1. Ha eky’okureeberaho kworeka ahabw’enki kiri kikuru kumanya eshaaha n’ekiriyo nikibaho. (Reeba ekishushani aha kutandika.)

ORUTEERANE oruhango rukaba ruri haihi kutandika. Ceyamaani akaza aha puratifoomu yaayakiira abantu boona abaabaire bariho. Obweshongoro bukaba buri haihi kutandika. Abahurikiize bakamanya ngu obwire bw’okushutama bwahika. Bakaba nibenda kuhurikiza obweshongoro burungi, kandi bakaba baine ekihika ky’okuhurira embazo ezirikuza kuheebwa. Kwonka obundi nooshanga hariho bamwe abaabaire bahugire batarikuhurikiza ceyamaani nari batarikumanya ngu obweshongoro bwatandika. N’ahabw’ekyo bakaba batarikumanya ngu oruteerane rwaza kutandika, kandi bakaba bakiriyo nibagyendagyenda nari nibakigamba na banywani baabo. Embeera egi neeyoreka ekirikubaasa kubaho twaba tutarikumanya eshaaha nari ekiriyo nikibaho. Eki nitukyegaho enshonga nkuru ahakuba juba haine ekintu kikuru ekirikuza kubaho, kandi tushemereire kukyetebeekanisiza. Ni kintu ki ekyo?

2. Ahabw’enki Yesu yaagambiire abeegi be ‘kuguma nibareeba’?

² Yesu Kristo arikugamba aha “bunaku obu ensi egi  erihweraho,” akahiga abeegi be ati: ‘Mwerinde, mugume nimureeba, ahakuba timurikumanya ahu obunaku obwo burihikira.’ Bwanyima y’ekyo, Yesu akaguma naabaijutsya ati: ‘Mugume nimureeba.’ (Mat. 24:3; shoma Mako 13:32-37.) Ebiri omuri Matayo ebirikugamba aha nshonga niyo emwe nabyo nibyoreka ngu Yesu akarabura abakuratsi be ati: ‘N’ahabw’ekyo mugume nimureeba, ahakuba timurikumanya bunaku obu mukama waanyu ariiziramu, ahabw’okuba obunaku obu mutarikuteekateeka, nibwo Omwana w’omuntu ariiziramu.’ Yaagaruka, yaagira ati: ‘Mugume nimureeba, ahabw’okuba, timurikumanya kiro n’obu yaakuba eshaaha.’​—Mat. 24:42-44; 25:13.

3. Ahabw’enki nitugyendera aha kurabura kwa Yesu?

³ Abajurizi ba Yehova, nitugyendera aha buhabuzi bwa Yesu. Nitumanya ngu turi omu bunaku “bw’aha mperu” kandi nihaburayo obwire bukye “okubonabona kwingi” kukatandika! (Dan. 12:4; Mat. 24:21) Nitureeba entaro, ebikorwa by’obushambani, okuhenda ebiragiro, okubuzabuza kw’amadiini, eibura ry’eby’okurya, endwara, n’emitsitsa omu nsi yoona. Nitumanya ngu omurimo gw’okubuurira aha Bukama nigukorwa Abajurizi ba Yehova omu nsi yoona. (Mat. 24:7, 11, 12, 14; Luk. 21:11) Hati tutegyereize okugaruka kwa Mukama waitu ekirikumanyisa okuhikiirira kw’ekigyendererwa kya Ruhanga.​—Mak. 13:26, 27.

4. (a) Ahabw’enki nitwikiriza ngu Yesu hati naamanya obu orutaro rwa Haramagedoni ruraabeho? (b) N’obu turaabe tutarikumanya obu okubonabona kwingi kuraatandikye, niki eki turikubaasa kugiraho obuhame?

⁴ Twaba turi omu ruteerane oruhango, nituba nitumanya obu buri kicweka kyarwo kiraatandikye. Kwonka, tikirikubaasika kumanya obwire bwenyine obu okubonabona kwingi kuraatandikye. Obu Yesu yaabaire ari omu nsi, akagira ati: “Kwonka eby’ekyo kiro n’obwo bunaku tihaine orikubimanya, n’obu baakuba baamaraika b’omu iguru, n’obu yaakuba Omwana, kureka Isheboona wenka.” (Mat. 24:36) Kwonka Kristo akaheebwa obushoboorozi omu iguru obw’okutenga orutaro rw’okurwanisa Sitaane n’ensi ye. (Kush. 19:11-16) N’ahabw’ekyo, kihikire kugira ngu Yesu naamanya obu orutaro rwa Haramagedoni ruraatandikye. Kwonka itwe, titurikumanya. Ni kikuru kuguma nitureeba kuhitsya obu okubonabona kwingi kuraatandikye. Kwonka, obwire obwo Yehova we naabumanya. Yaataireho obwire bwenyini obu emperu eraahikye. Naareeba ngu hatsigaireyo obwire bukye okubonabona kwingi kukatandika, kandi ‘tikuraakyerererwe!’ (Shoma Habakuuki 2:1-3.) Eki nitubaasa kukihamya tuta?

5. Ha eky’okureeberaho ekirikworeka ngu Yehova naahikiriza obunabi bwe omu bunaku obuhikire.

⁵ Obunabi bwa Yehova butwire nibuhikiirira omu bwire obuhikire! Nk’eky’okureeberaho, teekateeka obu yaacungura Abaisraeli kuruga Misri. Musa arikugamba aha Nisani 14, 1513 Y.A., akagira ati: ‘Aha kiro eki egyo myaka magana ana na makumi ashatu yaahikiireho, ahari ekyo kiro kyonka amahe goona aga Mukama gakaruga omuri Misri.’ (Kur. 12:40-42) Emyaka egyo “magana ana na makumi ashatu” ekatandika obu endagano ei Yehova yaakozire na Abrahamu yaahikiirira omu gwa 1943 Y.A. (Gal. 3:17, 18) Bwanyima, Yehova akagambira Abrahamu ati: “Omanyire kimwe ku oruzaaro rwawe rurishuhuukira omu nsi etari yaarwo, bakakorera ab’ensi egyo, nibaitwa kubi emyaka magana ana.” (Kut. 15:13; Byak. 7:6) Emyaka egyo “magana ana na makumi ashatu” ekatandika omu gwa 1913 Y.A. obu Ishimaeli yaajuma Isaaka  aha izooba eri Isaaka yaacuukiireho, kandi ekahwa obu Abaisraeli baaruga omu gwa 1513 Y.A. (Kut. 21:8-10; Gal. 4:22-29) Eego, harikuburayo ebyasha bina, Yehova akataho obwire obu yaabaire naija kucunguriraho abaheereza be!

6. Ahabw’enki nitubaasa kugira obuhame ngu Yehova naija kujuna abaheereza be?

⁶ Yoshua, owaabaire ari omwe ahari abo abaacungwirwe kuruga Misri, akaijutsya Abaisraeli boona ati: “Nimumanya gye omu mitima yaanyu n’omu magara gaanyu, ku hatariho kintu na kimwe ekirabuzire aha birungi byona ebi Mukama Ruhanga waanyu yaabaraganiise; byona bikabahikaho, tihariho kintu na kimwe ekitarabaireho.” (Yos. 23:2, 14) Nitubaasa kugira obuhame ngu ekiraganiso kya Yehova eky’okutucungura kuraba omu kubonabona kwingi nikiija kuhikiirira. Kwonka, twaba nitwenda kuhonokaho aha kucwekyerezibwa kw’ensi egi mbi, twine kuguma nitureeba.

7, 8. (a) Omu bwire bwa ira omurinzi akaba aine kukora ki, kandi ekyo nikitwegyesa ki? (b) Ha eky’okureeberaho ekirikworeka ekirikubaasa kuba kyabaireho ahabw’okugira ngu abarinzi bakagwejegyerera aha murimo.

⁷ Abaheereza ba Ruhanga aba ira nitubaasa kubeegyeraho obukuru bw’okuguma nitureeba. Omu bwire obwo, endembo nyingi empango nka Yerusaalemu zikaba zeetooroirwe engo ndaingwa. Engo ezo zikaba zirinda Abaisraeli kugira ngu abazigu baabo batabataahirira. Nyomushana na nyekiro, abarinzi bakaba baguma beemereire aha bisiika n’aha marembo. Omurimo gwabo gukaba guri okugambira abari omu rurembo akabi akari haihi kubaho. (Isa. 62:6) Abarinzi aba bakaba baine omurimo gw’okufa n’okukira ogw’okuguma barinzire, nibareeba, kandi beeteekateekire.​—Ezk. 33:6.

⁸ Omunyabyafaayo Omuyudaaya orikwetwa Josephus akagira ngu omu gwa 70 Y.A.K., amahe ga Rooma gakaba nigenda kwegarurira Omunaara gwa Antonia, ogwabaire guri haihi n’orurembo Yerusaalemu, ahabw’okugira ngu abarinzi bakaba bagwejegyeire! Kuruga aho, Abarooma bakaza omuri hekalu baagyotsya, baacwekyereza na Yerusaalemu yoona. Egyo niyo yaabaire muheru y’okubonabona kwingi okwahikire aha Bayudaaya.

9. Niki eki abantu baingi obunaku obu batarikumanya?

⁹ Gavumenti enyingi nizikoresa abarinzi kurinda ensharo z’amahanga gaabo barikukoresa emotoka ezirikuguma nizeetoorora, na zaakamera. Abarinzi abo nibaguma nibareeba abarikwenda kutaaha omu ihanga ryabo, n’abazigu abarikubaasa kuba ab’akabi aha by’okwerinda byabo. Kwonka, abarinzi abo nibabaasa kureeba akabi akarikureetwaho gavumenti z’abantu nari abantu benyini. Tibarikumanya eki Obukama bwa Ruhanga obw’omu iguru, gavumenti eri omu mikono ya Kristo n’oku erikwija kucwekyereza amahanga goona. (Isa. 9:6, 7; 56:10; Dan. 2:44) Kwonka, ahabw’okuguma nitureeba omu by’omwoyo, nitwija kuba tweteekateekire aha kiro ekyo eky’okucweraho orubanja.​—Zab. 130:6.

10, 11. (a) Twine kwegyendesereza ki, kandi ahabw’enki? (b) Niki ekirikukuhamiza ngu Omuregi ahabiise abantu kwehuzya obunabi bwa Baibuli?

¹⁰ Teekateeka aha murinzi oraire naareeba ekiro kyona. Kwonka bukiba buri haihi kusheesha, akaruha akagwejegyera. Nikyo kimwe, ku turikuguma nitwirira haihi n’emperu y’ensi egi mbi, okuguma nitureeba nikweyongyera kuguma. Ka nikibaasa kuba eky’akabi twaremwa kuguma nitureeba! Ka tushwijume ebintu bishatu  ebirikubaasa kuturemesa kuguma nitureeba twaba tutegyendesereize.

¹¹ Omuregi naahabisa abantu. Yesu ari haihi kufa, akarabura abeegi be emirundi eshatu aha ‘mutegyeki w’ensi egi.’ (Yoh. 12:31; 14:30; 16:11) Omuregi naakoresa amadiini g’ebishuba kubeihabeiha abantu. Niyo nshonga ahabw’enki abantu baingi obunaku obu nibanga obunabi bwa Baibuli oburikworeka ngu emperu eri haihi. (Zef. 1:14) Sitaane ahumize emitima y’abantu arikukoresa amadiini g’ebishuba. Oyetegyereize ki omu kugaaniira n’abandi? Mbwenu shi Omuregi ‘tahumize emitima y’abatarikwikiriza’ bakanga kwikiriza ngu emperu y’ensi egi mbi eri haihi, bakanga n’okumanya Kristo omutegyeki w’Obukama bwa Ruhanga? (2 Kor. 4:3-6) N’ekirikurugamu, ku turikuteeraho kugambira abantu ngu emperu y’ensi egi eri haihi kandi ngu Kristo hati ariyo naategyeka, baingi nibaba batarikwenda kutuhurikiza. Butoosha nibagira bati: “Tindikwenda kuhurira ebi murikugamba.”

12. Ahabw’enki tutashemereire kwikiriza Omuregi kutubeihabeiha?

¹² N’obu baingi baraabe batarikukunda obunabi bwa Baibuli, titushemereire kwikiriza emiteekateekyere yaabo kutumaramu amaani. Nitumanya ahabw’enki ni kikuru kuguma nitureeba. Paulo akahandiikira Abakristaayo bagyenzi be ati: “Imwe ahabwanyu nimumanya gye ngu ekiro kya Mukama kiryaija nk’omushuma wa nyekiro.” (Shoma 1 Abatesalonika 5:1-6.) Yesu akaturabura ati: “Mugume mweteekateekire; ahabw’okuba omu shaaha ei muteeteekateekyeiremu Omwana w’omuntu niyo ariiziramu.” (Luk. 12:39, 40) Omu bwire butari bwa hare, Sitaane naija kuhabisa abantu kuteekateeka ngu omu nsi harimu ‘obusingye tihariho kabi.’ Naija kubahabisa bateekateekye ngu buri kimwe kiri gye omu nsi. Kandi shi itwe? Twaba nitwenda kweteekateekyera ekiro ekyo kandi tutarikwenda kubeihwabeihwa nk’abantu abandi, hati twine ‘kuguma nitureeba, tutasinda.’ Niyo nshonga ahabw’enki twine kushoma Baibuli buri izooba kandi tukateekateeka aha bi Yehova arikutwegyesa.

13. Omwoyo gw’ensi nigukwata guta aha bantu, kandi nitubaasa kugwerinda tuta?

¹³ Omwoyo gw’ensi nigukwata aha ku abantu barikuteekateeka. Baingi nibateekateeka ngu tikirikwetengyesa kumanya  Ruhanga. (Mat. 5:3) Nibamara obwire n’amaani gaabo barikusherura eby’obutungi “ebi omubiri gwetenga, n’ebi amaisho geetenga.” (1 Yoh. 2:16) Eby’okweshemeza nabyo, bireetaire abantu kuba ‘abarikukunda kweshemeza,’ kandi okugyemeserezibwa nikweyongyera buri mwaka. (2 Tim. 3:4) Egi niyo nshonga ahabw’enki Paulo yaagambiire Abakristaayo ati: “Mutaha omubiri orwekwatso kukora ebi gurikwetenga,” ekirikubaasa kubagwejegyeza omu by’omwoyo.​—Rom. 13:11-14.

14. Ni kurabura ki okuri omu Luka 21:34, 35?

¹⁴ Omu mwanya gw’okwikiriza omwoyo gw’ensi, nitwikiriza omwoyo gwa Ruhanga ogu atuhaire kubaasa kwetegyereza ebintu ebiraabeho omu biro by’omumaisho. ^[1] (1 Kor. 2:12) Kwonka twine kwegyendesereza. Nangwa n’ebintu ebi turikureeba nk’ebya butoosha nibibaasa kuturemesa kuheereza Yehova. (Shoma Luka 21:34, 35.) Abamwe nibabaasa kutuhakanisa ahabw’okuguma nitureeba, kwonka egyo ti nshonga eshemereire kutureetera kuhwa maani. (2 Pet. 3:3-7) Omu mwanya gw’ekyo, butoosha twine kuguma nituba hamwe n’Abakristaayo bagyenzi baitu omu nteerane z’ekibiina, ahu omwoyo gwa Ruhanga gurikuba guri.

15. Niki ekyabaire ahari Petero, Yakobo, na Yohaana kandi ekyo nikibaasa kutubaho kita?

¹⁵ Obweremwa bwaitu nibubaasa kuturemesa kuguma nitureeba. Yesu akaba naamanya ngu abantu tibahikiriire kandi baine obweremwa bw’omubiri. Teekateeka aha kyabaireho omu kiro ekyahereerukireyo Yesu akaitwa. N’obu Yesu yaabaire ari ohikiriire, akaba naamanya ngu aine kushaba Ishe obuhwezi kubaasa kuguma ari omwesigwa. Obu Yesu yaabaire naashaba, akagambira Petero, Yakobo, na Yohaana ati: “Mugume nimureeba.” Kwonka, tibaramanyire obukuru bw’okuguma nibareeba. Omu mwanya gw’okuguma nibareeba hamwe na Mukama waabo, omubiri gwabo gukabaremesa baagwejegyera. N’obu Yesu nawe araabe yaabaire aruhire, akaguma naareeba arikushaba Ishe. Ekyo nikyo abeegi be baabaire baine kukora.​—Mak. 14:32-41.

16. Kurugiirira ahari Luka 21:36, Yesu akaba naamanyisa ki okugira ngu ‘tugume nitureeba’?

¹⁶ ‘Okuguma nitureeba’ omu by’omwoyo nikimanyisa ekirikukira aha kugira ebigyendererwa birungi. Omu musiri Gesesemaani harikuburayo ebiro bikye Yesu akaitwa, akagambira abeegi be kuguma nibashaba Yehova kubaha obuhwezi. (Shoma Luka 21:36.) N’ahabw’ekyo naitwe kubaasa kuguma nitureeba omu by’omwoyo, twine kuguma nitushaba.​—1 Pet. 4:7.

17. Nitubaasa kuhamya tuta ngu tweteekateekiire ebirikwenda kubaho omu biro by’omumaisho?

¹⁷ Obu Yesu yaagizire ngu emperu neija kwija omu ‘bunaku obu tutarikuteekateeka,’ obu tibwo bunaku bw’okugwejegyera omu by’omwoyo, tibwo bunaku bw’okwenda kugira ebi ensi ya Sitaane erikugira ngu nibireeta okushemererwa. Ebyo nibiba biri ebirooto. (Mat. 24:44) Ruhanga na Kristo kurabira omu Baibuli nibatugambira ebirungi ebi barikwenda kutuha omu bwire butari bwa hare n’oku twine kuguma nitureeba. Twine kuguma nitwefaho omu by’omwoyo, nitufayo aha mukago gwaitu na Yehova, n’okuguma nitwebembeza eby’Obukama. Twine kuguma nitwijuka obwire obwo n’ebirikwenda kubaho kubaasa kuguma tweteekateekire. (Kush. 22:20) Kitari ekyo, amagara gaitu gari omu kabi!