2. Tlala

“Go tla ba le tlhaelelo ya dijo.”—MAREKA 13:8.

● Monna o tsoma botšhabelo motsaneng wa Quaratadji, kua Niger. Batswala ba monna yo, bana babo le dikgaetšedi tša gagwe le bona ba tlile ba etšwa ditikologong tše di lego ka gare tša naga ka maiteko a go tšhabela tlala. Lega go le bjalo, monna yo o robala fase mmeteng a nnoši. Ke ka baka la’ng a le noši? Sidi, e lego kgoši ya motsana woo, o hlalosa ka gore: “Ga a kgone go fepa [ba lapa labo] e bile ga a kgone go tšwela pele a ba lebeletše ka mahlong.”

DITHEREŠO DI BONTŠHA ENG? Lefaseng ka bophara, mo e nyakilego go ba motho o tee go ba šupago ga a hwetše dijo tše di lekanego letšatši le lengwe le le lengwe. Dipalopalo ke tše mpe le go feta dinageng tša Afrika tša ka borwa bja Sahara, moo motho o tee go ba bararo a dulago a swerwe ke tlala. Go dira gore dipalopalo tše di kwešišege gakaone, akanya ka lapa leo le bopšago ke tate, mma le ngwana. Ge e ba dijo tšeo di lego gona di lekana ba babedi ba bona feela, ke mang yoo a swanetšego go se je? Na ke tate, mma goba ngwana? Ye ke phetho yeo malapa a bjalo a swanetšego go e dira letšatši le letšatši.

KGANETŠO E TLWAELEGILEGO KE EFE? Lefase le tšweletša dijo tše di fetago tše di lekanego batho ka moka. Ditšweletšwa tša lefase di swanetše go fo laolwa gabotse.

NA KGANETŠO YEO E A KWAGALA? Ke therešo gore balemi ba kgona go tšweletša le go sepediša dijo tše dintši go feta le ge e le neng pele historing. Ge e le gabotse, mebušo ya batho e swanetše go kgona go laola go abja ga dijo tšeo di tšweletšwago ke lefase go rarolla mathata a tlala. Lega go le bjalo, gaešita le ge ba ena le nywagasome ba leka go dira bjalo, ga se ba ka ba atlega.

O NAGANA’NG? Na Mareka 13:8 e a phethagala? Go sa šetšwe tšwelopele ya thekinolotši, na go na le tlhaelelo ya dijo lefaseng ka bophara?

Ditšhišinyego tša lefase le tlala gantši di feta mathata a mangwe ao a bakwago ke karolo e nngwe ya pontšho ya mehla ya bofelo.

[Ntlhakgolo go letlakala 5]

“Bana ba fetago teetharong bao ba bolailwego ke bolwetši bja nyumonia, letšhollo le malwetši a mangwe ba ka be ba se ba hwa ge nkabe ba be ba hwetša dijo tše di lekanego.”—ANN M. VENEMAN, YO E KILEGO YA BA MOOKAMEDI WA SEKHWAMA SA BANA SA DITŠHABA TŠE KOPANEGO.

[Mothopo wa Seswantšho go letlakala 5]

© Paul Lowe/Panos Pictures