THUTO 17

Jesu ke Motho wa Mohuta Mang?

BAPALA

Ge re ithuta ka dilo tšeo Jesu a ilego a di dira le go di bolela nakong ya ge a be a le mo lefaseng, re kgona go mo tseba gabotse gomme seo sa re dira gore re gwerane le yena le Jehofa. Ke dilo dife tše dingwe tšeo di kgahlišago ka Jesu? Gona re ka mo ekiša bjang?

1. Jesu o swana le Tatagwe bjang?

Pele Jesu a etla mo lefaseng, o phetše le Tatagwe mengwaga e mentši kudu legodimong gomme a ithuta dilo tše dintši go yena. Ke ka baka leo a dirago dilo go swana le yena, a naganago go swana le yena, le go ikwa go swana le yena. (Bala Johane 5:19.) Ge e le gabotse, Jesu o swana tlwaa le Tatagwe. Ke ka baka leo a ilego a re: “Yo a bonego nna o bone le Tate.” (Johane 14:9) Ge o dutše o ithuta gore Jesu ke motho wa mohuta mang, o tla tseba Jehofa gabotse. Ka mohlala, tsela yeo Jesu a ratago batho ka yona, e bontšha gabotse gore le wena Jehofa o a go rata.

2. Jesu o bontšhitše bjang gore o rata Jehofa?

Jesu o itše: “E le gore lefase le tsebe gore ke rata Tate, ke dira tšeo Tate a ntaetšego gore ke di dire.” (Johane 14:31) Ge Jesu a be a le mo lefaseng, o ile a bontšha gore o rata Tatagwe kudu ka go kwa melao ya gagwe, le ge ka dinako tše dingwe go be go fela go eba thata go dira bjalo. Le gona ka ge Jesu a be a rata Tatagwe kudu, o be a dula a nyaka go bolela ka yena gore le batho ba bangwe ba mo tsebe.—Johane 14:23.

3. Jesu o bontšhitše bjang gore o rata batho?

Beibele e re Jesu o be a ‘kgahlwa ke bana ba batho.’ (Diema 8:31) O ile a bontšha gore o rata batho ka go dula a ba kgothatša le go ba thuša. E bile o be a sa dire mehlolo go no bontšha batho gore o na le matla, eupša o be a e dira ka gobane a ba kwela bohloko. (Mareka 1:40-42) O be a swara batho ka moka ka botho e bile a sa ba kgetholle. Mantšu a gagwe a be a homotša batho ka moka bao ba bego ba mo theetša ka dipelo tša bona ka moka, e bile a dira gore ba be le kholofelo ya gore nakong e tlago dilo di tla loka. Jesu o ile a ikemišetša go tlaišega le go hwela batho ka moka ka ge a ba rata. Eupša batho bao ba kwago dithuto tša gagwe bona o ba rata kudu.—Bala Johane 15:13, 14.

ITHUTE KA MO GO TSENELETŠEGO

Ithute ka mo go oketšegilego gore Jesu ke motho wa mohuta mang. Le gona ekwa gore o ka dira eng gore o bontšhe ba bangwe gore o a ba rata, le gore o ka dira eng gore o be motho yo a ratago go nea go no swana le yena.

4. Jesu o rata Tatagwe

Tsela yeo Jesu a bego a phela ka yona e re ruta kamoo re ka bontšhago Modimo gore re a mo rata. Balang Luka 6:12 le Johane 15:10; 17:26. Ka morago ga gore le bale lengwalo le lengwe le le lengwe, boledišanang ka potšišo e latelago:

Re ka bontšha bjang gore re rata Jehofa go swana le Jesu?

Jesu o be a rata Tatagwe wa legodimong e bile a dula a bolela le yena ka thapelo

5. Jesu o na le taba le batho bao ba hlokago thušo

Jesu o be a rata batho ba bangwe go feta ka mokgwa wo a ithatago ka gona. Le ge a be a ikwa a lapile, o be a šomiša nako ya gagwe le matla a gagwe go thuša batho. Balang Mareka 6:30-44, gomme le boledišaneng ka dipotšišo tše di latelago:

Go ya ka lengwalo le, ke dilo dife tše dingwe tšeo di bontšhago gore Jesu o be a na le taba le batho ba bangwe?—Bona temana 31, 34, 41 le 42.
Ke’ng seo se ilego sa dira gore Jesu a nyake go thuša batho?—Bona temana 34.
Ka ge Jesu a na le dika tša go swana le tša Jehofa, seo se go ruta’ng ka Jehofa?
Re ka bontšha bjang gore re na le taba le batho ba bangwe go swana le Jesu?

6. Jesu o rata go nea

Le ge Jesu a be a se na dilo tše dintši, o be a rata go fa, goba go abelana le batho ba bangwe dilo tšeo a bego a na le tšona. E bile o re kgothaletša gore le rena re dire se se swanago. Balang Ditiro 20:35, gomme le boledišaneng ka potšišo e latelago:

Go ya ka Jesu, re swanetše go dira’ng gore re thabe?

Bapalang BIDIO ye, gomme le boledišaneng ka potšišo e latelago:

BIDIO: “Go na le Lethabo le Legolo go Neeng”—Karolwana (4:00)

Le ge re se na dilo tše dintši, ke dilo dife tšeo re ka di dirago go bontšha gore re rata go nea?

Na o be o tseba?

Beibele e re ruta gore ge re rapela Jehofa, re swanetše go diriša leina la Jesu. (Bala Johane 16:23, 24.) Ge re rapela ka yona tsela yeo, re bontšha gore re leboga seo Jesu a re diretšego sona go re thuša gore re be bagwera ba Jehofa.

BATHO BA BANGWE BA RE: “Modimo ga a na taba le rena ge re welwa ke mathata.”