Yesu Okuzaarirwa Omu Kihongore
Ekitebyo 85
Yesu Okuzaarirwa Omu Kihongore
NOOMANYA omwereere ogu? Eego, ni Yesu. Yaaheza kuzaarirwa omu kihongore. Ekihongore n’enju y’amatungo ahu garikuraara. Mariamu abyamize Yesu omu kaato, omwanya ogu barikuheeramu endogoya n’agandi matungo eby’okurya. Kwonka shi ahabw’enki Mariamu na Yosefu bari hanu n’amatungo? Ogu ti mwanya ogu omwana ashemereire kuzaarirwamu, noogira ngu nigwo?
Ngaaha, tigwo. Kwonka egi niyo nshonga ahabw’enki bari aha: Omutegyeki wa Rooma, Kaisaari Augusto, ataireho ekiragiro ngu buri muntu aine kugaruka omu rurembo oru yaazaariirwemu okwehandiikisa omu kitabo. Haza, Yosefu akazaarirwa omuri Betelehemu. Kwonka obu Yosefu na Mariamu baahikayo, hakaba hatariho mwanya ogw’okuraaramu. Nikwo kwija hanu omu kihongore. Kandi aha izooba eryo ryenyine, Mariamu akazaara omwana Yesu! Beitu, nk’oku orikureeba, ari gye.
Nooreeba abariisa abarikwija kureeba Yesu? Bakaba bari omu iriisizo nyekiro bariisize entaama zaabo, reero okumurinkana kwabehinguririza. Akaba ari maraika! Abariisa bakatiina munonga. Kwonka maraika yaabagira ati: ‘Mutatiina! Mbainiire amakuru marungi. Eri izooba, omuri Betelehemu, Kristo Mukama yaazaarwa. Naija kujuna abantu! Niimwija kumushanga abyami omu twenda omu kihongore.’ Ahonaaho baamaraika baingi baija baatandika kuhimbisa Ruhanga. N’ahabw’ekyo, ahonaaho aba bariisa beehuuta okuza kusherura Yesu, kandi hati bamubona.
Noomanya ahabw’enki Yesu ari ow’omutaano? We buzimazima nomumanya? Ijuka ngu omu kitebyo ky’okubanza ky’eki kitabo, tukagamba aha Mwana wa Ruhanga ow’omujigaijo. Ogu mwana akakora na Yehova omu kuhanga eiguru n’ensi hamwe n’ebirimu byona. Manya, ogu niwe Yesu!
Eego, Yehova akakwata amagara g’omwana we kuruga omu iguru yaagata omunda ya Mariamu. Ahonaaho omwana yaatandika kukurira omunda ye nk’oku abandi baana bakurira omunda za baanyinabo. Kwonka ogu mwana akaba ari Omwana wa Ruhanga. Aha muheru Yesu yaazaarirwa hanu omu kihongore omuri Betelehemu. Mbwenu hati nooreeba ahabw’enki baamaraika baashemereirwe munonga okugambira abantu ngu Yesu azairwe?
