Ekitebyo 7

Omushaija Emanzi

ABANTU ku baayeyongyeire kukanya omu nsi, baingi ahari bo bakakora ebintu bibi nka Kaini. Kwonka omushaija omwe akaba atari nkabo. Niwe mushaija orikwetwa Enoka. Enoka akaba ari omushaija emanzi. Abantu boona abaabaire bamwetoroire bakaba nibakora ebintu bibi munonga, kwonka Enoka akaguma naaheereza Ruhanga.

Noomanya ahabw’enki abantu omu bunaku obwo baabaire nibakora ebintu bingi bibi? Mbwenu, teekateeka, N’oha owaareetaire Adamu na Haawa kugomera Ruhanga n’okurya aha kijuma eki Ruhanga yaagizire ngu tibashemereire kuryaho? Eego, akaba ari maraika omubi. Baibuli neemweta Sitaane. Kandi Sitaane naagyezaho kureeba ngu buri omwe yaaba mubi.

Eizooba rimwe Yehova Ruhanga akatuma Enoka kugambira abantu ekintu eki batarakunzire kuhurira. Kikaba kiri eki: ‘Ruhanga eizooba rimwe naaza kuhwerekyereza abantu boona ababi.’ Nikireebeka abantu shana bakagira ekiniga kingi ahabw’okukihurira. Nibabaasa kuba baagyerizeho n’okwita Enoka. N’ahabw’ekyo Enoka akaba aine okuba emanzi okugambira abantu ebikwatiraine n’eki Ruhanga yaabaire naaza kukora.

Ruhanga tararekire Enoka kumara omwanya muraingwa omu bantu babi nk’abo. Enoka akahangaara kumara emyaka 365 yonka. Ahabw’enki turikugira ngu “emyaka 365 yonka”? N’ahabw’okuba abantu omu biro ebyo bakaba bagira amaani mingi okukira hati kandi bakaba bahangaara kumara obwire buraingwa. Haza hi, mutabani wa Enoka Mesuseela ka yaahangaire emyaka 969!

Mbwenu, reeru bwanyima y’okufa kwa Enoka, abantu bakeyongyerera kimwe kuba babi. Baibuli neegira ngu ‘buri kiteekateeko kyabo kyona kikaba kiri kibi obutoosha,’ kandi ngu ‘ensi ekaijura obutemu.’

Noomanya enshonga emwe ahabw’enki omu biro ebyo haabaire hariho obusaasi bwingi omu nsi? N’ahabw’okuba Sitaane akaba aine omuringo musya ogw’okureetera abantu kukora ebintu bibi. Nitwija kwega ebirikukwata ahari eki omu birikukurataho.

Okutandika 5:21-24, 27; 6:5, 11-13; Abaheburaayo 11:5; Yuda 14, 15.