Hlokomela Gore o se ke wa Forwa

DON QUIXOTE ke moanegwa yo a tsebjago kudu wa boikgopolelo wa kanegelo ya leina leo yeo e hlamilwego ke mongwadi wa kua Sepania wa lekgolong la bo-16 la nywaga e lego Miguel de Cervantes. Ka kanegelong yeo, Don Quixote o tlatša monagano wa gagwe ka mabarebare le dinonwane tšeo di bolelago ka bakgoma ba bagale bao ba itlhamilego bakeng sa go phološa dikgarebe tšeo di lego kotsing. Kapejana o thoma go dumela gore le yena ke mokgoma yo a hlomphegago. Kgaolong e nngwe e tumilego, o hlasela dihlopha tša difeufeu tšeo a naganago gore ke sehlopha sa makgema. A kgodišegile ka monaganong wa gagwe gore o dira dilo tšeo di nyakwago ke Modimo ka go bolaya makgema ao, o feleletša ka go nyatšega ka mo go feletšego.

Go ba gona, Don Quixote ke moanegwa wa boikgopolelo, eupša go forwa ga se selo se senyenyane. Ka mohlala, nagana ka setagwa seo se naganago gore se ka nwa ka mo se nyakago, eupša se feleletšago se se sa phela gabotse mmeleng le go senya bophelo bja lapa la sona. Goba o nagane ka motho yo a swerwego ke bolwetši bja anorexia, yo a naganago gore o phela gabotse mmeleng eupša ge e le gabotse a ipolaya ganyenyane-ganyenyane ka go ipolaiša tlala.

Na yo mongwe wa rena a ka wela molabeng wa go forwa? Ka manyami karabo ke ee. Therešo ke gore ka moka ga rena re ka wela kotsing e bjalo. Le gona, seo se akaretša kgonagalo ya gore re ka forwa ke bodumedi bjoo re bo ratago—ka ditla-morago tše kotsi. Ke ka baka la’ng go le bjalo? O ka itšhireletša bjang kotsing ya go forwa?

Dikotsi tša go Forwa

Pukuntšu e nngwe e hlalosa go fora e le “go dira gore motho a amogele maaka e le therešo goba go amogela gore selo seo e sego sa kgonthe ke sa kgonthe.” Le gona, e šupa “go  gapeletša dikgopolo tša maaka goba ditumelo tšeo di bakago go hlokomologa, kgakanego goba maikwelo a go itlhoboga.” Kgopolo ya motheo ya lentšu le, gotee le mantšu a bjalo ka “fora” le “radia,” ke go fapoša motho tseleng ka go mo hlalefetša. Ruri motho yo a sa tsebego gore o beilwe boemong bja “go hlokomologa, kgakanego goba maikwelo a go itlhoboga” ka go newa tsebišo e sa nepagalago ka boomo o kotsing e kgolo.

Taba e nyamišago kudu ke gore motho yo a forilwego goba a radiilwego gantši o swarelela ditumelong tša gagwe go sa šetšwe bohlatse bjo bo kwagalago bja go ganetšana le seo a se dumelago. Mohlomongwe o gomarela tumelo ya gagwe moo e lego gore o tswalela mahlo a gagwe le ditsebe a sa nyake go dumelelana le bohlatse bjo bo ka thulanago le yona.

Na re Kotsing?

O ka botšiša gore, ‘Na ga se go feteletša go bolela gore ka moka ga rena re kotsing ya go forwa mabapi le ditumelo tša rena tša bodumedi?’ Aowa, ga go bjalo. Se ke ka gobane Sathane Diabolo, yoo Jesu a ilego a mmitša “tatago maaka,” o ikemišeditše go re fora le go re radia. (Johane 8:44) Sathane gape o hlaloswa ka Beibeleng e le “modimo wa tshepedišo ye ya dilo.” O ‘foufaditše menagano’ ya batho ba dimilione historing ka moka. (2 Bakorinthe 4:4) Le ga bjale, o sa ‘timetša lefase ka moka le go agilwego go lona.’—Kutollo 12:9.

Sathane o thomile go fora batho mathomong a histori ya bona. Ka mohlala, o ile a fora Efa gore a dumele gore o be a se a swanela go ikokobeletša melao ya Mmopi wa gagwe le gore a ka ‘ba bjalo ka Modimo, a tseba botse le bobe,’ ke gore, go itirela diphetho mabapi le se sebotse le se sebe. (Genesi 3:1-5) Bjoo e bile bofora bjo bogolo bja mathomo, ka gobane gaešita le ge batho ba neilwe tokologo ya go ikgethela seo ba nyakago go se dira, ba be ba se ba bopša ba e-na le bokgoni bja go itirela phetho ya seo se lokilego le seo se sa lokago. Ke Modimo feela, bjalo ka Mmopi le Mmuši, yo a nago le tshwanelo ya go laola. (Jeremia 10:23; Kutollo 4:11) Ke go iphora go gokaakang go nagana gore tshwanelo ya go kgetha se se lokilego le se se sebe e ra gore re itirela phetho ya gore seo se lokilego ke sefe le gore se sa lokago ke sefe! Ka manyami, rena batho ba sego ba phethagala re wela molabeng woo gabonolo.

Na e ka go Diragalela?

Ditumelo tša gago tša bodumedi tšeo o di ratago kudu di ka ba di bile gona ka nywaga-kgolo e mentši, mohlomongwe di fetišeditšwe go tloga melokong ya bogologolo go fihla melokong ya gona bjale. Lega go le bjalo, seo ga se bolele gore dithuto tšeo ke therešo. Ka baka la’ng? Go ba gona, pego ya Beibele e bontšha gore kapejana ka morago ga lehu la baapostola ba Kriste, banna ba baradia ba ile ba tšwelela ka phuthegong ya Bokriste gomme ba ruta “dilo tše di kgopamego gore ba goge barutiwa gore ba ba šale morago.” (Ditiro 20:29, 30) Ka maano ba ile ba fora batho “ka dipolelo tše di kgodišago” gotee le “ka filosofi le bofora bja lefeela go ya ka tlwaelo ya batho.”—Bakolose 2:4, 8.

Na dilo di fapane lehono? Ga se gore go bjalo, ka ge moapostola Paulo a lemošitše gore dilo di tla mpefala kudu “mehleng ya bofelo,” e lego nako yeo re phelago go yona ga bjale. O ngwadile gore: “Batho ba kgopo le baikgakanyi ba tla fetelela ka bobe, ba aroša e bile ba arošwa [goba, “bà fora ba bangwê, le bôná bà forwa,” Beibele ya Sepedi].”—2 Timotheo 3:1, 13.

Ka gona ke gabohlale go kwa temošo ya moapostola Paulo, e rego: “Ka baka leo anke yo a naganago gore o eme a hlokomele gore a se we.” (1 Bakorinthe 10:12) Ke therešo gore Paulo o be a bolela ka boemo bja motho pele ga Modimo. Ge e le gabotse, go nagana gore Sathane a ka se go fore, ka bogona ke go forwa go gogolo. Ga go na yo a ka se kego a fihlelelwa ke “maano a bohwirihwiri” a Sathane. (Baefeso 6:11) Ke ka baka leo moapostola a ilego a bolela ka go tšhogela Bakriste-gotee le yena a re, “ka tsela e itšego go etša ge noga e ile ya fapoša Efa ka maano a yona, menagano ya [bona] e ka senywa ya tlogela potego le go sekega tše di swanelago Kriste.”—2 Bakorinthe 11:3.

 O ka Itšhireletša Bjang Gore o se Forwe?

Ka gona o ka itšhireletša bjang gore o se forwe ke Sathane? O ka kgonthišetša bjang gore o “rapela [Modimo] ka moya le ka therešo”? (Johane 4:24) Diriša seo Jehofa Modimo a go neilego sona. Sa pele, o go neile “matla a go hlaologanya” e le gore o kgone go kgethologanya therešo go maaka. (1 Johane 5:20) Le gona o dirile gore go kgonege gore o lemoge maano a Sathane. (2 Bakorinthe 2:11) Ge e le gabotse, Jehofa Modimo o go neile selo se se nyakegago go lwantšha maiteko a Sathane a go go timetša.—Diema 3:1-6; Baefeso 6:10-18.

Se bohlokwa le go feta, Modimo o go neile selo seo se ka go šireletšago ka dinako ka moka. Selo seo ke’ng? Ke seo moapostola Paulo a ilego a kgothaletša modirišani wa gagwe Timotheo go ithekga ka sona ge go tliwa ditabeng tša tumelo ya bodumedi. Ka morago ga go lemoša ka “batho ba kgopo le baikgakanyi,” moapostola Paulo o boditše Timotheo gore a ba ganetše ka go thea tumelo ya gagwe ‘mangwalong a makgethwa’—ke gore, Lentšung la Modimo le lekgethwa, e lego Beibele.—2 Timotheo 3:15.

Ke therešo gore ba bangwe ba ka re motho yo mongwe le yo mongwe yo a dumelago go Modimo le go amogela gore Beibele ke Lentšu la Gagwe le le buduletšwego, o lahlegile. Lega go le bjalo, ge e le gabotse go timetše bao ka manganga ba ganago bohlatse ka moka bja gore go na le Mmopi le gore Beibele ruri ke Lentšu la Modimo leo le buduletšwego. *—Baroma 1:18-25; 2 Timotheo 3:16, 17; 2 Petro 1:19-21.

Go e na le go forwa ke dipolelo tšeo “ka maaka di bitšwago gore ke ‘tsebo,’” diriša Lentšu la Modimo go hwetša therešo. (1 Timotheo 6:20, 21) Swana le banna le basadi ba bulegilego monaganong bao moapostola Paulo a ilego a ba ruta kua Berea. Ba ile ba “[amogela] lentšu ka go le fišegela kudu monaganong.” Ga se feela gore ba be ba dumela seo moapostola Paulo a ba rutilego sona eupša gape ba be ba “hlahloba Mangwalo ka kelohloko letšatši le letšatši go bona ge e ba dilo tše di be di le bjalo.”—Ditiro 17:11.

 Ga go na seo o swanetšego go se boifa ge o hlahloba ditumelo tša gago ka tsela ye. Ge e le gabotse, Beibele e go kgothaletša go “kgonthišetša dilo tšohle” pele o di amogela e le therešo. (1 Bathesalonika 5:21) Go ya bofelong bja lekgolo la pele la nywaga C.E., moapostola Johane o ile a eletša Bakriste-gotee le yena a re: “Baratiwa, le se ke la dumela polelo e nngwe le e nngwe e buduletšwego, eupša lekang dipolelo tše di buduletšwego gore le bone ge e ba di e-tšwa go Modimo.” (1 Johane 4:1) Ee, gaešita le ge dithuto tše dingwe tša bodumedi di bonala di “buduletšwe”—goba di e-tšwa go Modimo—e sa dutše e le gabohlale go hlahloba Mangwalo go di kgonthišetša pele re di amogela e le therešo.—Johane 8:31, 32.

Diriša Seo o Ithutago Sona

Lega go le bjalo, go na le selo se sengwe seo se nyakegago. Morutiwa Jakobo o ngwadile gore: “E-bang badiri ba lentšu, e sego bakwi feela ba iphorago ka kgopolo ya maaka.” (Jakobo 1:22) Ga se gwa lekana go fo tseba seo Beibele e se rutago. O swanetše go diriša seo o ithutago sona. Bjang? Ka go dira seo Modimo a go laelago go se dira le go se dire dilo tšeo a go thibelago go di dira.

Ka mohlala, lebelela go hloka boitshwaro moo go re dikologilego. Na seo ga se go bontšhe kamoo Sathane a atlegilego ka gona go foreng batho gore ba nagane gore ba ka hlokomologa melao ya Modimo ya boitshwaro ntle le go welwa ke kotsi? Ka baka la se, moapostola Paulo o neile Bakriste temošo e lebanyago, e rego: “Le se ke la timetšwa: Modimo ga a kwerwe. Gobane se sengwe le se sengwe seo motho a se bjalago, ke sona seo a tlago go se buna.”—Bagalatia 6:7.

O se ke wa swana le “monna wa lešilo” yoo Jesu a ilego a mo hlalosa e le yo a “kwago” dipolelo tša gagwe eupša a sa “di dire.” Go swana le Don Quixote wa ka pukung ya Cervantes, yo a bego a forilwe ke dikgopolo tša gagwe, monna yo o be a forilwe ka gobane o be a nagana gore a ka aga ntlo e tiilego le e šireletšegilego motheong o sego wa tia wa lešabašaba. Go e na le moo, swana le monna yo a “agilego ntlo ya gagwe godimo ga lefsika.” Jesu o ile a re monna yo o na le “temogo” ka gobane o kwa dipolelo tša Jesu “gomme a di dira.”—Mateo 7:24-27.

[Mongwalo wa tlase]

[Lepokisi/​Seswantšho go letlakala 12, 13]

Na o Bona Dilo Kamoo di Lego ka Gona?

Ka bo-1930, rabokgabo wa Sweden Oscar Reutersvärd o ile a thala le go phatlalatša lelokelelo la diswantšho tšeo di ilego tša tla tša bitšwa diswantšho tšeo di sa kgonegego. Mohlala wa lehono o bontšhitšwe ka go le letshadi. Ge o di lebelela kapejana, diswantšho tše di dira gore o dumele seo o se bonago le ge e se sa therešo. Lega go le bjalo, ge se hlahlobja ka kelohloko se ka bonala e le makatika a bohlale ao a hlamilwego ke mothadi go gakantšha goba go fora leihlo le monagano wa yoo a di lebeletšego.

Diswantšho tše ga se tšona feela tšeo di bonagalago di fapane le tšeo di swanetšego go ba tšona. Nywaga e dikete tše pedi e fetilego, Beibele e ile ya lemoša ka gore: “Hlokomelang: mohlomongwe go ka ba le yo a le thopago ka filosofi le bofora bja lefeela go ya ka tlwaelo ya batho, go ya ka dilo tša motheo tša lefase, e sego go ya ka Kriste.”—Bakolose 2:8.

Seo se dirago gore keletšo ye e kwagale kudu ke gore mongwadi wa mantšu ao ka boyena o be a kile a forwa. Ka ge a be a rutilwe dinaong tša yo mongwe wa barutiši ba ba hlompšhago kudu ba bodumedi ba nakong ya gagwe le go tsebana le batho ba maemo a phagamego, e be e se motho yo a bego a ka forwa gabonolo.—Ditiro 22:3.

Monna yo—Saulo wa Tareso—o ile a dirwa gore a dumele gore motho yo mongwe le yo mongwe yo a sa latelego setšo le metlwae ya bodumedi bja gagwe o rogakilwe. A neilwe matla ke baetapele ba bodumedi bja Bajuda, o ile a bona e le modiro woo ao neilwego ke Modimo go ahlola mang le mang yo a ganago go tlogela tumelo ya gagwe ya Bokriste. O ile a ba a thekga go bolawa ga monna yo mongwe wa motseng wa gabo yo a ilego a latofatšwa ka maaka gore ke morogaki.—Ditiro 22:4, 5, 20.

Ge nako e dutše e e-ya, Saulo o ile a thušwa go bona phapano gare ga seo se nepagetšego le seo se fošagetšego, seo Modimo a se amogelago le seo A sa se amogelego. Ge Saulo a lemogile gore o fošitše, monna yo wa mafolofolo o ile a fetoša ditsela tša gagwe gomme a tsebja e le Paulo, moapostola wa Jesu Kriste. A se sa forilwe, Paulo o ile a hwetša tsela ya kgonthe ya borapedi.—Ditiro 22:6-16; Baroma 1:1.

Go swana le Paulo, batho ba bantši ba botegago ba kile ba forwa ka dithuto tšeo di ka swantšhwago le diswantšho tše sa kgonegego—ditumelo tšeo di bonagalago di kgahliša eupša di sego tša thewa Lentšung la Modimo. (Diema 14:12; Baroma 10:2, 3) Ke moka ba ile ba thušwa go bona seo ge e le gabotse ditumelo le dienywa tša bodumedi bja bona e lego sona. (Mateo 7:15-20) Ge ba hwetša tsebo e nepagetšego ya Beibele, ba ile ba dira diphetogo ditumelong tša bona le maphelong a bona e le gore ba amogelwe ke Modimo.

Na o be o ka rata go latela mohlala wa moapostola Paulo gomme o hlahlobe ditumelo tša gago o diriša Lentšu la Modimo, Beibele? Dihlatse tša Jehofa di tla thabela go go thuša.

[Mothopo wa Seswantšho go letlakala 10]

Engravings by Doré