REBEKA ke leina le le tlwaelegilego mafelong a mantši lehono. Na o tseba motho yo a bitšwago ka leina leo?— * Rebeka e be e le motho yo bohlokwa ka pukung e tumilego kudu lefaseng e lego Beibele. O tseba’ng ka yena?— Re swanetše go ithuta ka Rebeka ka gobane mohlala wa gagwe o ka re thuša go hlankela Modimo wa therešo, Jehofa.

Rebeka ke mosadi wa bobedi yo Beibele e bolelago ka leina la gagwe yo a ilego a ba morapedi wa kgonthe wa Jehofa. Na o tseba gore mosadi wa pele yo bjalo ke mang?— Ke Sara, mosadi wa Aborahama. Ge e be e le mokgekolo, Sara o ile a belega Isaka—ngwana a nnoši wa gagwe. A re bone kamoo Rebeka a bego a ikemišeditše go dira seo se kgahlago Jehofa le kamoo a ilego a kopana le Isaka.

Nywaga e 60 e be e fetile go tloga mola Modimo a boditšego Aborahama le Sara gore ba tšwe motseng wa Harane ba ye nageng ya Kanana. Ge Aborahama le Sara ba be ba tšofetše, Modimo o ile a ba holofetša gore ba tla ba le ngwana yo a tla bitšwago Isaka. Ka ge o ka nagana, Isaka o be a ratwa kudu ke batswadi ba gagwe. Ge Sara a e hwa a e-na le nywaga e 127, morwa wa gagwe, Isaka, e be e le monna yo a godilego yoo a ilego a nyamišwa ke lehu la mmagwe. Aborahama ga a nyake Isaka a nyala morwedi wa Bakanana ka baka la gore batho bao ba be ba sa rapele Jehofa. Ka gona, o romela mohlanka wa gagwe, mohlomongwe Eliesere, gore a yo nyakela Isaka mosadi go meloko ya Aborahama kua Harane, ye e lego bokgoleng bja dikhilomithara tše 800!—Genesi 12:4, 5; 15:2; 17:17, 19; 23:1.

 Mafelelong Eliesere, a e-na le dikamela tše lesome tšeo di rwelego dithoto le dimpho tša monyadiwa, o fihla Harane le bahlanka ba bangwe ba Aborahama. Ba ema sedibeng ka baka la gore Eliesere a tseba gore thapama, batho ba be ba e tla go ga meetse le go gela diphoofolo tša bona. Eliesere ga bjale o rapelela gore mosadi yo a tlago go mo kgethela Isaka a dumele go mo nea meetse ka go bolela gore: “A k’O nwê; le dikamêla tša xaxo ke tlo di xêla!”

Go direga sona se! Rebeka wa kgarebe wa “sebopêxô se sebotse ka kudu,” o fihla sedibeng. Ge Eliesere a mo kgopela meetse, o fetola ka gore: “Le dikamêla tša xaxo ke tlo di xêla.” Ge a kitima a boela sedibeng ‘a e-ga meetse,’ Eliesere o be a mo lebeletše “à ikhomoletše.” Anke o nagane! Gore a nweše dikamela tše lesome go fihlela di kgotsofala, Rebeka o swanetše go tliša dilithara tše ka bago tše 1 000 tša meetse!

Eliesere o nea Rebeka dimpho tše dibotse, le gona o kwa gore ke morwedi wa Bethuele, wa leloko labo Aborahama. Rebeka o laletša Eliesere le bagwera ba gagwe go sepela le yena go ‘yo robala’ ga gabo. Ke moka o kitimela pele lapeng go yo ba botša ka baeng bao Aborahama a ba rometšego go tšwa Kanana.

Ge kgaetšedi ya Rebeka e lego Labane a bona dimpho tša maemo tšeo di neilwego kgaetšedi ya gagwe gomme a e-kwa gore Eliesere ke mang, o ile a mo laletša gore a tsene ka gae. Eupša Eliesere o re: “Nka se kê ka ja kè sešo ka bolêla ditaba tša-ka.” Ka gona o hlalosa lebaka leo ka lona Aborahama a mo romilego. Bethuele le mosadi wa gagwe gotee le Labane ba kgahlegile gomme ba kwana le taba ya lenyalo.

Ka morago ga dijo, Eliesere le bao a bego a e-na le bona ba ile ba robala moo. Mesong e latelago, Eliesere o re: “Mpheng tsela ke boêlê xo mong wa-ka!” Eupša mmago Rebeka le Labane kgaetšedi ya gagwe ba nyaka gore ba ‘dule le bona matšatšinyana, le ge e ka ba a lesome.’ Ge Rebeka a be a botšišwa ge e ba a tla sepela ntle le tika-tiko, o ile a araba a re, “E, ke tlo sepela.” Ka ntle le tika-tiko o sepela le Eliesere. Mafelelong a leeto e ba mosadi wa Isaka.—Genesi 24:1-58, 67.

Na o nagana gore go be go le bonolo go Rebeka go tlogela ba lapa labo le bagwera le go ya nageng ya kgole, a tseba gore a ka se sa ba bona gape?— Aowa, go be go se bonolo. Lega go le bjalo, Rebeka o ile a šegofatšwa ka baka la go ikemišetša go dira seo se kgahlago Jehofa. E ile ya ba motho yoo Mophološi wa rena, Jesu Kriste, a ilego a belegwa ka yena. Le rena re tla šegofatšwa ge e ba re ikemišeditše—go swana le yena—go dira seo se kgahlago Jehofa.—Baroma 9:7-10.