NYWAGA-KGOLO e mentši pele Baisiraele ba tsena Kanana, Jehofa o be a holofeditše gore o tla nea ditlogolwana tša Aborahama naga yeo. Ga bjale, ba le ka tlase ga boetapele bja Jošua, Baisiraele ba be ba loketše go thopa Naga ya Kholofetšo.

Modimo o be a ahlotše Bakanana gomme a hweditše gore ba swanelwa ke phedišo. Ba be ba tladitše naga ka mekgwa e gobogilego kudu ya dikopano tša botona le botshadi gotee le tšhollo ya madi e sa laolegego. Ka baka leo, metse ya Bakanana yeo Baisiraele ba e fentšego e be e swanetše go fedišwa ka mo go feletšego.

Lega go le bjalo, pele ba tsena nageng yeo, Jošua o ile a romela dihlodi tše pedi tšeo di ilego tša dula motseng wa Jeriko ka ngwakong wa mosadi yo a bitšwago Rahaba. O ile a amogela dihlodi tšeo ka ngwakong wa gagwe gomme a di šireletša, gaešita le ge a be a tseba gore ke Baisiraele. Rahaba o be a e-na le tumelo go Modimo wa Baisiraele, ka gobane o be a kwele ka mediro ya ge Jehofa a be a phološa batho ba gagwe. O ile a re dihlodi tšeo di dire keno ya gore di tla mo šireletša gotee le ba lapa labo.

Ka morago, ge Baisiraele ba tsena Kanana gomme ba hlasela Jeriko, Jehofa ka mohlolo o ile a dira gore marako a Jeriko a phušoge. Madira a Jošua a ile a šwahlela motse gomme a o fediša, eupša a phološa Rahaba le ba lapa labo. Ke moka, lesolong le akgofilego leo le tšerego nywaga e tshela, Jošua o ile a thopa dikarolo tše dikgolo tša Naga ya Kholofetšo. Ka morago ga moo, naga e ile ya abelwa meloko ya Isiraele.

Go ya bofelong bja tirelo ya gagwe, Jošua o ile a kgoboketša batho ka moka. O ile a ba gopotša ditirišano tša Jehofa le bagologolo ba bona gomme a ipiletša go bona gore ba hlankele Jehofa. Lega go le bjalo, ka morago ga ge Jošua le banna bao a bego a hlankela le bona ba hwile, Baisiraele ba ile ba lahla Jehofa gomme ba hlankela medimo ya maaka. Ka nywaga e ka bago 300, setšhaba ga se sa ka sa latela melao ya Jehofa gabotse. Ka nako yeo, Jehofa o ile a dumelela manaba a Baisiraele, a bjalo ka Bafilisita, gore a ba gatelele. Eupša ge Baisiraele ba be ba llela Jehofa gore a ba thuše, o ile a kgetha baahlodi—ba 12 ka moka—gore ba ba phološe.

Mehla ya baahlodi yeo e hlaloswago ka pukung ya Baahlodi e thomile ka Othiniele gomme ya fela ka Simisone, yoo e bego e le monna yo a nago le matla kudu yo a kilego a phela. Therešo ya motheo yeo e tšwelelago kgafetša-kgafetša ka pegong e kgahlišago ya puku ya Beibele ya Baahlodi ke ye: Go ikokobeletša Jehofa go tliša ditšhegofatšo, go se ikokobeletše yena go tliša masetlapelo.

—E theilwe go Jošua; Baahlodi; Lefitiko 18:24, 25.