Paseka ya Jesu ya mafelelo e be e tlo ba ya bohlokwa kudu. Ka ge a be a le kgauswi le go hwa, o ile a rulaganya go ja Paseka le baapostola ba gagwe gomme a thome tiragalo yeo e bego e tla swarwa ngwaga le ngwaga, e lego ya Segopotšo sa lehu la gagwe. Ka gona o ile a roma Petro le Johane gore ba yo lokiša phapoši yeo ba bego ba tla e diriša. (Lu 22:7-13; bona seswantšho sa letlakala la ka ntle.) Se se re gopotša gore le rena re swanetše go lokišetša Segopotšo seo se tlago go swarwa ka di-27 tša March. Ga go pelaelo gore diphuthego di šetše di rulagantše seboledi, diswantšhetšo le dilo tše dingwe. Eupša yo mongwe le yo mongwe wa rena a ka dira’ng go itokišetša Segopotšo?

Oketša tsela yeo o lebogago sehlabelo sa Jesu. Bala mmalo wa Beibele wa Segopotšo gomme o naganišiše ka wona. O ka hwetša lenaneo la mmalo wo wa Beibele ka pukwaneng ya Go Hlahloba Mangwalo ka Mehla. Lenaneo le lengwe leo le nago le ditaba ka botlalo le ka pukwaneng ya Tlhahlo ya go Ithuta Lentšu la Modimo, kgaolo 16. (Bona le Pukwana ya Seboka sa Bophelo le Bodiredi ya April 2020.) Malapa a ka diriša puku ya Tlhahlo ya go Dira Nyakišišo ya Dihlatse tša Jehofa go hwetša ditaba tšeo a ka ithutago tšona borapeding bja lapa tša mabapi le bohlokwa bja sehlabelo sa Jesu sa topollo.

Mema ba bangwe. Dira sohle seo o ka se kgona go tšea karolo lesolong la go mema batho Segopotšong. Nagana ka batho bao o ka ba memago, ba bjalo ka dipoelo tša gago, bao o kilego wa ithuta Beibele le bona, batho bao o ba tlwaetšego le ba bangwe ba geno. Bagolo ba swanetše go mema batho bao ba fodilego moyeng. Gopola gore ge e ba motho yo o mo memilego a sa dule moo o dulago, o ka mo hweletša nako le lefelo leo Segopotšo se tlago go swarelwa gona moo a dulago. O tla hwetša lefelo leo ka go tsena wepesaeteng ya rena gomme o kgotle ka tlase ga MABAPI LE RENA ke moka o ye go “Segopotšo.”

Ke’ng se sengwe seo re ka se dirago go lokišetša Segopotšo?