Go Aloga ga Sehlopha sa Bo-126 sa Gilead

Tsela ya go ba Moromiwa yo a Atlegago

LEŠABA le le thabilego le ile la kgobokana Lefelong la tša Thuto la Watchtower kua Patterson, New York, bakeng sa tiragalo e kgethegilego. Mokibelo, March 14, 2009, e be e le letšatši la go aloga ga sehlopha sa bo-126 sa Sekolo sa Beibele sa Watchtower sa Gilead. Dialoga tša sona di be di le kgaufsi le go romelwa dinageng tše 22 go yo bolela ditaba tše dibotse tša Mmušo wa Modimo.—Mateo 24:14.

Barutwana ba be ba sa tšwa go fetša thuto e tseneletšego ya Beibele ya dikgwedi tše hlano yeo e reretšwego go ba thuša go ba baromiwa ba Bakriste ba atlegilego. Lenaneo la go aloga le ile la ba fa sebaka sa mafelelo sa go theetša keletšo e bohlale mabapi le kamoo ba ka fihlelelago pakane yeo ka gona.

Anthony Morris, setho sa Sehlopha se Bušago sa Dihlatse tša Jehofa, yoo e bego e le modula-setulo wa lenaneo o gopotše ka gore, Sekolo sa Gilead se thomile go tlwaetša baromiwa ka 1943. Ga e sa le go tloga ka nako yeo, dialoga di bile le tutuetšo e kgolo kudu modirong wa lefase ka bophara wa boboledi.

Seboledi se boletše gore, gaešita le ge bamangwalo le Bafarisei ba be ba tšeela baapostola ba Jesu fase ba re ke “ba sa rutegago le ba sa tsebego selo,” baganetši bao ba ile ba lemoga gore baapostola ba be ba kgona go bolela ka baka la ge ba ile ba ba le Jesu. (Ditiro 4:13, King James Version) Tlwaetšo yeo barutwana ba e hweditšego e ba kgontšha go bolela ka thelelo.

Robert Ciranko, mothuši wa Komiti ya Bongwadi ya Sehlopha se Bušago, o godišitše sehlogo se se rego, “Le se ke la Beba Sefahlego.” O boletše gore barutwana go se go ye kae ba be ba tla kopana le batho ba ditšo tše fapa-fapanego le metlwae e fapa-fapanego. Lega go le bjalo, go dira boboledi go bona go ka se be thata ge feela barutwana ba ka ba le boemo bja Jehofa bja kgopolo. Go ya ka phetolelo ya lentšu ka lentšu ya Ditiro 10:34, “Modimo ga a reke sefahlego,” e lego seo se rago gore, ga a amogele yo mongwe go feta yo mongwe. “Modimo ga a bebe sefahlego.” (Ditiro 10:35) Ngwanabo rena Ciranko o itše: “Ka go ba le boemo bja Modimo bja kgopolo le go lebelela yo mongwe le yo mongwe kabelong ya gago e le yo a ka tlago a amogelwa ke Modimo, o tla ba moromiwa wa gagwe yo a atlegago e le ruri.”

“Le na le Seo se Nyakegago”

Samuel Herd, setho sa Sehlopha se Bušago, o thomile ka gore, “Ba bangwe ba bona kamela e befile, lega go le bjalo, ke e swanelago bophelo bja leganateng ka mo go phethagetšego.” Ka mo go swanago, baromiwa ba bafsa ba na le seo se nyakegago go ka atlega dinageng tšeo ba abetšwego go tšona. Ba tla thušwa ke dilo tše hlano.

1. Go rata Jehofa. (Mateo 22:37, 38) Barutwana ba šetše ba bontšhitše boikemišetšo bja go hlankela Jehofa.

2. Tsebo e bolokilwego ya Lentšu la Modimo. Kamela e boloka dijo ka makhureng a thota ya yona. Lega go le bjalo, e ka se kgaotše go ja gomme ya ithekga ka bobolokelo bjoo bja nakong ya tšhoganetšo. Ka mo go swanago, baromiwa ga se ba swanela go ithekga feela ka tsebo yeo ba e hweditšego Sekolong sa Gilead eupša ba swanetše go tšwela pele ba iphepa moyeng.

3. Go rata batho. (Mateo 22:39) Barutwana ba kwela batho bohloko.

4. Moya wa boikgafo. (Psalme 110:3) Ge matla a moromiwa a fokotšega, Jehofa o tla mo nea matla.—Jesaya 40:29.

5. Matla a bofsa. Go fo swana le ge kamela e dira gore monamedi wa yona a phatše leganata, baromiwa le bona ba ka swanelwa ke go rwala  Mokriste-gotee yo a nago le mathata moyeng. Seo se nyaka matla a mantši, eupša baromiwa ba na le matla a bofsa.

Dikarolo tše Dingwe tša Lenaneo

Michael Burnett, mohlahli wa Gilead, o boletše gore, dikoko goba dialmonte e be e le tše dingwe tša dilo tšeo Jakobo a di rometšego go mmuši wa Egipita e le mpho. (Genesi 43:11) Dialmonte ke tše dinyenyane eupša di na le phepo e ntši. Barutwana ba jele dialmonte tše dintši tša moya ge ba be ba le sekolong. Tše dingwe tša dithuto tšeo ba swanetšego go dula ba di gopola ke thuto ya mabapi le bohlokwa bja go kgotsofalela ditokišetšo tša Jehofa gotee le go ithuta go rata maemo a bona a mafsa.

Mark Noumair, yoo le yena e lego mohlahli wa Gilead, o ile a hlalosa gore Lentšu la Modimo le bjalo ka “mokotla o tletšego bohlale.” (Jobo 28:18, NW) Re swanetše go bula mokotla wo gomme re diriše dikagare tša wona. Ge e ba tirelo ya boromiwa e bonagala e se seo barutwana ba bego ba se letetše, ba ka nagana ka mantšu a moapostola Paulo. Barutiwa ba Jesu ba ile ba mo romela motseng wa gabo nywaga e senyane. Go e na le go bea mabaka ka gore bjalo ka ‘sebjana se se kgethilwego’ o be a swanetše go hlankela felo tsoko, Paulo o ile a šoma ka thata go sa šetšwe moo a bego a le gona. (Ditiro 9:15, 28-30) Go hlompha dikgetho tša Jehofa e ka ba tlhohlo. Yo mongwe yo a ilego a dira bjalo e be e le Jonathane. Ge a lemoga gore Dafida e be e le kgoši yeo e kgethilwego ke Jehofa, Jonathane o ile a kgotsofalela go mo thekga.

Karolong e rego “Bahlanka ba Modimo ba Bolela ka Sebete,” barutwana ba ile ba diragatša diphihlelo tšeo ba bilego le tšona modirong wa boboledi nakong ya ge ba le sekolong. Ba bantši ba bona ba ile ba thoma dithuto tša Beibele. Polelong e latelago e nago le sehlogo se se rego “Go Hlangwa ke Mokgatlo wa Jehofa,” go ile gwa boledišanwa le baromiwa ba bararo ba nako e telele. Yo mongwe le yo mongwe o ile a hlalosa kamoo a ilego a swanelwa ke go dirišana le mokgatlo wa Modimo ka gona.

“E-ba Moromiwa yo a Thabilego”

Ke moka Gerrit Lösch, setho se sengwe sa Sehlopha se Bušago, o ile a nea polelo e kgolo ya lenaneo leo, yeo e nago le sehlogo se se rego, “E-ba Moromiwa yo a Thabilego.” O boletše gore, dilo tše dintši tšeo go thwego di a kgahliša ga di tliše lethabo la kgonthe. (Diema 14:13; Mmoledi 2:10, 11) Lethabo le le swarelelago le tlišwa ke go dira thato ya Modimo, gaešita le ge e se ka mehla go dira bjalo go lego bonolo. Thuto ya Gilead e be e tletše ka mošomo o thata eupša e tlišitše kgotsofalo e kgolo.

Go na le dilo tše mmalwa tšeo di tlaleletšago go direng gore Bakriste ba therešo ba thabe. Ba rapela Modimo yo a thabilego. (Psalme 33:12; 1 Timotheo 1:1) Ba phela paradeiseng ya moya, gomme Beibele e bontšha gore go se go ye kae lefase e tla ba paradeise ya kgonthe. Ba hweditše morero wa bophelo—go hlankela Jehofa le go mo tumiša. Go oketša moo, ba ratwa ke Jehofa le Jesu.

Seboledi se tlaleleditše ka gore: “O tla ba moromiwa yo a thabilego ge e ba o ithuta go kgotsofala.” Go rata batho ba bangwe le go ratwa ke bona ke selo se sengwe seo se tlišago lethabo. Ka gona, bipa dikarogo tša ba bangwe go e na le go di swaya. Dira botse go ba bangwe, thuša ba fokolago, gomme o anege diphihlelo tše dibotse. (Psalme 41:1, 2; Ditiro 20:35) Lethabo le tlišwa ke ge re dira sohle seo re ka se kgonago modirong wa boboledi.—Luka 11:28.

 Ngwanabo rena Lösch o phethile ka gore: “Tšwelang pele le le baromiwa ba thabilego, le ithabiša ka tsela e lekanego eupša le lebišitše tlhokomelo go tumišeng Modimo yo a thabilego, e lego Jehofa, le go direng gore ba bangwe ba bantši ba thabe.”

Ka morago ga go fetiša madume a tšwago dinageng tše dintši, Anthony Morris o ile a nea barutwana di-diploma tša bona. Ka morago ga moo, moemedi wa sehlopha sa bo-126 o ile a bala lengwalo leo le yago go Sehlopha se Bušago. Go lona barutwana ba hlalosa kamoo ba lebogago ka gona bakeng sa go ba gona Sekolong sa Gilead.

Ge a phetha, modula-setulo o ile a bolela gore ‘malokololo le mešifa’ tšeo di dirago gore mmele e be o tee di swantšhetša mekgwa le ditokišetšo tšeo “mohlanka yo a botegago le wa temogo” a di dirišago go nea batho ba Jehofa dijo le tlhahlo. (Bakolose 2:18, 19; Mateo 24:45) Ge e ba dialoga tša Gilead di dirišana ka mo go feletšego le baemedi ba kgethilwego ba Modimo, di tla atlega ge di phetha bodiredi bja tšona ka botlalo.—2 Timotheo 4:5.

[Lepokisi go letlakala 30]

DIPALO-PALO TŠA SEHLOPHA

Palo ya dinaga tše di emetšwego: 6

Palo ya dinaga tšeo ba abetšwego go tšona: 22

Palo ya barutwana: 56

Palo ya banyalani: 28

Palo-gare ya nywaga: 32,8

Palo-gare ya nywaga therešong: 17,9

Palo-gare ya nywaga bodireding bja nako e tletšego: 13,5

DINAGA TŠEO BA ABETŠWEGO GO TŠONA

Dialoga di abetšwe Afrika Borwa, Benin, Bolivia, Bulgaria, Burkina Faso, Cameroon, Costa Rica, Ghana, Guatemala, Honduras, Kenya, Liberia, Madagascar, Mozambique, Nicaragua, Panama, Paraguay, Peru, Romania, Sierra Leone, Togo le Uganda.

[Seswantšho go letlakala 31]

Sehlopha se se alogago sa bo-126 sa Sekolo sa Beibele sa Watchtower sa Gilead

Methaladi e balwa go tloga ka pele go ya ka morago gomme maina a lokeleditšwe go tloga ka go le letshadi go ya ka go le letona mothalading o mongwe le o mongwe.

(1) Kirchhoff, K.; Nichols, C.; Guzmán, Y.; Coil, H.; Becker, O.; De Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte, A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. (7) Boucher, M.; Coil, K.; Marsh, C.; Guzmán, J.; Jones, W.; Kambach, J. (8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.