Baibuli Neehindura Emitwarize Y’abantu

Niki ekyahweraire omweshongozi owaabaire atarikwehitsya bandi kwega kukunda abantu n’okufayo kuhwera abandi? Niki ekyahweraire omushaija omuri Mexico kureka entwaza y’obuhwanshoni? Ahabw’enki omwe aha bavugi b’egaari abarikukirayo omuri Japan yaatsigireho empaka ezo kuheereza Ruhanga? Yetegyereze eki abantu aba barikugamba.

“Nkaba ningamba kubi, nyine ebihagi, kandi nyine ebihagi.”​—DENNIS O’BEIRNE

OMWAKA OBU NAAZAARWA: 1958

EIHANGA RY’OBUZAARWA: ENGLAND

EBY’ENYIMA: OMWESHONGOZI OTARIKWEHITSYA BANDI

EBI NAARABIREMU: Aha rubaju orwa tata, n’Abanyakaturiki ba Iriland. Nkaba ninkira kuza aha Kelezia nyenka, n’obu ndaabe naabaire ntarikukunda kuzayo. Kwonka nabwo, nkaba nyine eiriho ry’eby’omwoyo. Nkaba ninkira kushaba ndikukoresa okushaba kwa Mukama waitu, kandi niinyijuka mbyami omu kitanda ndikuteekateeka aha makuru gaayo. Nkaba nteekateeka aha buri kicweka kyayo ndikwenda kumanya amakuru ga buri kicweka.

Omu myaka yangye y’obushogoyo, nkazaho omu kigombe ky’Abarasita. Nkaza n’omu bigombe by’obutegyeki nk’ekyabaire nikihakanisa Abanazi. Kwonka nkahindukira kimwe endeme omweshongozi otarikufayo aha bantu. Nkaba ninkoresa emibazi y’ekitabura bwongo, na munonga enjaayi, ei naabaire nindeetsa haihi buri izooba. Kubaasa kugira emiteekateekyere y’okutafayo aha bandi, nkaba niinywa amaarwa maingi, ntarikufayo aha magara gangye, kandi ntarikufayo aha bantu. Nkaba ntarikwehitsya bantu, ntarikukira kugamba n’omuntu weena okwihaho ekigaaniiro kyaba kiine amakuru. Nkaba niinyanga n’okutwerwa ebishushani. Ku ndikureeba enyima hati, nindeeba ngu nkaba nintwariza kubi abandi, ndi ekihanda, kandi nyine ebihagi. Ku ogire ngu nangwa omuntu ku yaabaire ampikaho mutwariza omu muringo gw’embabazi n’obufura.

Obu naabaire nyine emyaka nka 20, nkagira ekihika omuri Baibuli. Munywani wangye owaabaire naaguza emibazi y’ekitabura bwongo akatandika kushoma Baibuli ari omu kihome, kandi tukagaaniira munonga aha diini, ekanisa, n’ebikorwa bya Sitaane omu nsi. Nkagura Baibuli naatandika kugyeyegyesa ahabwangye. Nyowe na banywani bangye tukaba tushoma ebicweka bya Baibuli, reero twerundaana kugaaniira aha bi twayegamu, reero twemanyira eki turikuteekateeka ngu nikyo kihikire. Eki kikamara ameezi maingi.

Ebi ni bimwe aha bi twayetegyereize omu kushoma kwaitu kwa Baibuli: Ngu turi omu biro by’emperu eby’ensi egi; ngu Abakristaayo baine kubuurira amakuru marungi g’Obukama bwa Ruhanga; ngu tibaine kuba ab’ensi egi, otwariiremu eby’obutegyeki; kandi ngu Baibuli neeha obuhabuzi burungi aha micwe. Tukaba nitubaasa kureeba gye ngu Baibuli ehikire, kandi ngu hashemereire kuba hariho ediini ehikire. Kwonka shi n’eha? Tukateekateeka aha diini empango n’emigyenzo yaazo, n’okwejumba kwazo omu by’obutegyeki, kandi tukareeba ngu Yesu akaba atarikutwaza atyo. Tukaba nitumanya ngu Ruhanga akaba atarikubakoresa, n’ahabw’ekyo tukacwamu kusherura aha madiini amakye kureeba eki garikwegyesa.

Tukaba tubugana abarikuza omu diini ezo tubabuuza ebibuuzo. Tukaba nitumanya eki Baibuli erikugamba aha buri kibuuzo, n’ahab’ekyo tukaba tureeba yaaba baagarukamu kuhikaana n’Ekigambo kya Ruhanga. Bwanyima y’okugaaniira nabo, nkaba nshaba Ruhanga, ‘abantu abo baaba bari omu diini ehikire mpa ekihika ky’okugaruka kugaaniira nabo ogundi.’ Kwonka bwanyima y’okugaaniira nabo kumara ameezi, nabwo tindabaasize kubona abantu abarikugarukamu gye ebibuuzo kuruga omu Baibuli; nari kugira ekihika ky’okugaruka kugaaniira nabo.

Empereruka, nyowe na munywani wangye tukagwa aha Bajurizi ba Yehova. Tukababuuza ebibuuzo nibyo bimwe nka butoosha, kwonka bakagarukamu barikukoresa Baibuli. Ebi baagambire bikaba nibihikaana gye n’ebi naabaire naayegire. N’ahabw’ekyo tukagumizamu twabuuza ebibuuzo ebi twabaire tutatatungire eby’okugarukamu byabyo omu Baibuli, nk’eky’okureeberaho, emiteekateekyere ei Ruhanga aine aha kureetsa n’okukoresa emibazi y’ekitabura bwongo. Nabwo, bakagarukamu barikukoresa Ekigambo kya Ruhanga. Tukaikiriza kuza omu ruteerane aha Kyombeko ky’Obukama.

Okuza omu ruteerane kikaba kingumiire. Nkaba ntarikwenda kwehitsya abantu n’ahabw’ekyo nkaba ntarikwenda kuhikwa abantu kunyenwanisa, kandi obwo bajwaire gye. Nkaba ninteekateeka ngu abamwe baine ebigyendererwa bibi, n’ahabw’ekyo nkaba ntakyenda kugaruka omu nteerane zaabo. Kwonka nka butoosha, nkashaba Ruhanga kugaruka kugaaniira n’abantu aba, n’okuhamya yaaba nibajwekyere ediini ehikire. Aha muheru, nkagira ekyetengo ky’amaani eky’okwega Baibuli n’Abajurizi ba Yehova.

OKU BAIBULI YAAHINDWIRE EMITWARIZE YANGYE: Nkaba niimanya ngu ngu nyine kurekyera aho kukoresa emibazi, kandi ekyo nkakikora ahonaaho. Ekyangumiire kukaba kuri okucwa tsigara. Nkateeraho emirundi mingi kurekyera aho okureetsa naaremwa. Ku naahuriire ngu hariho abarekyeire aho kureetsa, nkagambira Yehova aha nshonga egi. Bwanyima, ndikuhwerwa Yehova, nkarugaho naacwa okureetsa. Nkaba nyine kwega kugamba amazima, kandi ntarikushereka Yehova kurabira omu kushaba.

Empinduka mpango endiijo ei naakozire kukaba kuri okuhindura emijwarire yangye n’endeebeka yangye. Oruteerane rwangye rw’okubanza aha Kyombeko ky’Obukama nkaba nyine eishokye eririmu erangi za nyamunyonyi. Bwanyima, nkarihuuga kicungwa. Nkaba ninjwara giini n’ebikooti biriho ebigambo. Nkareeba ngu nikyetengyesa kuhindura, n’obu Abajurizi ba Yehova baagaaniire nanye gye aha nshonga egi. Empereruka, nkateekateeka ahari 1 Yohaana 2:15-17: “Mutarikunda ensi n’obu byakuba ebintu ebigirimu. Omuntu weena ku akunda ensi, okukunda Isheboona kuba kutamurimu.” Nkeetegyereza ngu kurugiirira aha mireebekyere yangye, nkaba ninkunda ensi egi, kandi ngu kubaasa kworeka ngu ninkunda Ruhanga wangye, nyine kuhinduraho. Kandi eki nkakikora.

Bwanyima, nketegyereza ngu ti Bajurizi ba Yehova abarikwenda ngu nze omu nteerane z’Ekikristaayo. Abaheburaayo 10:24, 25 hakanyoreka ngu Ruhanga niwe arikwenda ngu nkikore. Bwanyima y’okutandika kuza omu nteerane zoona kandi nkatandika kumanya abantu, nkacwamu kworeka muranga ndikwehayo ahari Yehova kandi nkabatizibwa.

OKU NGASIIRWE: Ninkwatwaho munonga oku Yehova arikutwikiriza kugira omukago murungi nawe. Embabazi ze n’okufayo kwe kumpigire kumutooreza n’okukuratira Omwana we Yesu Kriso, nk’eky’okureeberaho kyangye. (1 Petero 2:21) Nyegire ngu omu kuteeraho kugira emitwarize y’Ekikristaayo, nabwo nimbaasa kugira entwaza eyangye. Nyegire kugirira abandi rukundo n’okubafaho. Ninteeraho kuba nka Kristo omu muringo ogu ndikutwarizamu omukazi wangye na mutabani waitu. Kandi ninfayo munonga aha b’eishe-emwe na banyaanyazi omu mazima. Okukuratira Kristo kindeeteire kuba ow’ekitiinisa, kweha ekitiinisa, n’okugira okubaasa kw’okugirira abandi rukundo.

“Bakaantwariza omu Muringo gw’Ekitiinisa.”​—GUADALUPE VILLARREAL

OMWAKA OBU NAAZAARWA: 1964

EIHANGA RY’OBUZAARWA: MEXICO

EBY’ENYIMA: ENTWAZA Y’OBUHWANSHONI

EBI NAARABIREMU: Nkaba ndi omwe aha baana mushanju, nkakurira omuri Hermosillo, omu Sonora, Mexico, ekicweka ky’obworo. Taata akafa nkiri muto, n’ahabw’ekyo maawe akaba aine kukora munonga kutureeberera. Nkaba ngyenda ntajwaire enkaito ahakuba tukaba tutaine sente z’okuzigura. Nkiri muto nkatandika kukora kugira ngu mpwere maawe aha nshohoza y’eka. Nk’amaka agandi, enju yaitu ekaba efuunzire.

Maama akaba atasiiba naitwe kuturinda. Aha myaka 6, nkatoorobozibwa ow’emyaka 15. Eki kikagumizamu kumara akaire. Kandi ekyarugiremu, nkaba ntarikumanya ekihikire ekirikukwata aha by’okuteerana. Nkateekateeka ngu ti kibi okurigira abashaija. Ku naashabire abashaho n’abanyadiini obuhwezi, bakampamiza ngu tinyine nshonga yoona, kandi ngu enyehurira ezi naabaire nyine neeza butoosha.

Aha myaka 14, nkacwamu kuhinduka ekitingwa kandi nkaguma ndi ntyo kumara emyaka 11, ndikutuura n’abashaija batari bamwe na bamwe. Bwanyima, nkashoma omwoga gw’okukora eishokye kandi naatandika kutega eishokye. Kwonka, nkaba ntashemereirwe. Nkaba nyine okubonabona n’okuhemuka. Nketegyereza ngu eki naabaire ninkora kikaba kitahikire. Nkatandika kwebuuza nti: ‘Hariho abantu barungi ab’omugasho?’

Nkateekateeka ahari munyaanyazi owaayegire Baibuli n’Abajurizi ba Yehova kandi akabatizibwa. Akaba angambira ebi yaayega, kwonka nkaba ntabitaho omutima. Kwonka nabwo, nkaba nimwegomba ahabw’embeera ze n’eka ye. Nkaba nindeeba ngu we na iba nibakundana kandi nibahaana ekitiinisa. Bakaba nibatwarizana omu muringo gw’embabazi. Bwanyima omwe aha Bajurizi ba Yehova akatandika kunyegyesa Baibuli. Aha kutandika nkaba ninfa kwega​, ntaine mujinya. Kwonka bwanyima ebintu bikahinduka.

OKU BAIBULI YAAHINDWIRE EMITWARIZE YANGYE: Abajurizi ba Yehova baakanyeta omu nteerane zaabo, kandi naazayo. Buri kimwe kikaba kiri kisya ahariinye. Abantu abandi bakaba nibanshekyerera kwonka Abajurizi ba Yehova bo tikwo baantwariize. Bakandamutsya, kandi bakaantwariza omu muringo gw’ekitiinisa. Eki kikankwataho.

Okuba aha ruteerane oruhango kikampwera kwongyera kutwaza gye. Nkareeba ngu bakaba bari hamwe nibatwarizana nk’eishe-emwe n’ab’amazima kandi n’abeesigwa. Nkeebuuza yaaba aba nibo bantu abarungi kandi ab’omugasho abu naabaire ntwire ninsherura. Rukundo yaabo n’obumwe bwabo bikatangaaza, otwariiremu n’omuringo ogu baabaire nibakoresamu Baibuli kugarukamu buri kibuuzo. Nkareeba ngu Baibuli niyo yaabaire neebareetera kugira amagara marungi. Kandi naanye nkaba nyine kukora empinduka nyingi kubaasa kuba nkabo.

Nkaba nyine kuhindukira kimwe, ahakuba nkaba ndi nk’omukazi. Nkaba nyine kuhindura, emigambire yangye, entwaza yangye, emijwarire yangye, eishokye ryangye, na banywani bangye. Abaabaire bari banywani bangye bakatandika kunshungisa, barikugira bati: “Ahabw’enki nookora eki? Obaire ori omu mbeera nungi. Rekyera aho kwega Baibuli. Oine buri kimwe.” Kwonka ekyabaire kigumire kuhindura n’ebikorwa byangye by’obuhwanshoni.

Kwonka nabwo nkaba niimanya ngu empinduka ezo nizibaasika, ahakuba ebigambo ebiri omu 1 Abakorinso 6:9-11 bikaba byampikire aha mutima: “Timurikumanya ngu abatahikiriire tibarihungura bukama bwa Ruhanga? Mutaribeihwa, abashambani, nari abarikuramya ebishushani, nari abeegira abakazi, nari ebitingwa. . . tibarihungura bukama bwa Ruhanga. Kandi bamwe omuriimwe mukaba muri nka bo, kwonka mukoogibwa, mwayezibwa.” Yehova akahwera abantu omu bwire obwo kukora empinduka, kandi naanye akampwera. Kikatwara emyaka mingi n’okuteeraho kw’amaani, kwonka obuhwezi na rukundo y’Ab’eishe-emwe bikampwera munonga.

OKU NGASIIRWE: Hati, nyine amagara marungi. Ndi omu bushwere, kandi nyowe n’omukazi wangye nitwegyesa mutabani waitu kuhamira aha misingye ya Baibuli. Nkareka emitwarize yangye eya ira, kandi hati nyine emigisha mingi y’eby’omwoyo. Nimpereza nk’omureeberezi omu kibiina, kandi mbaasize kuhwera abandi kwega amazima agari omu Kigambo kya Ruhanga. Empinduka ezi naakozire zikashemeza maawe kandi nawe akatandika kwega Baibuli, hati n’Omukristaayo obatiziibwe. Murumuna wangye nawe owaabaire naayejumba omu bikorwa by’obuhwanshoni akahinduka omwe aha Bajurizi ba Yehova.

Nangwa n’abantu abaabaire nibammanya ira ku barikundeeba nibeetegyereza ngu mpindukire omu mitwarize yangye. Kandi niimanya ekimpweraire kuzikora. Obuhabuzi obu naashabira abahangu ira tiburaangasiire. kwonka, Yehova akampwera. N’obu ndaabe naabaire niinyereeba nk’otaine mugasho, akanfaho yaagumisiririza kandi yaantwariza omu muringo gwa rukundo. Ahabw’okugira Ruhanga nk’ogwo orikushemeza, ow’obwengye kandi owa rukundo akaba naanfaho, kandi arikwenda ngu ngire amagara marungi kikankwataho munonga.

“Nkaba ntamazirwe, nyine eihamba, kandi ntaine mugasho.”​—KAZUHIRO KUNIMOCHI

OMWAKA OBU NAAZAARWA: 1951

EIHANGA RY’OBUZAARWA: JAPAN

EBY’ENYIMA: OMUVUGI W’EMPAKA Z’EGAARI ORIKUHAYAHAYANA

EBI NAARABIREMU: Nkakurira omu tauni y’aha mwaro eya Shizuoka omuri Japan, omu ka y’abantu munaana omu kaju kakye. Tata akaba aine eduuka y’egaari. Kuruga obu naabaire ndi omwereere, akaba naantwara omu mpaka z’egaari, kandi nkaija naakunda omuzaano ogu. Tata akatandika kuntebeekanisa kugira ngu mbe omuvugi w’egaari rurangaanwa. Obu naabaire nkiri omu bibiina by’ahansi omu ishomero, nkatandika kutendwa munonga. Omu siniya nkasinga ebikopo bishatu bikurataine omu mpaka eza buri mwaka. Nkaheebwa omugisha gw’okuza aha yunivasite, kwonka nkacwamu kuza omu ishomero ry’okutendeka okuvuga egaari. Aha myaka 19, nkaba omuvugi waazo rurangaanwa.

Obwire obwo, nkaba nyine ekigyendererwa kuba omuvugi orikukirayo omuri Japan. Nkataho entebeekani y’okukora esente nyingi, kugira ngu mpwere eka yangye kutuura omu mbeera nungi. Nkatamu amaani maingi omu kutendekwa. Ku naabaire mba ndi omu kutendekwa kugumire nari empaka zigumire, nkaba nyehamiza ngu nkazaarwa kuvuga empaka z’egaari, n’ahabw’ekyo nyine kugumizamu! Kandi nkaba ngumizamu. Nkatandika kureeba ebirungi ebirikuruga omu kukora kwangye n’amaani. Omu mwaka gwangye gw’okubanza, nkasinga empaka z’abeega. Omu gwa kabiri, nkeetwa kuza omu mpaka z’okutoorana orikukirayo omu kuvuga omuri Jaban. Emirundi mukaaga nkaba nyizira omu mwanya gwa kabiri.

Ahabw’okuguma omu mwanya gw’ahaiguru, bakankubya ow’amaguru gagumire owa Tokai, ekicweka kimwe omuri Japan. Nkaba nimpayahayana munonga. Bwanyima y’obwire, nkaba niintiimwa ahabw’okutasaasira munonga weena omu mpaka ezi. Entaatsya yangye ekeeyongyera, kandi nkaba nimbaasa kugura kyona ekyanshemeza. Nkagura enju erimu eitendekyero eririmu buri kyoma kyona ekirungi. Nkagura emotoka erikugura esente ezirikwenda kwingana n’ezi naaguzire enju. Kubaasa kwebiikira ahabwa nyentsya, nkatandika kuta esente zangye omu bintu n’obutare bw’okushuubura esente.

Kwonka nabwo, nkaba nimpurira ntamazirwe, nyine eihamba, ntaine mugasho. Omu bwire obwo, nkaba ndi omu bushwere nyine n’abaana, kwonka butoosha nkaba ntarikugumisiririza ab’eka yangye. Nkaba ngirira omukazi wangye n’abaana ekiniga aha tushonga tukye. Bakatandika kunyega kureeba yaaba naahinduka aha maisho n’embeera zangye zaahinduka.

Kwonka bwanyima y’obwire, omukazi wangye Abajurizi ba Yehova bakatandika kumwegyesa Baibuli. Eki kikamureetera kuhinduka. Akagira ngu naayenda kuza omu nteerane z’Abajurizi ba Yehova, reero naacwamu ngu nituza kugyenda nk’eka. Niinkijuka obu omureeberezi omwe yaija omuka reero akatandika kunyegyesa Baibuli. Ebi naayegire bikanshemeza munonga.

OKU BAIBULI YAAHINDWIRE EMITWARIZE YANGYE: Tindikwija kwebwa oku okushoma Abaefeso 5:5 kyankwatsireho. Nihagira hati: “Tihariho mushambani n’obu yaakuba omwetengi, niwe oramya ebishushani, oriheebwa omugabo omu bukama bwa Kristo na Ruhanga.” Nkareeba ngu okuvuga empaka z’egaari nihatwariramu okuteera zaara n’omururu. Nkatandika kweshinja. Nkahurira ndikwenda kushemeza Yehova Ruhanga, nkaba niinyenda n’okurekyera aho okuvuga omu mpaka z’egaari. Kwonka eki kikaba kingumiire.

Nkaba mperize empaka z’okuvuga ez’amaani, kandi nkaba niinyenda kweyongyerayo omu zindi. Kwonka, nketegyereza ngu okwega Baibuli nikundeetera kwehurira gye n’okugira ebiteekateeko by’obusingye, okutaanira kimwe n’emiteekateekyere eyaabaire neeyetengyesa kusinga omu mpaka z’egaari! Nkavuga emirundi eshatu kuruga omu naatandika kwega Baibuli, kwonka omutima gwangye nkaba ntakeecwaire aha mpaka z’egaari. Kandi nkaba ntaine na sente zirikumara ez’okureeberera eka yangye. Nkaba ntarikumanya eky’okukora, ntari kuza omu maisho nari kugaruka enyima, kandi abanyabuzaare bangye bakatandika kunjuma ahabw’enyikiriza yangye ensya. Tata akareeba ngu nkamureebya munonga. Ahabw’enaku egi, nkongyera kugira amaganya nangwa naarwara na arusaazi.

Ekyampweraire omu mbeera egumire n’okuguma ninyega Baibuli kandi ndikuza omu nteerane z’Abajurizi ba Yehova. Mporampora okwikiriza kwangye kukoongyera kuhama. Nkashaba Yehova kuhurira okushaba kwangye kandi ndeebe ngu naakikora. Amaganya gangye gakoongyera kutuuba obu omukazi wangye yaampamiza ngu tikirikumwetengyesa kutuura omu nju mpango kubaasa kushemererwa. Mporampora, nkatunguuka.

OKU NGASIIRWE: Nkeega ebigambo bya Yesu ebiri omuri Matayo 6:33 naahamya ngu bihikire. Akagira ati: “Mubanze musherure obukama bwe n’okuhikiirira kwe; n’ebyo byona muryabyongyerwaho.” Titukaburwaga ’ebyo byona’ ebi Yesu yaagambireho, ebirikwetengyesa munonga kubaisaho amagara. N’obu entaatsya yangye hati eraabe yaatuubireho ebicweka 30 aha ei naabaire ninye obu naabaire ndi omu mpaka z’egaari, tihaine eki mbuzirwe omu myaka 20 ehingwire.

Kwonka nabwo, ku ndikuramiza hamwe n’ab’eishe-emwe bagyenzi bangye, nintunga okushemererwa oku naabaire ntakatungahoga. Ebiro nibirahuka. Twongyeire kugira eka nungi. Batabani bangye n’abakazi baabo n’abaheereza ba Yehova abeesigwa.