of Thoracic and Cardiovascular Surgery, Volume 89, No. 6, m. 918; and Heart, Lung and Circulation, Volume 19, m. 658.

^ ɛden. 10 Continuing Education in Anaesthesia, Critical Care & Pain, Volume 4, No. 2, mukelɛ 39.