Ke ka Baka la Eng Manyalo a Senyega?

“Bafarisei ba tla go [Jesu] ba ikemišeditše go mo leka, ba re: ‘Na go dumelelwa ke molao gore monna a hlale mosadi wa gagwe ka lebaka le lengwe le le lengwe?’”—Mateo 19:3.

BA BANGWE bao ba phetšego mehleng ya Jesu ba ile ba botšiša ge e ba manyalo a ka atlega goba a swanetše go atlega. Jesu o ile a ba fetola a re: “Na ga se la bala gore yo a ba bopilego mathomong o ba dirile e le yo motona le yo motshadi, gomme a re: ‘Ka lebaka le monna o tla tlogela tatagwe le mmagwe, a kgomarela mosadi wa gagwe gomme ba babedi ba e tla ba nama e tee’? Ka gona, ga e sa hlwa e le ba babedi, eupša ke nama e tee. Ka baka leo, se Modimo a se tlemagantšego jokong go se be le motho yo a se aroganyago.” * (Mateo 19:4-6) Go molaleng gore Modimo o be a rerile gore manyalo a swarelele.

Dinageng tše dintši lehono, manyalo a e ka bago a 40 lekgolong goba go feta moo go manyalo ka moka a a ‘arogana’ gomme a feleletša ka tlhalo. Na keletšo ya Beibele mabapi le lenyalo e fetilwe ke nako ka mo go feletšego? Na go ka direga gore manyalo a senyega ka baka la gore go na le phošo ka tokišetšo ye?

Ela hloko papišo ye: Malapa a mabedi a banyalani a reka mohuta o swanago wa koloi. Banyalani ba pele ba hlokomela koloi ya bona gabotse le go e otlela ka šedi. Koloi ya bona ga e senyege. Mola banyalani ba bobedi ba sa itshwenye ka go hlokomela koloi ya bona gomme ba e otlela gampe. Koloi yeo e a robega gomme e a hlokomologwa. Molato ke wa mang mabapi le ditlamorago tše—na ke wa koloi goba ke wa beng ba yona? Go molaleng gore beng ba koloi ke bona ba nago le boikarabelo bjo bogolo.

Ka mo go swanago, taba ya gore manyalo a a senyega ga e bolele gore go na le phošo ka thulaganyo ya lenyalo. Manyalo a dimilione ao a atlegilego a hlatsela seo. Manyalo a bjalo a tliša lethabo le tekatekano bathong, malapeng le ditšhabeng. Eupša lenyalo, go swana le koloi, le nyaka go dula le hlokomelwa gabotse e le gore le swarelele.

Go sa šetšwe gore lenyalo la lena le na le letšatši goba nywagasome, keletšo ya Beibele mabapi le kamoo le ka le hlokomelago le go le tiiša ke yeo e šomago e le ruri. Ela hloko mehlala e mengwe matlakaleng a latelago.

[Mongwalo wa tlase]