Joshua le Solomone ba ile ba bontšha gore ga go na selo le setee seo Jehofa a se holofeditšego seo se sa kago sa phethagala. (Jos 23:14; 1Dik 8:56) Go hlatselana ga banna ba ba babedi ba botegago go re nea motheo o tiilego wo re ka agago tumelo ya rena go wona.—2Ko 13:1; Tit 1:2.

Jehofa o ile a phethagatša bjang dikholofetšo tša gagwe mehleng ya Joshua? Wena le lapa la gago bogelang bidio yeo e rego, ‘Ga go Lentšu Leo le sa Kago la Phethega.’ Ke moka le arabeng dipotšišo tše di latelago: (1) O ka ekiša bjang mediro ya Rahaba ya tumelo? (Heb 11:31; Jak 2:24-26) (2) Mohlala wa Akane o bontšha bjang gore go se kwe ka boomo go tliša mathata a magolo? (3) Le ge banna ba Gibeoni e be e le bahlabani, ke ka baka la’ng ba ile ba fora Joshua gomme ba dira khutšo le Baisiraele? (4) Lentšu la Jehofa le ile la phethagala bjang ge dikgoši tše hlano tša Baamore di be di nyaka go lwa le Baisiraele? (Jos 10:5-14) (5) Jehofa o go thušitše bjang ge o dutše o tsoma Mmušo wa gagwe pele le toko ya gagwe?—Mat 6:33.

Ge re naganišiša ka dilo ka moka tšeo Jehofa a di dirilego, tšeo a di dirago gona bjale le tšeo a tlago go di dira nakong e tlago, tumelo ya rena dikholofetšong tša gagwe e tia le go feta.—Rom 8:31, 32.